Yoswa 13 - Amazwi Yakwe Leza 2013

Impanga nayuze iyali nu kupokwa

¹ Pa nsita kwene ilya walanga Yoswa watakota cuze, nga Yawe amunena ati, “Lola vino watukota, lelo kucili impanga nayuze ikulu ino ilinzile kupokwa.

² Ni mpanga ino utali upoke aeyi: impanga yonsi ino aina Filisti na ina Gesyuli yakaikala mwenemo,

³ ukufuma ku Luzi lwa Syioli lwaku ufumondaka wa Eguputo ukufika nu ku mpanga ya Ekiloni ku katutu, yonsi kwene ino ikapendwa wa mpanga ya ina Kenani (ili mpanga yakwe yamwene yasano ya ina Filisti ateekanga mu Gaza, mu Asyidodi, mu Asyikeloni, mu Gati nu mu Ekiloni, impanga ya ina Avimu.)

⁴ Na lwaku kaeya, impanga yonsi iya ina Kenani, ukufuma ku Ala wa ina Sidoni ukufika nu ku Afeki, citungu ca ina Amoli.

⁵ Ni mpanga ya ina Gebali, nga ni ncende yonsi iya Lebanoni lwaku ufumondaka kufumilila ku Baali Gadi mwisika ya Mwamba wa Helimoni ukufika ku Lebo Hamati.

⁶ Yonsi akaikala mu ncende zya myamba ukutandikila ku Lebanoni ukufika ku Misilefoti Maimu lwaku ufumondaka, kumwi na ina Sidoni yonsi, Ne mwisikulu ndayazinga pa manso ya ina Izlaeli. Sininkizya ukuti wapeela impanga ii ku ina Izlaeli kuti ikaye icaupyanyi, wakwe vino nakupeela ilamulo.

⁷ Nga ulinzile ukwankanya impanga ii ku mitundu ilya fundimbali nga nu mutundu pakasi wakwe Manase kuti iye caupyanyi cao.”

Ukwankanya kwa mpanga lwaku ufumondaka wa Yodani

⁸ Umutundu pakasi wakwe Manase nauze, nga na amu mutundu wakwe Lubeni na Gadi yene walanga yapokelela icaupyanyi cino Mose wayapeezile lwaku ufumondaka wa Luzi lwa Yodani, wakwe vino Mose umuomvi wakwe Yawe wayapezile.

⁹ Impanga iyo yatandikila ukufuma ku Aloeli lwa mu mbali ya Cifoloma ca Alinoni, kumwi nu musumba uwaya mu cifoloma ni mpanga yonsi itumpuke nupya itambalale, ukutandikila ku Medeba ukufika ku Diboni.

¹⁰ Nga ni mizi yonsi yakwe Siooni umwene wa ina Amoli, uwateekanga mu Hesyiboni, ukufika nu ku mupaka wa ina Amoni.

¹¹ Alino ukwikapo na Gileadi, impanga ya antu aku Gesyuli nu ku Maaka, nu ku Mwamba wa Helimoni onsi nga nu ku Basyani konsi ukufika nu ku Saleka.

¹² Kuli kuti uwene onsi wakwe Ogi mu Basyani, wino wateesile mu Asyitaloti nu mu Edilei nupya wali a wenga pali yao asilepo mu ina Lefaimu. Lelo Mose wacimvizye yamwene yaa yaili nu kuyazingila ukutali.

¹³ Lelo aina Izlaeli yaposiwe ukuzinga antu aku Gesyuli nu ku Maaka. Icaleka na pilelo kwene antu yalya yakaikala pamwi na ina Izlaeli.

¹⁴ Umutundu wakwe Levi onga sile uli uno yatankinye impanga, pasi pano uwila wakoca onsi uno ukapelwa kuli Yawe, Leza wa ina Izlaeli, cili caupyanyi cao, wakwe vino Yawe wayalavile.

Impanga iyapilwe ku amu mutundu wakwe Lubeni

¹⁵ Mose wankinye impanga ku amu mutundu wakwe Lubeni, uluko nu luko kuti iye iyakwao.

¹⁶ Yapilwe impanga ukutandikila ku Aloeli pa mbali ya Cifoloma ca Alinoni, kumwi nu musumba uwaya mu cifoloma, ni mpanga yonsi itumpuke nupya itambalale ukufika nu ku Medeba.

¹⁷ Nu ku ncende iya Hesyiboni ni misumba yonsi yakweyo iyaya pa tumpuke nupya apatambalale wakwe ii: Diboni, Bamoti Baali, Beti Baali Meoni,

¹⁸ Yaazi, Kedemoti, Mefaati,

¹⁹ Kilyataimu, Sibima, Zeleti Syaali uwaya pa mwamba mu cifoloma,

²⁰ Beti Peoli, umutentemuko wa Mwamba wa Pisiga na Beti Yesyimoti,

²¹ ni misumba yonsi iyaya pa ncende itumpuke nupya itambalale nga nu wene onsi wakwe Siooni umwene wa ina Amoli, wino wateesile mu Hesyiboni. Mose wamucimvizye kumwi na Evi, Lekemu, Zuli, Huli na Leba, intunguluzi zyaku Midyani zino zyumine akapi na Siooni uwikalanga mu mpanga ilya.

²² Pali yao yano aina Izlaeli yakomile pali na Balamu umwana wakwe Beoli, wino wasapolanga.

²³ Luzi lwa Yodani lwali ali mupaka wa mpanga umwali imisumba ni mizi yakweyo ino amu mutundu wakwe Lubeni yapilwe, uluko nu luko.

Impanga iyapilwe ku amu mutundu wakwe Gadi

²⁴ Mose wasile wankanya inko zyamu mutundu wakwe Gadi impanga, uluko nu luko.

²⁵ Impanga ino wayapeezile aei, Yazeli, imisumba yonsi yaku Gileadi nga na citika wa mpanga ya ina Amoni ukufika nu ku Aloeli, lwaku ufumondaka wa Laba.

²⁶ Alino ukutandikila ku Hesyiboni ukufika nu ku Lamati Mizipa nu ku Betonimu, nga ukufuma ku Maanaimu ukufika ku Debili.

²⁷ Nga ni mpanga zyaku Cifoloma ca Yodani wakwe zii: Beti Halamu, Beti Nimula, Sukoti na Zafoni kumwi nu wene uwasile wakwe Siooni umwene waku Hesyiboni (kuli kuti ku ufumondaka wa Luzi lwa Yodani, ni mpanga iyelile ukupela kufika ku mpela yakwe Yemba wa Galile).

²⁸ Imisumba ii ni mizi yakweyo yali icaupyanyi icapilwe ku mutundu wakwe Gadi, uluko nu luko.

Impanga iyapilwe ku mutundu pakasi wakwe Manase

²⁹ Mose wasile wankanya impanga ku mutundu pakasi wakwe Manase, kuli kuti, ku ng'anda pakasi ya amu mupanda wakwe Manase, uluko nu luko.

³⁰ Impanga yao yatandikile ku Maanaimu ukulundapo na Basyani wensi, nu wene onsi wakwe Ogi umwene waku Basyani, nga ni misumba yonsi amakumi mutanda yaku Yaili mu Basyani,

³¹ na citika wakwe Gileadi, na Asyitaloti na Edilei (imisumba yaku wene yakwe Ogi umwene waku Basyani). Ili mpanga ino yapile amu mupanda wakwe Makili, uluko nu luko.

³² Zii izili mpanga zino Mose wapeezile ku mitundu ilya kuti ziye icaupyanyi cao mu manyika aku Moabu ku mbalama ya Luzi lwa Yodani lwaku ufumondaka wakwe Yeliko.

³³ Lelo Mose atapile impanga imwi ku mutundu wakwe Levi kuti iye icaupyanyi. Yawe, Leza wa ina Izlaeli, ali caupyanyi cao, wakwe vino wayalavile.