Yoswa 11 - Amazwi Yakwe Leza 2013

Yoswa wacimvya Yabini pamwi na yano walemine nayo

¹ Lino Yabini umwene waku Hazoli uvwa pa vintu ivyacitike, atuma inkombe kuli Yobabu umwene waku Madoni, na kuli yamwene aku Syimuloni nu ku Akisyafu,

² na kuli yamwene aku katutu ku mpanga ya myamba mu Alaba, lwaku kaeya kakwe Yemba wa Galile, mu misana ya twamba yaku ufumondaka nu ku Doli lwaku uwondaka.

³ Atuma nu ku ina Kenani ku ufumondaka nu ku uwondaka, ku ina Amoli, ku ina Hiti, ku ina Pelizi, nu ku ina Yebusi mu mpanga ya myamba, nga nu ku ina Hivi aikalanga mwisika ya Mwamba wa Helimoni mu mpanga yaku Mizipa.

⁴ Yamwene ya yonsi iyakatuka pamwi ni vita vyao vyonsi, iciliumba icikulu wakwe cimwi, avule wa musensenga uwamu nkumba yakwe yemba. Lyene imfwalasi zyao pamwi na maceleta navyo afumfwe.

⁵ Yamwene yaa yonsi yatiyuminkanya ivita vyao nu kucita insakwe ku kaluzi ka Melomu, ku kulwa na ina Izlaeli.

⁶ Yawe anena Yoswa ati, “Utayoopa, pamulandu wakuti mutondo pa nsita ndi ikwene indayapeela yonsi pyu mu makasa ya ina Izlaeli, ala afwe. Ulinzile kutembola imfwalasi zyao nu koca amaceleta yao.”

⁷ Yoswa ni vita vyakwe vyonsi iyaya iyapumikizya anisi yao nu kuyazanza pipi na kaluzi ka Melomu,

⁸ nga Yawe nawe ayapeela mu makasa ya ina Izlaeli. Iyayacimvya nu kuyacocovya nzila yonsi ukufika ku Sidoni Mukulu, nu ku Misilefoti Maimu, nga nu ku Cifoloma ca Mizipa lwaku ufumondaka, suka iyalovya yonsi pyu.

⁹ Yoswa wayacitile wakwe vino Yawe wamupeezile ilamulo. Atembola imfwalasi zyao nu koca amaceleta yao.

¹⁰ Pa nsita ilya Yoswa pamwi ni vita vyakwe iyasenuka iyaya yapoka umusumba wa Hazoli nga yakoma umwene wauko. (Hazoli wali uli musumba uwa maka wakwe cimwi mu mawene yalya yonsi.)

¹¹ Aina Izlaeli iyakomola umuntu wensi uwali mwenemo. Kusi nanti wenga wino yasile umupuma, nga iyoca nu musumba kwene wa Hazoli.

¹² Yoswa watozile imisumba yonsi ilya ayonona nga akoma na yamwene yakweyo yonsi pyu, wakwe vino Mose umuomvi wakwe Yawe wapeezile ilamulo.

¹³ Lelo aina Izlaeli yatosile umusumba nanti onga pa misumba iyakuulwa pa matongwa yakweyo suka sile umusumba wa Hazoli, ali uno Yoswa wosile.

¹⁴ Aina Izlaeli iyasampa ivintu vyonsi ivyali mu misumba ii kumwi ni viteekwa, lelo antu yene iyayakoma yonsi pyu, ukwaula ukusya nanti wenga umupuma.

¹⁵ Wakwe vino Yawe wapeezile ilamulo lyakwe kuli Mose, avili vino Mose wapeezile ilamulo kuli Yoswa nga Yoswa acita vivyo kwene. Apa malamulo yonsi yano Mose wamupeezile pasi ilamulo ilitafikiliziwe.

Impanga ino Yoswa waposile

¹⁶ Avili vino Yoswa waposile impanga yonsi, impanga ya myamba, impanga yonsi iya Negebu, impanga yonsi iya Gosyeni, imisana ya twamba yaku uwondaka, impanga ya Alaba, nga ni mpanga ya ina Izlaeli ya myamba ni misana yakweyo,

¹⁷ ukufuma ku Mwamba wa Halaki, ukukwela ukuya ku Seili, nu kufika ku Baali Gadi mu Cifoloma ca Lebanoni apisika lya Mwamba wa Helimoni. Alema yamwene yao yonsi nu kuyakoma.

¹⁸ Yoswa alwisyanya na yamwene yaa yonsi pa nsita ntali.

¹⁹ Kutali amu musumba wao nanti onga yano yacisile cipangano ca mutende na ina Izlaeli, suka sile aina Hivi yano yikalanga mu Gibyoni. Asyala yonsi yayacimvizye mu nkondo.

²⁰ Cali ipange lyakwe Yawe kuti antu yalya yakomye imyenzo yao yacite ulwi na ina Izlaeli, pakuti wene ayalovye yonsi pyu ukwaula uluse, wakwe vino Yawe wapeezile ilamulo kuli Mose.

²¹ Pa nsita ilya Yoswa apita aya aonona aina Anaki yonsi pyu mu mpanga ya myamba: ukutandikila ku Hebuloni, ku Debili nu ku Anabu, nu ku mpanga ya myamba yakwe Yuda, ni mpanga ya myamba iya ina Izlaeli, ala akuyonona yonsi pyu kumwi ni misumba yao.

²² Kutali umwina Anaki uwasile mu mpanga yonsi iya ina Izlaeli, suka sile mu Gaza, mu Gati, nu mu Asyidodi.

²³ Acino Yoswa atoola impanga ilya yonsi, wakwe vino Yawe wapeezile ilamulo kuli Mose, nga aipeela ukuya icaupyanyi ku ina Izlaeli ukulingana ni mendela zya mitundu yao. Caleka mumu antu iyakwata upemwilo ku ulwi.