Yona 3 - Amazwi Yakwe Leza 2013

Yona wazumila kuya ku Ninive

¹ Lyene Yawe anena Yona iila lyakwe ciili ati,

² “Katuka, uye ku musumba ukulu uwa Ninive nga ukakosole ilandwe lino nkukupeela ku antu aikala mwenemo.”

³ Yona pali pakuyela Yawe nga akatuka aya ku musumba ukulu uwa Ninive. Musumba ulya uwa Ninive wali ukulu wakwe cimwi, cakuti casendanga amanda makulu yatatu ukupita ukusalala mwenemo.

⁴ Yona aingila mu musumba ulya nga atandika ukupita mwenemo. Akosola ilandwe ati, “Kwasyala amanda nayauze amakumi yani kuti umusumba uwa Ninive ononwe.”

⁵ Antu amu Ninive yataile Leza. Alino iyuma imbila kuti umuntu ali wensi ate ukulya, nga antu yonsi kwene, ukutandika pa mukulu mpaka ukufika na pa munono kwene, iyazwala vyakuzwala vyakulanga ulanda.

⁶ Lino umwene waku Ninive uvwa ivintu vii, akatuka nu kufuma pa cilimba cakwe ca wene, azula nu mwingila wakwe uwa wene, nga azwala ni cakuzwala cakwe cakulanga ulanda nga aikala nu mulutukumbu.

⁷ Lyene atuma antu akuya uma imbila mu Ninive, yati, “Lii, ilili lamulo lya mwene ni vilolo vyakwe: ‘Muntu ali wensi atezya ukulya akantu kali konsi, ni nyama kwene zikulu ni zinono zitacita cico. Mutaleka zilye akantu akali konsi nanti ukumwa amanzi.

⁸ Antu yalinzile ukuzwala vyakuzwala vyakulanga ulanda nga ni nyama nazyo muzivimbe ni vyakuzwala kwene vivyo. Cila muntu alinzile apimpe ukupepa kuli Leza. Endi, umuntu ali wensi alinzile ukuta imisango yakwe ya nkota kumwi ni vicitwa vyakwe viipe.

⁹ Nalimwi Leza angasenula ipange lyakwe, nga nu luse azusye ukali wakwe ukulu pakuti tutalowa.’ ”

¹⁰ Lyene lino Leza walola vino antu yacita na vino yazenzwike uku misango yao yankota, aya na mizu kunoyali nga atayaponyezizye uwononesi uno walanzile ukuti alayaponyezya.