Yobo 5 - Amazwi Yakwe Leza 2013

¹ “Ale lyene, we Yobo punda. Uzye umauvwa umwi kuno wakwasuka? Uzye akuno ali umwi umungeli wino umasimwilila kweneko?

² Icikonko cikakoma umuntu iciwelewele, ulunkumbwa nalo lukafyula umuntu uwaula amano.

³ Nemwisikulu nalola iciwelewele icikaikala ningo, lelo zuwazuwa ali vino intipu zyaletelile ing'anda yakwe.

⁴ Ana yakwe iyasyala ntalwentalwe ukwaula ucingo, nu mu ng'anda ya milandu mutalolike nanti wenga, uwakuya yavwangila kweneko.

⁵ Antu ya nzala alio yalalya ni vilyo vyakwe, iyamutolela ni vyamu myunga kwene. Na antu ali nu lusala yamusampa ivyuma vyakwe.

⁶ Ala mwine uyi usifuma mu lukungu foo, nanti intazi kwene nayo isimela pa musili.

⁷ Lelo umuntu ndi wavyalwa akazana ucuzi, wakwe vino ivyunyi vikaulolelwa ukupapuka.

⁸ Ala nemo inja ali wewe, ningazina sile kuli Leza, ali wino imfuntwila umulandu wane.

⁹ Swemo tutangatezya ivintu ivikulu vino Leza akacita, nanti ukupenda ivinjelengwe vyakwe.

¹⁰ Aliwe akaleta imvula pano nsi, akasansa amanzi umu vyalo vitu.

¹¹ Wene akatumpula yayo aicefya, nu kusansamusya yayo akulilizika.

¹² Aliwe akapangulula amapange ya antu yamano, pakuti vino yakasi ukucita vitakwata uyo.

¹³ Wene akavulunganya amapange ya antu yamano, nu kulemenkezya incenjezi mu ucenjezi wao.

¹⁴ Nanti sile umusanya apakasi, yangatandika ukupulupunta kwati umu kanda.

¹⁵ Lelo Leza wene angapususya umulanda ku mfwa. Akapususya nu mupina umu minwe ya nkakasi.

¹⁶ Caleka Leza akalenga alanda ukukwata upaalilo. Alufyengo yene akayaputula umulomo.”

¹⁷ “Walongo umuntu wino Leza akakalipila. Acino we Yobo utasuula ukusunda kwakwe Leza Wamaka yonsi.

¹⁸ Pano Leza aliwe akacisa ivilonda, nu kupozya aliwe kwene wamanya ukupozya. Wene akacisa, lelo amakasa yakwe iyapozya nu kupozya.

¹⁹ Wene angakupususya amaila mutanda, ni iila lyakwe cinimbali kutalaya iciipe nanti cimwi icilakuponela.

²⁰ Umu manda ya cipowe alakutulanya kuti utafwa ni nzala, nga nu mu manda ya nkondo namo alakucingilila ku mfwa.

²¹ Leza alakutulanya ku antu ya lwambo, nupya utalaya ni ntete lyonsi lino azanzi yaliza.

²² Wemo utalaya ni ntete apa nsita ya ononesi nanti ya cipowe, nupya utaloopa ni vilyanyi kwene.

²³ Amawe ni visiki vitalaya umu vyalo vino ulalima. Inyama zya mpanga nazyo zitalakuzanza.

²⁴ Lyene ulaikala ku matwi cele umwako. Lino ulacevya imfwele zyako, ulazizana umutende.

²⁵ Nupya ulalola ukuti ana yako yasanduluka, yavyalana wakwe cimwi kwati isote lya mpanga.

²⁶ Ulafwa lino ulakotesya ni mvwi uku mutwe ale kuli naswee, kwati avino amalezi yakaca suka iyuma, ukufika napa nsita ya kusinza.

²⁷ Vyonsi vii ali vino twailolela sweisikulu ukuti ivyacumi. Ali cino fwandi wemo Yobo visumbeko amano, uvilondele, pasi pano vilakuzipila.”