Yoswa 10 - Amazwi Yakwe Leza 2013

Aina Izlaeli yacimvya aina Amoli

¹ Adonizedeki umwene waku Yelusalemu auvwa ukuti Yoswa watapokolola nu konona umusumba wa Ai, nga nu kucitila umwene waku Ai vino wacitile umusumba wa Yeliko nu mwene wauko. Nga nupya auvwa ukuti aikazi amu Gibyoni yatiyacita cipangano ca mutende na ina Izlaeli nu kuti yakwikala pipi na aliyo.

² Apakuvwa vivyo aina Yelusalemu iciyasakamika sana, pamulandu wakuti Gibyoni wali umusumba ukulu wa musumba wakwisano. Wene wali ukulu ukuluta umusumba wa Ai nga na onsi akweneko yali ivita ivyampomvu.

³ Acino Adonizedeki umwene waku Yelusalemu atuma amazwi ya kuli Hoamu umwene waku Hebuloni, na kuli Pilamu umwene waku Yalamuti, na kuli Yafiya umwene waku Lakisyi nga na kuli Debili umwene waku Egiloni, ati,

⁴ “Izini kuno mungazwe ukulwisya aina Gibyoni, pamulandu wakuti yatiyacita upangano wa mutende na Yoswa nga na ina Izlaeli.”

⁵ Lyene yamwene yalya yasano ya ina Amoli, umwene waku Yelusalemu, nu waku Hebuloni, nu waku Yalamuti, nu waku Lakisyi nu waku Egiloni iyuminkanya ivita vyao. Alino iyakatusya vita vyao vyonsi iyaya iyateyamila ku musumba wa Gibyoni nga iyauzanza.

⁶ Lyene aina Gibyoni iyatuma inkombe kuli Yoswa mu nsakwe ku Giligali yati, “Mutezya kutazyela aomvi inu. Lelo izini kuno zuwa mututuule! Izini mutwazwe, pamulandu wakuti yamwene ya ina Amoli ukufuma mu mpanga ya myamba yatiyuminkanya ivita vyao kuti yatulwisye.”

⁷ Acino Yoswa pamwi ni vita vyakwe vyonsi, ukwikapo na asilika yakwe yonsi azwangane, iyatandika ulendo ukufuma ku Giligali.

⁸ Yawe anena Yoswa ati, “Utayoopa awe, pasi pano natinjapeela mu makasa yako. Kusi umwi munoyali amakuposya.”

⁹ Pacisila ca kupita usiku onsi ukufuma ku Giligali, Yoswa ayapumikizya pa kuyazanza.

¹⁰ Yawe nawe ayalenga ukupamviwa nu kuzakantika pa manso ya ina Izlaeli, yao ayacimvizye apa kuyakomola cipezya amano ku Gibyoni. Aina Izlaeli nayo iyayacocovya mu museo uwaya ku Beti Holoni nga iyayakomola nzila yonsi ukufika ku Azeka nu ku Makeda.

¹¹ Lino aina Amoli yakuutuka aina Izlaeli mu museo ukufuma ku Beti Holoni ukutentemukila ku Azeka, Yawe ayaponyezya imvula ya mawe, nga yao afwile ku mvula ya mawe yavuzile ukuluta yao akomilwe na ina Izlaeli.

¹² Pa wanda uno Yawe wapile aina Amoli mu makasa ya ina Izlaeli, Yoswa wavwanzile kuli Yawe. Pa manso ya ina Izlaeli avwanga ati, “We lanzi, imilila papela ka Gibyoni, na we mwezi, imilila papela ka Cifoloma ca Aiyaloni.”

¹³ Acino ilanzi ilimilila sika, umwezi nao utatazile usele, mpaka aina Izlaeli iyamala ukukoma anisi yao, wakwe vino calembwa mu Lupapulo lwakwe Yasyali. Ilanzi lyaimi apakasi ka mutwe nga ilicelwa ukuwa pipi nu kusila kwa wanda onsi.

¹⁴ Kutatala kwaloleka uwanda wakwe uu ukutandika sile ku mpiti nanti pa manda alondelile kuno Yawe uvwila umuntu. Mucumi Yawe uwalwilanga aina Izlaeli!

¹⁵ Lyene Yoswa aswilila pamwi na ina Izlaeli yonsi ku nsakwe ku Giligali.

Yoswa walema yamwene yasano ya ina Amoli

¹⁶ Lyene yamwene yalya yasano aina Amoli iyutuka nga iyaya iyafisama umwi cele ku Makeda.

¹⁷ Lino Yoswa yamunena ukuti yamwene yalya yasano yatiyayazana yafisime umwi cele ku Makeda,

¹⁸ avwanga ati, “Kunkulusini vimawe vikulu mufundikile pa mulyango wi cele, nga mwikeko na yamalonda kuti yalonda penepo.

¹⁹ Lelo mwemo mutaezya ukusyala papa. Twalililini kucocovya anisi inu, muyazanze lwa kucisila nupya mutayata yafike ku misumba yao, pasi pano Yawe Leza winu watayapeela mu makasa inu.”

²⁰ Acino Yoswa na ina Izlaeli iyakomola antu yalya yonsi, suka sile yanono autukile mu misumba yao iyamalinga.

²¹ Lyene ivita vyonsi iviswilila kuli Yoswa mu nsakwe ku Makeda ukwaula kuzanzwa. Kutali umuntu nanti wenga uwamu mpanga ilya uwacisile kasokonda ku ina Izlaeli.

²² Alino Yoswa apeela antu yakwe ilamulo ati, “Sisini vimawe pa mulyango wi cele nga mulete yamwene yalya yasano kunondi.”

²³ Acino iyafumya yamwene yalya yasano mwi cele, umwene waku Yelusalemu, nu waku Hebuloni, nu waku Yalamuti, nu waku Lakisyi, nu waku Egiloni.

²⁴ Lino yaleta yamwene ya kuli Yoswa, nawe aama aonsi yonsi aina Izlaeli nga anena yamusika akalamba ya vita aizile nawe ati, “Izini kuno mulyate insingo zyakwe yamwene ya.” Acino nayo iyacita vivyo kwene.

²⁵ Alino Yoswa anena yamusika yalya ati, “Mutuvwa intete nanti ukutonsiwa. Posyini nupya muzyansye. Pano avili vino Yawe alacitila anisi inu yonsi yano mulalwisya.”

²⁶ Lyene Yoswa akoma yamwene yalya yasano nu kuyakulikila ku miti isano, akuno iyalelemba ukufika na lino ilanzi lyawa.

²⁷ Nga lino ilanzi lyawa Yoswa apeela ilamulo nga iyisya yamwene yalya nu kusumbila ivyala vyao umwi cele muno yafisime ilya nkolelo. Apa mulyango wi cele iyatulikapo umufuli wa mawe, yano yacilipo na pilelo kwene.

Yoswa wapokolola impanga nayuze iya ina Amoli

²⁸ Pa wanda uli umwi kwene Yoswa apokolola umusumba wa Makeda nga akomola aikazi ya mwenemo yonsi pyu kumwi nu mwene wauko. Atasile umuntu nanti umwi umupuma. Wene wacitile umwene waku Makeda wakwe vino wacitile umwene waku Yeliko.

²⁹ Lyene Yoswa pamwi na ina Izlaeli yonsi iyafuma ku musumba wa Makeda iyaya ku musumba wa Libina nga iyauzanza.

³⁰ Yawe wapile na aikazi kwene amu musumba uu kumwi nu mwene wauko mu makasa ya ina Izlaeli. Nga Yoswa akomola aikazi ya mwenemo yonsi. Atasile umuntu nanti umwi umupuma. Wacitile umwene wa musumba ulya wakwe vino wacitile umwene wa musumba wa Yeliko.

³¹ Pacisila cakwe cii, Yoswa na ina Izlaeli yonsi iyafuma ku musumba wa Libina iyaya ku musumba wa Lakisyi nga iyateyamila nu kuuzanza.

³² Yawe apeela umusumba wa Lakisyi mu makasa ya ina Izlaeli, nga pa wanda wakwe ciili Yoswa apokolola umusumba ulya nu kukomola wensi uwali mwenemo, wakwe vino wacitile umusumba wa Libina.

³³ Pa nsita kwene ilya, walanga Holamu umwene waku Gezeli wataiza ku kwazwilizya aina Lakisyi. Lelo Yoswa amucimvya kumwi ni vita vyakwe, cakuti atasile umuntu nanti wenga umupuma.

³⁴ Lyene Yoswa na ina Izlaeli yonsi iyafuma ku musumba wa Lakisyi iyaya ku musumba wa Egiloni. Alino iyateyamila nu kuuzanza.

³⁵ Iyapoka umusumba mu wanda kwene ulya nga iyakomola nu kulovya yonsi aikalanga mwenemo, wakwe vino yacitile umusumba wa Lakisyi.

³⁶ Lyene Yoswa na ina Izlaeli yonsi iyafuma ku musumba wa Egiloni iyaya ku musumba wa Hebuloni nga iyauzanza.

³⁷ Iyapokolola umusumba ulya nu kukomola aikazi ya mwenemo kumwi nu mwene, na aikazi yonsi amu mizi yakweo. Yatasile umuntu nanti umwi umupuma. Wakwe vino cali ku musumba wa Egiloni, avino yacitile nu musumba ulya.

³⁸ Alino Yoswa kumwi na ina Izlaeli yonsi iyasenuka nga yazanza umusumba wa Debili.

³⁹ Iyapokolola umusumba, nu mwene nga ni mizi yakweo, nga iyakomola aikazi ya mwenemo. Yatasile umuntu nanti umwi umupuma. Yacitile umusumba wa Debili nu mwene wauko wakwe vino yacitile umusumba wa Hebuloni nu wa Libina nu mwene wauko.

⁴⁰ Acino Yoswa acimvya impanga ilya yonsi, ukwika kumwi ni mpanga ya myamba, ni ya Negebu, ni misana ya twamba yaku uwondaka, ni mitentemuko ya myamba, kumwi na yamwene yonsi. Atasile umuntu nanti umwi umupuma. Wene wononyile consi icikafuta, wakwe vino Yawe, Leza wa ina Izlaeli wapile ilamulo.

⁴¹ Yoswa ayacimvya ukutandikila ku Kadesyi Banea ukufika nu ku Gaza nga nu kutandikila ku mpanga yonsi iya Gosyeni ukufika nu ku Gibyoni.

⁴² Yoswa wacimvizye yamwene yaa yonsi ni mpanga yao pa nsita ili yonga, pamulandu wakuti Yawe, Leza wa ina Izlaeli walwisizyanga aina Izlaeli.

⁴³ Lyene Yoswa aswilila pamwi na ina Izlaeli yonsi ku nsakwe zyao ku Giligali.