Yobo 41 - Amazwi Yakwe Leza 2013

¹ “Ale nupya Yobo tala lolekesya icinyama cino yakati ci Leviatani! Uzye wemo ungaciswela ukwiswelo? Uzye ungafyenta ululimi lwaciko uku mwando?

² Uzye ungapisya umwando umu mizeka ya mpuno yakweco? Nanti uzye ungacitulinkanya umu nzekete nu mwando?

³ Uzye kwene cingatala cikupapate, nanti ukukulyombeleka na mazwi afuke?

⁴ Uzye munguvwana naco apakuti cakuombela, ukufika mpaka imfwa yakweco?

⁵ Uzye ungacinyepa wa kunyi kano umuntu wateka, wa cintu cakusekesya aomvi yako acimama?

⁶ Uzye alondo yanguvwana kuti yacikazye? Nanti yakulonda ukuculuzya, uzye yangaputoola inyama yakweco umu vimpilinsya?

⁷ Uzye ungacitulola apa mwili uku kuomvya cimunkowa nanti isumo lyakuswelela? Nanti uzye ungacitulola na masumo umu mutwe?

⁸ Ale tala ezya ukucikumya umwenzo, umalola vino umailetelela. Utalatala ukaswilizye nalyuze.

⁹ “Ala cisi cakwezya ukwelenganyapo ukulema ci Leviatani. Pano kwene apa kucilola sile, ungapona pansi.

¹⁰ Ndi cakuti kusi umwi angaposya kuti acisonkomole, uzye lyene aweni angaposya ukulwisyanya nani ne Leza?

¹¹ Uzye aweni angiza ailizyanye pali nene, pano ivintu vyonsi pano pansi ivyakwane.

¹² Kantale indondolole vino amaulu yakweco yapangwa, alino na maka yano cakwata, na vino caumbwa.

¹³ Kusi umuntu nanti wenga angacifuwa impapa, nanti ukucitota ni sumo umu cisolelo cino cikazwala.

¹⁴ Uzye aweni angacasamula akanwa akazingulukwa na mino, ukwaula ukoopa amino yakweco asongolesye.

¹⁵ Itundu lyaciko lyakwata imilongo ya nkwela zya visyangu. Alino nazyo zyapalamana icakuti kusi umuza ungapita mwenemo.

¹⁶ Zyakambantana icakuti kusi umuza ungapita mwenemo.

¹⁷ Zyakambantana wakwe cimwi cakuti kusi angazipaatulula.

¹⁸ Ci Leviatani ndi catisya, mpaka insase izisaata, na manso iyayenza iyaya na cee, wi lanzi ndi lyatunka!

¹⁹ Alino umu cilomo cakweco mukafuma ivimbilimbili vya moto, nu kusasya kwa nsase zya moto kwene.

²⁰ Umu vipuno, namo mukafuma icunsi kwati amanzi, akufuluma umu ntendo ili apa moto, lino ikufumya icipu.

²¹ Umupu uno cikafuta ungasonteka makala, nu mucilomo cakweco, mukafuma icimbilimbili ca moto.

²² Lyene umu nsingo yakweco umwayela amaka, na antu yonsi akacikumya mwenemo, yakaoopa.

²³ Imimfyompo yamu minyefu yakweco yalemana, yene yakoma ndi nupya itangangatenkana foo.

²⁴ Umwenzo wakweco wakoma kwati iwe, wakoma ndi wa mwanansyo.

²⁵ Ndi cakuti cakatuka, antu yamaka yonsi yakaizakazila sile, yonsi pasi pa ntete lino cikucapola umusinda wakweco apa manzi,

²⁶ Ulupanga nanti lwacikoma, pasi cino lungacita. Nanti sile isumo, uluceto na coco, vyonsi vitange vicite nanti cimwi.

²⁷ Fwandi cene cikalola icela ungati akasote sile. Alino umukuwa wene cikaulola ungati ileka lya muti.

²⁸ Inceto zitange zicipuusye foo. Ukucizukuzila amawe yamuli legeni, ungati avino umwi angazukuzila cungu wa malezi kuno cili.

²⁹ Ndi cakuti wacipoola uku nkamba, kwati itete sile alino lyacikumyamo. Nanti ndi wacilasa ni sumo cikasekokelako sile.

³⁰ Lwapa lunda lwaciko paya ivimamba ivikalipisye, ivitimbe wa viinga. Alino ndi cikuvipisya umu matipa, kwati a yamukolo akukomelelako imbezu.

³¹ Cikavundola itenga ungati lyene intendo ikupya apa moto, ikutopota. Lyene ndi cafutumula yemba amatomvwe, ungati amafuta yamanona akutopota apa moto.

³² Umu manzi muno capita, mukasyala ikula iliyengese, icakuti akula liswefile naswee, ungati imvwi!

³³ Pano nsi pataya iciumbwa nanti conga icingalingana naco. Ala ci Leviatani caya iciumbwa conga icisiopa icintu nandi cimwi.

³⁴ Nu kusula cene casula iviumbwa vyonsi vyuze ivyasyala. Alino conga sile ali cimwene icikateeka vyonsi ivya cilumba.”