Yoswa 17 - Amazwi Yakwe Leza 2013

Impanga ya mutundu wakwe Manase ku uwondaka

¹ Alino nupya iyatola impanga iya ku uwondaka wa Luzi lwa Yodani iyaipela ku mutundu wakwe Manase, umwana iyeli wakwe Yosefu. Makili wali lili iyeli lyakwe Manase nupya wali icikolwe ca ina Gileadi. Makili wali umusilika. Wene wapilwe impanga ya Gileadi ni ya Basyani pamulandu wakuti aina Makili yali ivita vya maka.

² Acino impanga iya ku uwondaka wa Luzi lwa Yodani yankanyiziwe kuli yauze asyala amu mutundu wakwe Manase ukulingana na vino uluko lwao lwali. Kwali ana yakwe Abiezeli, na yakwe Heleki, na yakwe Asilieli, na yakwe Syekemu, na yakwe Hefeli nga na yakwe Syemida. Yakwene ali aonsi nayauze amu mupanda wakwe Manase umwana wakwe Yosefu ukulingana ni nko zyao.

³ Zelofeadi umwana umonsi wakwe Hefeli, umwana umonsi wakwe Gileadi, umwana umonsi wakwe Makili, umwana umonsi wakwe Manase, atakweti ana aonsi suka sile anaci. Na mazina yao yali a Maala, Nowa, Hogila, Milika na Tiliza.

⁴ Iyaya kuli simapepo Eleaza, na kuli Yoswa umwana umonsi wakwe Nuni, nu ku ntunguluzi, nga yavwanga yati, “Yawe wapile ilamulo kuli Mose kuti atupeele impanga sweswe na yakalume itu kuti iye icaupyanyi citu.”

⁵ Manase wapilwe ivitungu ikumi ivya mpanga ukulunda pa mpanga ya Gileadi ni ya Basyani lwaku ufumondaka wa Luzi lwa Yodani,

⁶ pamulandu wakuti ana anaci amu mutundu wakwe Manase nayo kwene yapilwe impanga wa ana yakwe aonsi. Impanga iya Gileadi iya ana yauze asyala amu mupanda wakwe Manase.

⁷ Impanga yakwe Manase yatandikila ku Asyeli nu kufika ku Mikimetati ku ufumondaka wakwe Syekemu. Alino ukufuma kuku umupaka iuya lwaku kaeya iuminkanya na antu akaikala ku Eni Tapuua.

⁸ Impanga yaku Tapuua iyakwe Manase, lelo umusumba wa Tapuua wali mu mupaka wakwe Manase nupya wali uwa amu mutundu wakwe Efulemu.

⁹ Lyene umupaka iutwalilila ku kaeya ku Luzi lwa Kanaa. Kwali imisumba yakwe Efulemu iyali ukwayelile imisumba yakwe Manase. Lelo citungu ca ku katutu ka luzi uli mupaka wakwe Manase nupya wene wapelela muli yemba.

¹⁰ Lwaku kaeya impanga yali iyakwe Efulemu, na lwaku katutu impanga yali iyakwe Manase na yemba wali ali mupaka wao. Yene yapakine na Asyeli ku katutu nga na Isakali ku ufumondaka.

¹¹ Mukasi ka mpanga yakwe Isakali na Asyeli, Manase wakweti Beti Syani, Ibeleamu nga ni mizi yakweo, na aikazi amu Doli nu mu mizi yakweo, na amu Endoli nu mu mizi yakweo, na amu Taanaki nu mu mizi yakweo, na amu Megido nu mu mizi yakweo

¹² Lelo amu mutundu wakwe Manase yaposiwe ukuzinga aina Kenani aikalanga mu misumba ii. Pasi pano aina Kenani yakonelile mwenemo.

¹³ Nanti cali vivyo, lino aina Izlaeli yatwalilila ukuya na maka iyapatikizya aina Kenani ukuomba wa azya, nga lelo yaposiwe ukuzinga yonsi pyu.

Aina Efulemu na ina Manase ku uwondaka yalenga impanga nayuze

¹⁴ Amu mupanda wakwe Yosefu iyanena Yoswa yati, “Uzye pacani cino watutupelela sile icipande conga ica mpanga kuti ciye icaupyanyi citu? Swemo tuvuzile nga Yawe watupolelela wakwe cimwi.”

¹⁵ Yoswa nawe aasuka ati, “Ndi cakuti muvuzile wakwe cimwi nupya ndi cakuti impanga yakwe Efulemu ya myamba yacepesya itange imukumane, lyene yangini mu mutengo mu mpanga ya ina Pelizi na ina Lefaimu mukasete imiti.”

¹⁶ Amu mupanda wakwe Yosefu nayo yaasuka yati, “Impanga ya myamba itange itukumane. Ukulunda pali cico, aina Kenani yonsi akaikala mu Beti Syani ni mizi yakweyo nga na ikazi amu Cifoloma ca Yezileele yakwata amaceleta ya vyela.”

¹⁷ Lelo Yoswa anena amu mupanda wakwe Yosefu amu mutundu wakwe Efulemu na wakwe Manase ati, “Muvuzile wakwe cimwi nupya mukweti amaka sana. Mutalinzile ukukwata impanga yonga, lelo mukulondekwa ukukwata ivipande navyuze.

¹⁸ Impanga ya myamba imaya iyakwinu. Nanti mungaya imiti uli, muli nu kuiseta pakuti mwikale mwenemo ukutandikila ku lutwe longa mpaka ukufika nu ku lutwe luze. Nanti aina Kenani yakweti amaceleta ya vyela, nanti yangaya akome, mwemo mungayazinga mwenemo.”