Yoswa 19 - Amazwi Yakwe Leza 2013

Impanga iyapilwe ku amu mutundu wakwe Simeoni

¹ Yakwe ciili ukupelwa impanga yali amu mutundu wakwe Simeoni, uluko nu luko. Impanga ino yapilwe yali mukasi ka mpanga ya mutundu wakwe Yuda.

² Fwandi mumo umwali Belisyeba (nanti Syeba), Molada,

³ Hazali Syuali, Bala, Ezemu,

⁴ Elitoladi, Betuli, Holima,

⁵ Zikilagi, Beti Malikaboti, Hazali Susa,

⁶ Beti Lebaoti na Syalueni. Yonsi pamwi yali imisumba ikumi na itatu ni mizi yakweyo.

⁷ Aini, Limoni, Eteli na Asyani. Yonsi pamwi yali imisumba ini ni mizi yakweyo

⁸ ukulundapo ni mizi yonsi ukuzinguluka imisumba ii ukufika nu ku Baalati Beeli (nanti Lama mu Negebu). Impanga ii cili caupyanyi ca mutundu wakwe Simeoni, uluko nu luko.

⁹ Impanga iyapilwe ku mutundu wakwe Simeoni yali icipande ca mpanga cino yaputwile nu kupeela ku mutundu wakwe Yuda. Pasi pano impanga ya mutundu wakwe Yuda yakulisye ukuluta icipimo icingaulinga. Acino umutundu wakwe Simeoni wapilwe icaupyanyi cao mukasi ka mpanga ya mutundu wakwe Yuda.

¹⁰ Yakwe citatu ukupelwa impanga amu mutundu wakwe Zebuluni, uluko nu luko. Impanga ino yapilwe yafisile ku Salidi.

¹¹ Nu mupaka wao walungime ku uwondaka ukufika nu ku Malala, iupuzinkanya kufika nu ku Dabesyeti nu ku luzi ku ufumondaka wa Yokoneamu.

¹² Ukufuma ku Salidi iupetuka kulungama ku ufumondaka ku mpanga ya Kisiloti Taboli nga iutwalilila kuya ku Dabelati nu kutumbela kufika ku Yafiya.

¹³ Alino iutwalilila ukulungama ku ufumondaka nu kuyafika ku Gati Hefeli, nu ku Etikazini. Alino iufumila ku Limoni, nga iupetuka kulungama ku Neya.

¹⁴ Kuku kwene akuno umupaka iupetuka ukulungama ku katutu ku Hanatoni, nu kupelela mu Cifoloma ca Ifuta Eli,

¹⁵ nu ku Katati, nu ku Naalali, nu ku Syimuloni, nu ku Idala nga na Betelemu. Yonsi pamwi yali imisumba ikumi na iili ni mizi yakweyo.

¹⁶ Imisumba ii kumwi ni mizi yakweyo yali icaupyanyi ca mutundu wakwe Zebuluni, uluko nu luko.

Impanga iyapilwe ku amu mutundu wakwe Isakali

¹⁷ Yakwe cini ukupelwa impanga amu mutundu wakwe Isakali, uluko nu luko.

¹⁸ Impanga ino yapilwe yafisile ku Yezileele, nu ku Kesuloti, nu ku Syunemu,

¹⁹ nu ku Hafalaimu, nu ku Syioni, nu ku Anaalati,

²⁰ nu ku Labiti, nu ku Kisyioni, nu ku Ebezi,

²¹ nu ku Lemeti, nu ku Enganimu, nu ku Eniada nu ku Beti Pazezi.

²² Umupaka uwo wafisile ku Taboli, nu ku Syaazuma nga na Beti Syemesyi, nga iupelela ku Luzi lwa Yodani. Yonsi pamwi yali imisumba ikumi na mutanda ni mizi yakweyo.

²³ Imisumba ii ni mizi yakweyo yali icaupyanyi ca mutundu wakwe Isakali, uluko nu luko.

Impanga iyapilwe ku amu mutundu wakwe Asyeli

²⁴ Yakwe cisano ukupelwa impanga amu mutundu wakwe Asyeli, uluko nu luko.

²⁵ Impanga ino yapilwe yafisile ku Helekati, nu ku Hali, nu ku Beteni, nu ku Akisyafu,

²⁶ nu ku Alameleki, nu ku Amadi nga na Misyali. Ku uwondaka umupaka wafisile ku Kalimeli nu ku Syioli Libinati.

²⁷ Lyene iupetuka ku ufumondaka ukulungama ku Beti Dagoni, iufika ku Zebuluni nu ku Cifoloma ca Ifuta Eli, nga iulungama ku katutu ku Beti Emeki na Neiyeli, iupita ku Kabulu lwa kwimani.

²⁸ Alino umupaka uwa iuya ku Ebuloni, nu ku Leobu, nu ku Hamoni na Kanaa, iufika nu ku Sidoni mukulu.

²⁹ Umupaka ulya lyene iupetuka iulungama ku Lama nga iuya ku Tuli, umusumba wi linga, nga nupya iupetuka iulungama ku Hosa nga iufumila kuli yemba mu mpanga ya Akizibu,

³⁰ Umaa, Afeki na Leobu. Yonsi pamwi yali imisumba amakumi yaili na iili ni mizi yakweyo.

Impanga iyapilwe ku amu mutundu wakwe Nafutali

³¹ Imisumba ii ni mizi yakweyo yali icaupyanyi ca mutundu wakwe Asyeli, uluko nu luko.

³² Yakwe mutanda ukupelwa impanga amu mutundu wakwe Nafutali, uluko nu luko.

³³ Impanga ino yapilwe yatandikile ku Helefu ku cimuti cikulu camu Zaananimu, ipuzinkanya ku Adami Nekebu na Yabuneele iufika ku Lakumu, mpaka iupelela ku Luzi lwa Yodani.

³⁴ Umupaka ulya iupetuka ku uwondaka iuya ku Azinoti Taboli nga iufuma kuku iuya ku Hukoki. Alino iufika ku Zebuluni lwaku kaeya, nu ku Asyeli lwaku uwondaka, nu ku mpanga itambalale mu mbali ya Luzi lwa Yodani lwaku ufumondaka.

³⁵ Imisumba yao iyamalinga yali a Zidimu, Zeli, Hamati, Lakati, Kineleti,

³⁶ Adama, Lama, Hazoli,

³⁷ Kedesyi, Edilei, Eni Hazoli,

³⁸ Yiloni, Migidala Eli, Holemu, Beti Anati na Beti Syemesyi. Yonsi pamwi yali imisumba ikumi na fundimbali ni mizi yakweyo.

³⁹ Imisumba ii kumwi ni mizi yakweyo yali icaupyanyi ca mutundu wakwe Nafutali, uluko nu luko.

Impanga iyapilwe ku mutundu wakwe Dani

⁴⁰ Yakwe cinimbali ukupelwa impanga yali amu mutundu wakwe Dani, uluko nu luko.

⁴¹ Impanga ino yapilwe yafisile ku Zola, nu ku Esyitaoli, nu ku musumba wa Syemesyi,

⁴² nu ku Syaalabini, nu ku Aiyaloni, nu ku Itila,

⁴³ nu ku Eloni, nu ku Timinaa, nu ku Ekiloni,

⁴⁴ nu ku Eliteke, nu ku Gibetoni, nu ku Baalati,

⁴⁵ nu ku Yeudi, nu ku Bene Belaki, nu ku Gati Limoni,

⁴⁶ nu ku Meyalikoni nga na Lakoni, kumwi ni ncende iyalungatana na Yopa.

⁴⁷ Lelo amu mutundu wakwe Dani walanga yaposiwa kupoka impanga iyapilwe kunoyali. Caleka iyaya yayazanza nu kupoka umusumba wa Lesyemu, iyakomola aikazi yamwenemo nga yikalamo. Alino iikala mwenemo nu kutemela umusumba ulya izina lipya ilyakuti Dani, ilyali izina lya cikolwe cao.

⁴⁸ Imisumba ii ni mizi yakweyo yali icaupyanyi ca mutundu wakwe Dani, uluko nu luko.

Ukwankanya kwa kusyalikizya ukwa mpanga

⁴⁹ Lino intunguluzi zya ina Izlaeli zyamala ukwankanya impanga nu kwika ivimanyililo vyakwe yanande, yapeela Yoswa umwana umonsi wakwe Nuni icaupyanyi umukasi ka mpanga yao kwene,

⁵⁰ wakwe vino Yawe wapile ilamulo. Yamupile umusumba wa Timunati Selaa mu mpanga ya myamba yakwe Efulemu, ukulingana vino wayalenzile. Alino nawe akuululula umusumba ulya nu kwikala mwenemo.

⁵¹ Vii, vili vipitulwa vya mpanga vino simapepo Eleaza, na Yoswa umwana umonsi wakwe Nuni nga ni ntunguluzi zya nko zya mitundu ya ina Izlaeli yankinye ukupitila mu kupendola ku Syilo pa manso yakwe Yawe pa mulyango wi Taalu lya Ukongano. Vivyo avili vino yamalilile ukwankanya impanga ilya.