Yobo 40 - Amazwi Yakwe Leza 2013

Leza walanga amaka yakwe

¹ Yawe nawe anena Yobo ati,

² “Uzye ukulonda ukuti uwampazya nene ne Leza Wamaka yonsi vwile? Uzye watukwata ivya kunjasuka ne Leza nanti foo?”

³ Lyene Yobo nawe aasuka Yawe ati,

⁴ “Amazwi yano natimvwanga, akuzaila sile we Leza. Uzye fwandi ivyani vino nemo ningavwanga? Nemo ningika sile ulupi lwane apa mulomo, ulupi lwane apa kanwa, casila.

⁵ Natimvwanga mpiti caticisila, intange nswilizye nupya, awe.”

⁶ Lyene Yawe nupya kwene avwanga kuli Yobo umu cipunga.

Yawe

⁷ “Ale zwalila tuvwe, ndi wewe monsi monsi. Nemo namakuuzya nawe unjasuke.

⁸ Uzye kwene Yobo wewe ukunena ukuti vino nemo inkapingula vitalola mwenemo, vwile?

⁹ Uzye nawe wakwata amaka wa maka yakwe Leza? Uzye izwi lyako lingapanta wizwi lyakwe Leza?

¹⁰ Ndi cakuti cili vivyo, ale fwandi uizwike ululumbi nu ukankala, uizwike uwene alino nu mucinzi.

¹¹ Ale lyene soka tuvwe, lolekesya antu ya vilumba uyatonsye.

¹² Zyuluka umuntu ali wensi uwa cilumba nu kumucefya, kapamole aipe yonsi papa pano yaimi.

¹³ Yonsi kwene uyazike pamwi mu musili, nu kuyayalila umu mfinzi kuzimo.

¹⁴ Ndi cakuti avino umacita, ale lyene nani namakutaizya, nupya namakulumbanya inti, ‘Fwandi wakwata amaka akucimvya.’

¹⁵ “Tala elenganya pali Beemoti Anene namuumba ndi vino nakuumba we Yobo. Akuno wene akalya sile isote wa ng'ombe.

¹⁶ Ungalola sile vino waya na maka umu musana. Wakwata imikole ikome sana umu mwili.

¹⁷ Umusinda wakwe utupu, wautonkomalika wa muti, umukelide. Alino imikole yakwe umu maulu, yaya ipikane wa vyela vino antu yakasula.”

¹⁸ Amafupa nu mongololo vyaya ivikome wa vyela,

¹⁹ “Civu inyama imwi ikatame apa viumbwa vyonsi vino ne Leza naumba. Lelo kwene ne muno namuumba anene nenga sile ningamoofya.

²⁰ Nene nalesya civu ukuti ataikala umu myamba, muno inyama zyuze izyasyala zikacinila.

²¹ Civu akaikala umwi sanga, nu kufisama umu matete na muli tefwetefwe.

²² Akauwa umu visao vya mpupunga zya mpunga, lwamu matimba apipi ni nguzi.

²³ Nanti watuwila pansi pansi apa luzi, awe wene asisakamikwa, nanti sile amanzi amu Yodani yapongolokela panoli, awe wene asioopa.

²⁴ Aweni angatala amuleme ukwi swelo? Nanti aweni angamuteya akolokovye umwando umu mpuno?”