Yobo 8 - Amazwi Yakwe Leza 2013

Bilidadi

¹ Lyene Bilidadi umwina Syuwa aasuka ati,

² “Uzye we Yobo ulata lilaci ukuvwanga icili cimwi kwene? Amazwi yako yaa yakupita ungati cipunga.

³ Uzye Leza angakana uli ukucita ivilungame? Uzye Leza Wamaka yonsi angayonganika ivilungame?

⁴ Ana yako yacisile ivitalungime kuli Leza. Fwandi Leza nawe ali pakuyasunda ukulingana nu kwifya kwao.

⁵ Lelo wemo ule usenukile kuli Leza, nu kupapata Leza Wamaka yonsi.

⁶ Nga ndi cakuti wewe wakaele nupya kacita wa vyaololoke, ale lyene wene amakutemwa, nu kukuwezezya ing'anda yako wa cilambu cako.

⁷ Ivyuma vyako vyonsi vino vyononike, vitalatala vilingane navino ulakwata uku nkolelo.

⁸ “Tala elenganya apa nkulo izyakukolelile. Ulondelezye ivintu vino ivikolwe vitu vyasambilile.

⁹ Umazana ukuti swe ana yao tutange tukume nako. Umi witu pano nsi ukapita sile wa cinzingwa.

¹⁰ Kwene leka sile ivikolwe vyampiti vikusambilizye pali cico. Wemo kutikila sile, uuvwe vino vikukusunda.

¹¹ “Vikuti, uzye amatete yakamela apasi ulutikiti? Nanti uzye yakamela apasi amanzi?

¹² Amanzi yakati nga yapwa, amatete ali yano yakatandikilapo ukufoota. Ala yatacili yafike na pa nsita ya kukomwa, ukuyasanta nu kuyaomvya.

¹³ Vivyo ivikaya ni mpela ya antu atamanya Leza. Ali vino nu upaalilo wao ukasila, ndi cakuti yilila kuli Leza.

¹⁴ Cino yatailamo icintu icisi cikome, na cino yasintililamo cili wakwe tandaulwe.

¹⁵ Nga cakuti angasamilizya uku tuusavu twakwe tandaulwe, uzye twene tungamutungilila? Nanti umuntu ndi wanyinyinda kweneko, uzye twene tungamwazwa azyansye?

¹⁶ Ala antu aipe yakoline na kalolo akakulila apa kasanya, yene yakoline ni vikona ivya salanganila umu calo consi pyu.

¹⁷ Imisisi yakwe kalolo ikapombelezya uku mutumba wa mawe, nga iyandatila uku mawe kwene yayo.

¹⁸ Lyene kalolo wiyo ndi cakuti wamwipa, kusi nanti wenga angiza amanye ukuti wali paa.

¹⁹ Avivyo kwene, nu kuolela akasuka aolela umu mbali ya nzila. Nu mu musili muno wali imwiza mumelelapo navyuze.

²⁰ “Ali cino fwandi yame Yobo ucimanye ukuti Leza asyatazyela antu yakwe akayele. Nupya asyalonda yakacita ya viipe.

²¹ Umweneco alalenga ukuti uce uwasekaseka nu kulya uku nkolelo. Nawe kwene pano uli papo ulaumila nu tupundu.

²² Alino yao akupata alayaletela insonyi. Na mang'anda yakwe yakacita ya viipe yalalowa.”