Yona 1 - Amazwi Yakwe Leza 2013

Yona wakana ukuyela Yawe

¹ Uwanda umwi Yawe avwanga kuli Yona umwana wakwe Amitai.

² Amunena ati, “Yanga ku Ninive, umusumba ulya ukulu, ukasoke aikazi yakweneko pamulandu wakuti nalola ukakasi wao.”

³ Lelo Yona autuka ukufuma ukwali Yawe nga alungama ku Tasyisyi. Alino atentemukila ku Yopa, kuno waile azana icombo icali palwendo lwakuya ku Tasyisyi. Lyene akala itikiti nga akwela mu combo cici, alino apita kulungama ku Tasyisyi kuti autuke Yawe.

⁴ Lyene Yawe akatusya umuza ukome sana pali Yemba, nga ikuya icipupu icakuti icombo cali pipi nu kononeka.

⁵ Yonsi ali pa lwendo umu combo yuvwile intete nga cila muntu apepa kuli leza wakwe. Lyene yasumbila iviya muli yemba kuti icombo cangupale. Lelo walanga Yona wataingila mu muputule wa pansi mu combo, mumo muno waile alambalala nga akasula utulo.

⁶ Ciinda wa combo aya kunoli, nga amunena ati, “Uzye ungakasula uli? Katuka upepe kuli leza wako! Limwi amatusumbako amano kuti lyene tutaundwa.”

⁷ Lyene alendo ali mu combo yavwanzyanya yati, “Tuyini tupendole kuti tumanye uwatatuletelela umupamba uu.” Alino yapendola, nga cilema Yona.

⁸ Acino yamuzya yati, “Tunene, uzye aweni uwatatuletelela intazi ii? Uzye wizile omba cani kuno? Uzye aukwi kuno wafuma? Uzye wewe wa luko ululi kwi?”

⁹ Nawe aasuka ati, “Nene Muyebulai nga nkapepa Yawe, Leza wa mwiyulu, uwaumvile yayemba ni mpanga kwene ii.”

¹⁰ Alino Yona atwalilila kuyanena ukuti wene akwezya ukuutuka ku cinso cakwe Yawe. Alendo yaya apakuvwa vivyo iyaya ni ntete wakwe cimwi, nga yamuzya yati, “Lyene fwandi watucita cani?” Yene yamanyile ukuti akwezya ukuutuka ku cinso cakwe Yawe, pasi pano walanga watayanena mpiti umulandu uu.

¹¹ Cipupu icitwalilila ukukoma pali yemba. Caleka yamuzya yati, “Uzye tucite cani kunuli pakuti yemba alale aye mya?”

¹² Yona nawe ayaasuka ati, “Nyemulini nga munsumbile muli yemba. Lyene yemba amalala aye mya. Manyile ukuti nene natindenga kuti muye mu ntanzi ya cipupu cii cikulu.”

¹³ Nanti cali vivyo, antu yalya yezya na maka yao yonsi ukupisya icombo kuti yawelele ku cituntu. Lelo yaposiwa, pamulandu wakuti icipupu cilunduluka ukukoma.

¹⁴ Lyene yapepa kuli Yawe, yati, “Iye we Yawe, twapapata utaleka tufwe pamulandu wakukoma umuntu wi. Utaleka tuye amulandu pa kukoma umuntu wi uwakaele, pasi pano we Yawe watucita icakukuzanzya.”

¹⁵ Lyene yanyemula Yona nga yamusumbila muli yemba, nga lilyo kwene yemba amyalala aya mya.

¹⁶ Apa kulola vii alendo yalya yoopa Yawe, nga yapela impolelwa kuli Yawe nu kulapa imilapo kunoli iyakumutumikila.

¹⁷ Lelo Yawe aleta iciluswi icikulu kuti cimile Yona, nga lino camumila, Yona watenzi munda ya ciswi amanda yatatu, musanya nu usiku.