Yobo 42 - Amazwi Yakwe Leza 2013

Yobo watontela Leza

¹ Lyene Yobo aasuka Yawe ati,

Yobo

² “Nemo natimanya ukuti wemo wakwata amaka akucita icintu icili consi, Wemo ungacita consi cino ukulonda, nupya kusi angalesya.

³ Wemo wanguzya ningo uti, ‘Uzye weweni wemuno ukwezya ukuvulunganya umpandamano wane, apamulandu wakulanda amazwi akuzaila sile?’ Cumi kwene nalanda apa vintu vino nemo naposiwa ukwiluka. Nalanda na pa vintu vyakuzunguka vino vyampezya na mano, vino ningaposiwa ukumanya.

⁴ “Wemo wali wanena wati, ‘Utezye nga nani namalanda. Namakuuzya, nga nawe ungasuke.’

⁵ Mpiti nakumanyile ukupitila muli vino nuvwanga kuli yauze. Ilelo lyene, awe nakulola na manso yane ntontonto!

⁶ Ali cino fwandi nawezya umuvwango wane onsi. Naiswela ulukungu ni itwi, apakulanga ndi vino lyene nazenzuka.”

Leza wawezezya Yobo ivyuma

⁷ Walanga Yawe wamala ukunena Yobo amazwi yaa, alino anena Elifazi umwina Temani ati, “Nemo natinkusokela wakwe cimwi, pamwi na auzo yoili, apamulandu wa kukanalanda ivyacumi pali nene, ndi muno umuomvi wane Yobo wavwangile.

⁸ Ali cino mwemo, yangini mukatole yacipambasi ya ng'ombe cinimbali, na yasuuku nayo kwene cinimbali. Muye nayo uku muonvi wane Yobo. Muye mukayocele apa kuyapela wa mpolelwa iyakuipapatila kweneko mwe eneco. Alino apa nsita kwene iyo, umuomvi wane Yobo amaya akamupapatile, pano wene ali wino ninguvwa ipepo lyakwe. Ndi caya vivyo, ale lyene ningasuula ukukuponga kwinu kuno mwaifizye, icakukana vwanga ivyampomvu kuli nene wakwe vino Yobo avwanzile.”

⁹ Fwandi ali vino Elifazi umwina Temani, Bilidadi umwina Syuwa na Zofali umwina Naamati, yaile yacita ndi muno Yawe wayaneniile. Fwandi Yawe nawe ali pakupokelela ipepo lyakwe Yobo.

¹⁰ Walanga Yobo wamala ukupapatilako yacuza yakwe, alino Yawe amuwezezya nupya ivyuma vyakwe, lyene iviwelela amaila yaili ukuluta vino vyali apakutandika.

¹¹ Aina yakwe aonsi na yakaci yakwe yonsi, kumwi na yacuza yakwe ampiti, yiiza uku kumulola, nu kwiza ipakizya pamwi nawe umu ng'anda umwakwe. Ala yakumuvwila ulanda nu kumutekezya umwenzo apa macuzi yonsi yano Yawe wamuletile. Yonsi kwene, cila muntu, asya wamupeela impiya nga ni mbalaminwe yakwe zaabu.

¹² Yawe nawe ali pakupolelela imikalile yakwe Yobo ukuluta napali vino watenzi mpiti. Fwandi lyene Yobo akwata imfwele amazimbi ikumi na yani. Ingamila amazimbi mutanda, yamasaye akulimila kumwi na yapulao izimbi lyonga. Yapunda akaci nayo izimbi lyonga.

¹³ Wiza wakwata ana aonsi cinimbali na yakaci yatatu.

¹⁴ Umwana uwakaci, uwali nyinalenzi wa muze, Yobo amutemela izina ati a Yemima. Wakwe ciili wali a Kezia. Alino uwalenga citatu wali a Keleni Hapuki.

¹⁵ Umu nsi yonsi kutali ana ayembe wa ana yakwe Yobo. Isi nawe ali pakupeela ivyuma ku ana yayo na kuli yakalume yao, pakuti vikaye ivyaupyanyi vyao.

¹⁶ Apacisila cakweziwa, Yobo watenzi pano nsi ukulingana imyaka umwanda onga na makumi yani. Waweni ana yakwe, aizikulu, ukufika nu kuvizikulula vyakwe.

¹⁷ Yobo ali pakufwa, umukote uwa myaka nyanya.