Yoswa 18 - Amazwi Yakwe Leza 2013

Imipaka ya mpanga izyasyala

¹ Pacisila lino iuvi lyonsi lya ina Izlaeli lyapokolola impanga yonsi pyu, lyakongine ku Syilo kuko kuno lyasimfile ni Taalu lya Ukongano.

² Pa nsita iyo ale kucisile imitundu cinimbali itacili ipelwe icipande cao ica mpanga

³ Acino Yoswa anena aina Izlaeli ati, “Uzye mulalolela mpaka ukufika nsita cii pakuti mumalile ukupokolola impanga ino Yawe Leza wa vikolwe vinu wamupeela?

⁴ Mpelini antu yatatu muli cila mutundu. Nani namayatuma ukuya ceceta impanga nu kusolola ino yangatemwa, alino yakawele kuli nene.

⁵ Impanga ili nu kwankanyiziwa mu viputulwa cinimbali. Umutundu wakwe Yuda uli nu kusyala mu muputule wa mpanga iyapeelwa kuno uli iyayela ku kaeya. Nu muputule wakwe Yosefu nao mu muputule wa mpanga iyayela ku katutu.

⁶ Fwandi mukalembe ningo imipaka ya mpanga cinimbali alino muce mwize mundetele. Lyene nani ndalola muno ndamupendolwela pa manso yakwe Yawe Leza witu.

⁷ Lelo amu mutundu wakwe Levi yasi nu kupelwa impanga, pasi pano yene ukutumikila wakwe yasimapepo yakwe Yawe icili cuma cao. Alino nu kuya, amu mutundu wakwe Gadi, nu mu mutundu wakwe Lubeni, nga nu mutundu pakasi wakwe Manase, yene pankanyiziwa mpiti impanga yao lwaku ufumondaka wa Luzi lwa Yodani, impanga ino Mose umuomvi wakwe Yawe wasile wayapeela.”

⁸ Awe mukwai aonsi yao ali pa kukatuka, iyapita ku kulemba imipaka ya mpanga ilya. Yoswa ayapeela ivipope ati, “Pitangini muye mupitane mu mpanga yonsi, muicecete ningo alino muwezye amazwi kuli nene. Nani kuno ku Syilo ndamupendolwela pa manso yakwe Yawe.”

⁹ Alino antu yaya iyapita, nu kuya pitana mu mpanga ilya, yalemba utu mipaka tonsi mu vipande cinimbali, twa misumba yonsi pamwi ni mizi yonsi, alino iyaweluluka kuli Yoswa ku nkambi ku Syilo.

¹⁰ Yoswa ayapendolwela mu Syilo pa manso yakwe Yawe. Alino aankanya aina Izlaeli impanga ukulingana ni mendela zya mitundu yao.

Impanga iyapilwe ku aina Benjamini

¹¹ Impanga iyakupeela aina Benjamini, uluko nu luko, yali iya kutandikilapo. Impanga ino yapilwe yali pakasi ka mpanga ya ana yakwe Yuda na yakwe Yosefu.

¹² Ku lusansa lwaku katutu kakwe Yeliko nga nu ku uwondaka nu kutentemukila kwisika, ukupita mu mpanga ya myamba ukuponela mu lwanga lwaku Betaveni.

¹³ Ukufuma kuko, umupaka iutentemukila ku kaeya kakwe Luzi (kuli kuti Betele) nga iutentemukila ku Ataloti Adali, pa mwamba lwaku kaeya kakwe Beti Holoni uwapisika.

¹⁴ Alino umupaka iufumila ku mwamba uno walozyanya amanso na Beti Holoni, iupetukila ku kaeya ukufuma lwaku uwondaka wa mwamba uu nga iulungama ku Kilyati Baali (nanti Kilyati Yealimu), umusumba wa amu mutundu wakwe Yuda. Uu, uwali umupaka waku uwondaka.

¹⁵ Umupaka uwayelile ku kaeya wali vii: ukutandikila pa mpela yakwe Kilyati Yealimu lwaku uwondaka, umupaka waya watunkila pa tufukoka twaku Nefutoa.

¹⁶ Lyene iusulukila ku mpelelekezyo ya mwamba uno vilozinye cinso ni Cifoloma ca Beni Hinomu, lwaku katutu ka Cifoloma ca Lefaimu. Alino iutwalilila kwisika ku Cifoloma ca Hinomu nga iupambata ulutala lwa ina Yebusi lwaku mutentemuko waku kaeya nu kuya ponela pa Eni Logeli.

¹⁷ Alino iusenukila ku katutu, iuya iufika ku Eni Syemesyi, iutwalilila ku Geliloti, ulunga nu mulundu wa Adumimu. Wiza waya nu ku Ketefu ulunga na Alaba, nga iwikilila ku Alaba na piwe lyakwe Boani umwana umonsi wakwe Lubeni.

¹⁸ Alino iutwalilila ku mutentemuko waku katutu kakwe Beti Alaba nga iufika nu kwisika ku Alaba.

¹⁹ Nga lyene iuya ku mutentemuko waku katutu kakwe Beti Hogila nga iusiika ku cifuma cakwe Yemba wa Musilya, icayela lwaku kaeya. Ali na kumawilo ya Luzi lwa Yodani lwaku kaeya. Uu fwandi uli mupaka uwayela lwaku kaeya.

²⁰ Luzi lwa Yodani ali mupaka waku ufumondaka. Fwandi ikwene ili mipaka iya mpanga ilya ino yapilwe ku mitundu ya ana yakwe Benjamini, ukulingana ing'anda ni ng'anda ukuzingulusya impanga yao.

²¹ Imisumba ya luko lwa ana yakwe Benjamini, uluko nu luko aei: Yeliko, Beti Hogila, Emeki Kezizi,

²² Beti Alaba, Zemalaimu, Betele,

²³ Avimu, Pala, Ofula,

²⁴ Kefali Amoni, Ofini na Geba: imisumba ikumi na iili ni mizi yakweyo.

²⁵ Pali nu musumba wa Gibyoni, Lama, Beeloti,

²⁶ Mizipa, Kefila, Moza,

²⁷ Lekemu, Ilipeele, Talala,

²⁸ Zela, Haelefe, umusumba wa ina Yebusi (kuli kuti, Yelusalemu), Gibeya na Kilyati Yealimu: imisumba ikumi na ini nga ni mizi yakweyo. Iyo ili mpanga ino umutundu wakwe Benjamini wapilwe, uluko nu luko kuti iye icaupyanyi cao.