Yona 2 - Amazwi Yakwe Leza 2013

Ipepo lyakwe Yona

¹ Lino Yona acili munda ya ciluswi cici, atandika kupepa kuli Yawe. Avwanga ati,

² “We Yawe, lino nali muntazi nakuusile kunuli, nga nawe ungasuka. Lino nali kuzimo napunzile kunuli kuti ungazwe, nga nawe uuvwa ipepo lyane.

³ Wemo wamvwinsile api tenga, papa kwene apazike pali yemba, nga nu mukuku iunzinguluka, na maimbi akulu yapita papela kakwe nene.

⁴ Alino inelenganya inti, ‘Nasukulwa kunuli, nupya ntalatala ndole Ng'anda yako ikulu yamuzilo.’

⁵ Manzi yankufile cakuti mfeneka. Yemba antuwizya, nga lusinye nawe ampomba uku mutwe.

⁶ Intuwila mpaka ukufika pa visinte vya myamba, imfika nu kuzimo kuno nayalilwe umu mbali zyonsi umuyayaya. Lelo wemo, we Yawe Leza wane, wamfumizye umumi mu ciwina.

⁷ Lino naweni ukuti imfwa yanunka, niwisye wewe, we Yawe, mpepa kunuli nga nawe unguvwa mumo umu Ng'anda yako ikulu yamuzilo.

⁸ Antu akapepa utuluwi tuleza utwasilesile yaponzya icikuku cako.

⁹ Lelo nemo namapela impolelwa kunuli apa kukutaizya umu nyimbo. Ndafikilizya vino nalaya nu mulapo. Ufyusi ukafuma kunuli we Yawe.”

¹⁰ Alino Yawe apeela ilamulo ku ciluswi cici kuti ciluke Yona apa cituntu pa musili ume, nga naco icicita vivyo kwene.