Yobo 6 - Amazwi Yakwe Leza 2013

Yobo

¹ “Lyene Yobo aasuka ati,

² Iyee! Ala ndi cakuti ulanda wane wali uwakupimwa, pamwi na macuzi yane yapimilwe pa cipimo,

³ vinganyoma ukuluta umusensenga uwamu nkumba yakwe yemba. Acino ukuzaila kwane kutange kuzungule mwemwe.

⁴ Leza Wamaka yonsi aliwe wandasola inceto, alino nu usungu waziko wasatila umu mwili wane monsi pyu. Vyonsi vino Leza akaofezya antu vyati vinzinguluka.

⁵ Uzye colwa akalila lino akulya isote? Nanti uzye ing'ombe isiikala cele lilyo lino ikulya umulemvwe?

⁶ Uzye umuntu wene angalya icakulya icaula umusilya? Nanti uzye mwaya umulyo mu cipande citiswe ici yayi?

⁷ Nemo ntakweti inzala yakulya vyakulya vya musango uwo. Vyakulya vya musango uwo vikandetela umuselu.

⁸ “Owe mwe! Ndi cakuti cikayela, si Leza kale ampeele vino nkulenga umu wanda wilelo.

⁹ Nemo nkuti kale Leza ansyunole sile. Angala atoole ikasa lyakwe ale amalile cile cisile sile!

¹⁰ Ndi imanya ukuti ali vino amacita, lyene ningalinduka ilimba ku nsansa, nanti cingaya cakuti ucuzi wane wakulisya. Manyile ukuti Leza uwamuzilo, nupya nemo nsimusangukila.

¹¹ Uzye nemo ncikweti amaka akuzizimizya ukwikala pano nsi? Uzye uyo cii uno nemo nkulolela apakuti nteeke umwenzo?

¹² Uzye nemo napangilwa na mawe? Uzye umwili wane wakoma wa mukuwa?

¹³ Cumi kwene amaka muli nene yatiyasila yonsi pyu akuti ningayazwilizya nemwisikulu, pano kusi kuno ningaya ku kwazwiliziwa.

¹⁴ “Ala lino indi mu ucuzi wakwe uu, nkutaila ukukwata ivyuza vyampomvu, cisi cimwi nanti indi ni misuuli kuli Leza Wamaka yonsi nanti foo.

¹⁵ Lelo mwemo mwatimunsomba wa mukuku wa manzi mu tunguzi, tuto utukapwa lino icisiku casila.

¹⁶ Amanzi yamwenemo yakaya avundokele, pano yene yakafuma uku mawe ya mvula ndi yasunguluka.

¹⁷ Lelo ndi caya icisanya yata ukukonkoloka, iyapwa nu kupwa pamulandu wa cipuki.

¹⁸ Imilongo ya alendo ikapaaluka kuti yezye ukulonda ukuli amanzi, yalulumba nu kufwila yafwila umu lwanga.

¹⁹ Imilongo ya alendo ukufuma uku Tema ikalondesya ukuli amanzi, imilongo ya aculuzi aku Syeba ikapaalila ukuyazana.

²⁰ Lelo ukupaalila kwako ukwa kuicuzya sile, pano yakati ndi yafika kweneko iyazana amanzi yapwa.

²¹ Fwandi namwe kwene avino muli kunondi mwe yacuza yane. Mukati ndi mwalola ucuzi wane uwakoofya imuuvwa intete.

²² Uzye natala imulenga uwila umwi inti, ‘Mpelini cakuti na cakuti,’ nanti inti, ‘Mpelelini amafukakanwa nanti caukuluzi apa vyuma vinu?’

²³ Nanti uzye natala mvwanga inti, ‘Untuule uku minwe ya mwanisi,’ nanti inti, ‘Umpususye kuli yayo akunzunya.’

²⁴ Mwemo mule munsunde sile, nga namaikala cele. Nenini vino mwalola ukuti naponga.

²⁵ Imivwangile umuli amano yene ikasinila. Lelo ukunenola kwinu ukwa kuzamba kungangazwa cani?

²⁶ Uzye mwemo mukulola kwati nkulanda ivyacilandelande? Nu kuleka amazwi ya muntu uwapelembekelwa yuluke wakwe nkungulupya.

²⁷ Mwemo mungapendola apa mwana musyale, nu kukazya umuzo.

²⁸ Mwe! Ndolesini apa manso namupapata. Uzye nemo nkutumpoka kuno muli?

²⁹ Mwacilamo sile, ale tini ukumfyenga. Mutezya ukumpela umulandu, pano nene wacumi.

³⁰ Mwemo mukutaila ukuti ncili nkutumpoka? Uzye akuli kuti ntange mpusanye iciipe ni cisuma?”