Yobo 9 - Amazwi Yakwe Leza 2013

Yobo

¹ Lyene Yobo aasuka ati,

² “Ica cumi, umuntu nacacendi, angaya uli uwakaele lino akupingwilwa umulandu kuli Leza?

³ Umwi ndi camukulama wati kapele Leza umulandu, Leza angamuzya amauzyo yamwi acipezya mano, yano angaposiwa ukwasuka.

⁴ Icumi Leza uwamano, nga na maka yakwe nayo akalamba. Antu yayo amutalamila, ala yailetelela sile.

⁵ Leza umweneco akatenula imyamba, ukwaula ukuti iyeneco imanye nu kumanya. Akaipenola ndi cakuti wasoka.

⁶ Akaleta ivilundumusi ivyakuti ivisunkanya insi, nu kuleka ukuti pano yikalila pansi patente nu kutenta.

⁷ Leza angapeela ilamulo kwi lanzi kuti litatunka, nu kuvimba apa ntanda kuti zitawala.

⁸ A Leza sile wenga mpo uwanzike iyulu, nu kulyatilila pa maimbi akalamba apali yemba.

⁹ Aliwe kwene wenga mpo uwapanzile intanda, zizi izikaloleka zitantime, izikaamwa Bea ni zikaamwa Olioni, ni zikaamwa Pileyadi nga ni zya kwikasa lyakwe ndilo uwa ufumondaka.

¹⁰ Tungaposiwa ukuvwa ukulu wa vintu vino Leza wacita. Ivipezya amano vino wacita, tutangakumamo uku vipenda.

¹¹ Endi, lino Leza wapita apipi na panondi, nemo ntangemulole. Lino wapita panondi, nemo ntange ndooke.

¹² Ndi wene wiza umu kutoola vino akulonda, uzye aweni angamulesya? Kusi nanta umwi angamuzya ati, ‘Uzye icani cino wacitila vii?’

¹³ Ukali wakwe Leza usiwelela icisila. Mulole sile vino wononyile anisi yaya yano yavwananga na Laabu, icilyanyi iciipe capali yemba cici.

¹⁴ Uzye lyene nemo ningaasukana uli na Leza? Amazwi cii yano ningavwanga pakupazyanya nawe?

¹⁵ Nanti ningaya uwakaele, nemo ntange naasukane na Leza. Ndinzile ukulenga sile uwelelo kuli kapingula wane.

¹⁶ Nanti sile ningamwama nga nawe azumile ukwiza, nemo ntasininkizye ndi cakuti akuuvwa navino nkulanda.

¹⁷ Pasi pano wene akampamola na mawe ya mvula, nu kunkwavulula ukwaula umulandu.

¹⁸ Asimpela na kasita akakuti impemwile, lyonsi sile umu umi wane akandundila ukucululuka.

¹⁹ Ndi nati nezye ukufundumala, owe Leza wene uwamaka! Uzye ntwale Leza uku cilye tukalolozyanye? Awe cumi nga amamutwala kweneko aweni!

²⁰ Nemo nanti sile ningaya uwakaele, lelo imivwangile yane kwene iliyo ingaya ikansinile ukuti indi nu mulandu. Nanti ningaya uwaula umulandu, imivwangile yane ingampela umulandu.

²¹ Kwene nemo ningati nene wakaele. Lelo cico citansakamike, pano nu umi wane kwene ntausakamile.

²² Ali cico kwene cino nkulukuvwanga inti, ‘Leza akaonona antu akaele kumwi na aipe.’

²³ Lino umuntu wakaele wafwa ku cinkunka mu kupumikizya, Leza wene akaseka ukupelelwa kwa muntu wakaele.

²⁴ Lino Leza wafumbatika insi umu makasa ya antu aipe, wene akavimba yakapingula ya milandu apa manso. Ndi cakuti asi aliwe uwacita vivyo, uzye lyene tumati aweni?

²⁵ “Amanda yane yakulu kupita ulwilo. Yakulu kupita ukwaula nu kuti nemo insansamuke.

²⁶ Yakusimula sile wa mato uku lwilo, kwati a lyang'anda akulonda ukuswelula ka kalulu.

²⁷ Ndi nelenganya nati, ‘Manye kante sile uku ilizyanya, imwentule nu kulanga insansa apa manso.’

²⁸ Awe nalyo kwene intete izindema apa kwelenganya ucuzi wane onsi, pasi pano manyile ukuti Leza wanzana nu mulandu.

²⁹ Fwandi pano Leza wanzana nu mulandu, kusi nanti cimwi cino ningacita penepo.

³⁰ Kutange kuloleke sopo uwakufula amaifyo yane.

³¹ Pasi pano wewe we Leza ungantuwizya muli polowe uwa usali, icakuti ni vyakuzwala vyane vinunke na nuu.

³² Ica cumi Leza asi muntu unji, uwakuti twapazyanya nawe nu kutwalana numu vilye.

³³ Kutange kuloleke umuntu uwakututaasya, wino akweti amaka pali nene na Leza.

³⁴ Kusi umuntu nanti wenga angalesyanya ukuti Leza amvunuke, apakuti ate nu kungoofya.

³⁵ Lelo kwene nemo inkuivwangila apalwane ukwaula ukumoopa, pano natimanya vino umwenzo wane uli.”