Yoswa 14 - Amazwi Yakwe Leza 2013

Ukwankanya kwa mpanga lwaku uwondaka wa Yodani

¹ Zii zili mpanga zino aina Izlaeli yapilwe mu Kenani, zizyo zino simapepo Eleaza na Yoswa umwana umonsi wakwe Nuni pamwi ni ntunguluzi zya nko zya mitundu ya ina Izlaeli yankinye kunoyali.

² Impanga zyao zya upyanyi zyankanyiziwe ku mitundu fundimbali na onga pakasi ukupitila mu kupendola, wakwe vino Yawe wapile ilamulo kupitila muli Mose.

³ Mose wapeezile icaupyanyi ku mitundu iili na onga pakasi lwaku ufumondaka wa Luzi lwa Yodani. Lelo aina Levi atayapezile icaupyanyi wakwe vino wacisile ku mitundu yuze.

⁴ Ana yakwe Yosefu yali imitundu paili, Manase na Efulemu. Aina Levi yatapezilwe icipande ca mpanga, suka sile imisumba iyakwikala mwenemo, na manyika aku cemelamo iviteekwa ivikulu ni vinono.

⁵ Acino aina Izlaeli iyankanya impanga wakwe vino Yawe wapeezile ilamulo kuli Mose.

Kalebu wapelwa umusumba wa Hebuloni

⁶ Lyene antu amu mutundu wakwe Yuda yiiza kuli Yoswa ku Giligali, nga Kalebu umwana wakwe Yefune umwina Kenizi amunena ati, “Umanyile cino Yawe wanenyile Mose umuntu wakwe Leza ku Kadesyi Banea ica pali wewe nani.

⁷ Nali ni myaka amakumi yani lino Mose umuomvi wakwe Yawe wantumile ukufuma ku Kadesyi Banea ku kwendezya impanga. Nga nani namulandile ivisinka vyonsi wakwe vino cali.

⁸ Nga aina yane aile kweneko pamwi nani iyatovola antu. Lelo nemo nu mwenzo onsi nacisile ivyalondanga Yawe.

⁹ Pa wanda ulya Mose alapa nu mulapo kunondi, ati, ‘Impanga ino ulwazo lwako lwalyasilepo ilaya icaupyanyi cako ni ca ana yako amanda pe, pamulandu wakuti wemo nu mwenzo onsi wacisile ivyalondanga Yawe Leza wane.

¹⁰ Ali cino ukufuma lili kwene Yawe wansunga umutende wakwe vino walavile. Patipapita imyaka amakumi yani na isano ukufuma lino wene wavwanzile cico kuli Mose, pa nsita ino aina Izlaeli yali pa lwendo mu lwanga. Ndakai ndi wati ulole, nemo indi ni myaka amakumi cinani na isano.

¹¹ Ni lelo kwene ncili na maka wakwe lino Mose wantumile, nupya ndakai njiteinye ukuya ku ulwi wakwe vino nali pa nsita ilya.

¹² Ale lyene fwandi umpeele impanga ya myamba ino Yawe wandavile pa wanda ulya. Nupya wemwisikulu wayuvwilile pa nsita ilya ukuti aina Anaki yali kuku nu kuti imisumba yao yali ikulu sana nupya iyakuulililwa amalinga. Lelo Yawe ndi wangazwa indayazinga wakwe vino wene wavwanzile.’ ”

¹³ Lyene Yoswa apolelelela Kalebu umwana wakwe Yefune nga amupeela umusumba wa Hebuloni kuti uye icaupyanyi cakwe.

¹⁴ Acino kufika ni lelo kwene umusumba wa Hebuloni wasyala uwakwe Kalebu umwana wakwe Yefune umwina Kenizi, pamulandu wakuti wene nu mwenzo onsi wacisile ivyalondanga Yawe, Leza wa ina Izlaeli.

¹⁵ Izina lyampiti lya musumba wa Hebuloni yatangi Kilyati Aliba. Aliba wali umuntu umwi umucindamisye uwamu ina Anaki. Caleka mumu antu yakwata upemwilo ku ulwi.