Yobo 7 - Amazwi Yakwe Leza 2013

¹ “Ala umi wa muntu pano nsi waya wa mulimo wakupatikizya sile. Na manda yakwe yaya wa manda ya muntu uwalembwa incito ya cibaluwa.

² Ndi vino caya umuomvi akakumbwa ukwikala umu cisao, ala akulolela ukufola amalipilo yakwe,

³ ali vino nani apa myenzi nyanya nafutokelanga sile ukwaula nanti cimwi. Cila usiku nacululukanga sile.

⁴ Ndi nasendama apa musanzi wane, nkatandika nu kuyuzya inti, ‘Kumaca lilaci?’ Nanti usiku utalimpe impunga uca, nemo inalukusalakata sile suka uca.

⁵ Umwili wane uzile ingonyo zitupu, wene usapatuke uku mamba wakwe cimwi. Alino ufila wene ukuzwa umu vilonda.

⁶ Amanda yakusimula ukuluta navino icipikwilo cansalu cikapita. Yakupita ulwilo ukwaula nanti ukumpeela upaalilo.

⁷ “Owe Mwe! We Leza wane sungala wiusye ukuti umi wane ukoline nu mupu. Nemo ntalatala ndole uluzango nupya.

⁸ Namwe mwemuno mukundola pali ndakai mutalatala mundole nupya. Mulalonda ukundola, lelo nemo ntalaya penepo.

⁹ Vivi kwene vino mukalola ikumbi kuno lyasalangana nu kupita, ali vino nu muntu akaya uku mpanga ya afwe nawe aililila.

¹⁰ Atangatale aweluluke nupya uku ng'anda yakwe, ni cifulo cakwe kwene cilamwilila.

¹¹ Ali cino fwandi nemo intangentale intuzye foo! Nene musoke sana nu kusasila nene musasile, nga nkuilizyanya pano nkunyunguluka mu umi wane.

¹² We Leza, uzye pacani cino wampeelela uwakuti ansopa nu kumbakilila? Uzye nene yemba nanti cilyanyi ca muli Yemba?

¹³ Nga nalala apa citala pakuti inezye ukusempula tumwi, nkalonda ukupemwila ku kucula kwane.

¹⁴ Lelo wemo ukungofya uku viloto. Ukandanga ivilolwa vimwi ivyakumpelenganya,

¹⁵ cakuti ningakumbwa ukumalilika ku tulo nu kufwa, ukuluta ukucula wakwe vii mu mwili uu.

¹⁶ Nemo napata umi wane, nsilonda ukwikalilila pano nsi. Ntiini pano amanda yane yali sile wa mupu.

¹⁷ Uzye lyene umuntu uwacani kuli wewe, pakuti wamusumbako amano nu kumucindamika?

¹⁸ Cila katondo ukamupeketa, nu kumwezya cila nsita.

¹⁹ Uzye alilaci lino ulata ukumpeketa, apakuti ince namila nanti amati pakasita sile kanono?

²⁰ Nanti limwi ndi cakuti nakwifya sana, apo wewe uli kangalila wa anyepwe, icani cino ungansolola ukuya wa candamali cako? Uzye kwene nene ningaya wa cisendo icakukutitikizya?

²¹ Uzye kwene utange unjeleko uluse apakukwifya kuno nakwifya, nanti usule sile kuli vino nakuluvyanya? Ala nemo nasya mfwe yanzike nu kunzika. Ulandonda, lelo nemo ntalayapo.”