Yona 4 - Amazwi Yakwe Leza 2013

Kusoka kwakwe Yona nu Luse lwakwe Leza

¹ Lelo Yona citamuzanzizye wakwe cimwi, nga asoka.

² Acino Yona apepa kuli Yawe ati, “Iye, we Yawe, uzye ntalanzile vikwene lino nali kumwitu? Uli mulandu uno nacincile ukuutukila ku Tasisyi. Namanyile vino wewe Leza wa mizu nu wa luse, wino asisoka zuwa nupya akatemwa wakwe cimwi, Leza asisimwilila ku kuponya ivilumbelo.

³ Lyene, we Yawe, nkukulenga sileka mfwe. Canzipila ukufwa ukuluta kuti nje nu umi.”

⁴ Lelo Yawe nawe aasuka ati, “Uzye insambu cii ino kweti iyakusoka?”

⁵ Yona pali pakufuma mu musumba uo nga aya aikala pansi lwaku ufumondaka wauko. Kuku kwene akuno aipangila umutanda, aikala mu cisao cakweo nga alolela kuti alole ivimaponela umusumba ulya.

⁶ Lyene Yawe Leza amezya icimelwa nu kuleka icikula nu kupeela icisao kuli Yona kuti apemwile, nga Yona nawe azangila cimelwa cici wakwe cimwi.

⁷ Lelo apa wanda uwalondelela apa macaca Leza atuma cizizi cino yakati kulila, nga kulila nawe alya icimelwa cakuti icitandika nu kuuma.

⁸ Lyene lino ilanzi lyatunka, Leza akatusya umuza ukaye ukufuma ku ufumondaka, nga ilanzi nalyo ilyoca Yona apa mutwe cakuti afwa icipafi. Yona alonda nu kufwa, nga avwanga ati, “Canzipila ukufwa kuluta ukuya nu umi.”

⁹ Lelo Leza anena Yona ati, “Uzye ukweti insambu yakusoka pamulandu wa cimelwa?” Yona nawe aasuka ati, “Endi, nkweti nsambu, nupya nene musoke cakuti cinganzipila nu kufwa.”

¹⁰ Lelo Yawe anena Yona ati, “Icimelwa cii calicamela nu kukula mu usiku onga kwene. Lelo wemo cakusakamika uli apamulandu wa cimelwa cii, nanti angala utacicitile akantu nanti kamwi nanti ukucikuzya!

¹¹ Uzye nemo ntange njele umusumba ukulu wa Ninive uluse? Mu musumba kwene ulya muli ana anono 120,000 yao akaele, nga ni viteekwa vivule cuze!”