Yoswa 16 - Amazwi Yakwe Leza 2013

Impanga ya ina Efulemu nu mutundu pakasi wakwe Manase

¹ Impanga ino yankanyiziwe ku amu mupanda wakwe Yosefu yatandikila pa Yodani ku Yeliko, lwaku ufumondaka wa manzi yaku Yeliko, nga ukufuma kuku itumbela mu lwanga ukuya ku Betele, impanga ya myamba.

² Kufuma ku Betele iya ku Luzi, ilambila ku mpanga ya ina Aliki mu Ataloti,

³ nga itentemukila ku ufumondaka ku mpanga ya ina Yafuleti ukufika nu ku mupaka wakwe Beti Holoni wakwisika nga iufika nu ku Gezeli, nga iupelela muli Yemba.

⁴ Acino Manase na Efulemu, amu mupanda wakwe Yosefu, iyapokelela icaupyanyi cao.

Impanga iyapilwe ku amu mutundu wakwe Efulemu

⁵ Impanga iyapilwe ku mutundu wakwe Efulemu, uluko nu luko aei: Umupaka wao waku ufumondaka watandikila ku Ataloti Adali nga iutumbela ku Beti Holoni wapapeela.

⁶ Nga iutwalilila mpaka kuli Yemba wa Adiliya. Mikimetati waya ku katutu. Lyene ukufuma kuku, umupaka iusenukila ku Taanati Syilo lwaku ufumondaka, iupambata kweneko nga iuya ku Yanowa ku ufumondaka.

⁷ Lyene ukufuma ku Yanowa iutentemukila ku Ataloti nu ku Naala, iufika ku Yeliko nga iupelela mu Luzi lwa Yodani.

⁸ Alino ukufuma ku Tapuua iulungama kwisika lwaku Luzi lwa Kanaa nga iupelela muli Yemba wa Adiliya. Impanga ii cili caupyanyi ca mutundu wakwe Efulemu, uluko nu luko.

⁹ Alino ukulundapo kwali kweneko imisumba ni mizi yakweyo iyapilwe ku amu mutundu wakwe Efulemu, lelo ala ili mu mupaka wa mutundu wakwe Manase.

¹⁰ Lelo yene yatazinzile aina Kenani aikalanga mu Gezeli. Na pilelo kwene aina Kenani yakaikala pakasi ka mutundu wakwe Efulemu, lelo yakayapatikizya kuomba wa azya.