Yoswa 1 - Amazwi Yakwe Leza 2013

Leza wacincizya Mose ukutoola impanga ya Kenani

¹ Pacisila ca mfwa yakwe Mose umuomvi wakwe Yawe, Yawe alanda na Yoswa umwana umonsi wakwe Nuni, wiyo uwali kazwa wakwe Mose, ati,

² “Mose umuomvi wane watafwa. Katuka fwandi lamba Luzi luu lwa Yodani, wewe pamwi na ina Izlaeli yonsi, mwingile nu mu mpanga ino namamupeela.

³ Wakwe vino nalavile Mose, inkumupeela impanga yonsi pyu ino mumapitanga mwenemo.

⁴ Impanga inu ilatandikila ku lwanga ku kaeya ukufika nu ku Myamba ya Lebanoni mpaka nu ku Luzi lwa Yufulate alino nu kwiza senuka ku mpanga yonsi iya ina Hiti mpaka nu kwizasinta kuli Yemba wa Adiliya, yonsi ii ilaya impanga inu.

⁵ Kusi umuntu nanti wenga alakucimvya we Yoswa, mu manda yonsi aumi wako. Vino nayanga na Mose avino namayanga nawe. Ntalatala inkusye awe, nupya ntalakutazyela foo.

⁶ Uposye nupya uzyansye. Pasi pano awewe ulalenga antu yaa ukwikala mu mpanga ino nalavile kupeela ku vikolwe vyao.

⁷ Wewe kwene ule uposye nupya uzyansye. Utekele nu kuyela amasunde yonsi yano umuomvi wane Mose wakupezile. Utakezye kutazyela isunde nanti lyonga pali yayo, nga lyene ulaya nu longo konsi kuno ulaya.

⁸ Lupapulo luu lwa masunde lulinzile lwawelengwa lyonsi lino mukupepa. Mulinzile mwalupituluka umusanya nu usiku, pakuti mutekele pakucita vyonsi vino vyalembwa mwenemo. Ndi caya vivyo, lyene mulaya nu longo nupya mutalaposiwa.

⁹ Uwaiusya lyonsi ilamulo lino natinkupeela ilya kuti uposye nupya uzyansye! Uposye nupya uzyansye, pano Yawe Leza wako amayanga nawe konsi kuno umayanga.”

Yoswa wapeela malamulo ku antu

¹⁰ Lyene Yoswa apeela ilamulo ku ntunguluzi zya ina Izlaeli ati,

¹¹ “Pitini mu nsakwe zyonsi mukanene antu muti, ‘Teyanyini iposo, pamulandu wakuti ndi papita amanda yatatu, mulalamba Luzi lwa Yodani nu kuya pokolola impanga ino Yawe Leza wamupeela kuti iye iyakwinu.’ ”

¹² Alino Yoswa anena amu mutundu wakwe Lubeni, na wakwe Gadi, nu mutundu pakasi wakwe Manase, ati,

¹³ “Mwaiusya ilamulo lino Mose muomvi wakwe Yawe wamupeezile ilyakuti Yawe Leza winu watamupeela upuzo nupya watapeela impanga ii kunomuli.

¹⁴ Acino fwandi aci inu, na ana inu, pali pamwi ni viteekwa vinu, yene yali nu kusyala kuno mbalama ku mpanga ino Mose wamupeela lwaku ufumondaka wa Luzi lwa Yodani. Lelo ivita vinu, vyonsi vino vyativiipangasya ku kulwa inkondo, vilinzile kulamba luzi lulu nu kukolelela anyonko aina Izlaeli kuti vikayazwilizye ukulwa inkondo.

¹⁵ Lino anyonko yaca yacimvya yatandika nu kwikala mu mpanga ino Yawe Leza winu alayapeela, alino lyene mulaswilila nu kuya ikala mu mpanga iyo ino Mose umuomvi wakwe Yawe wamupeela lwaku ufumondaka wa Luzi lwa Yodani.”

¹⁶ Lyene iyanena Yoswa yati, “Swemo tulacita vyonsi vino watupeela ilamulo kuti twacita, nupya na konsi kuno ulatutuma tulaya.

¹⁷ Tumakuyelanga wakwe vino twayelanga Mose lyonsi. Nupya Yawe Leza angaya nawe pee wakwe vino wali na Mose!

¹⁸ Wino wensi alatwisika amaka yako nanti kukanayela amazwi yako, cisi cimwi ilamulo lino ulayapeela, wene alakomwa. Wemo ule uposye nupya uzyansye.”