Yobo 4 - Amazwi Yakwe Leza 2013

Ukulanzyanya kwakutandika Elifazi

¹ Lyene Elifazi umwina Temani aasuka Yobo ati,

² “Uzye ndi navwanga izwi limwi utamasoka? Pano lyene naposiwa ukusyala cele.

³ Apa mpiti wewe wasambilizye antu avule, wakomelizye na yayo atembokele mu makasa.

⁴ Uku mazwi yako wemo watungililanga intalanganyi, nu kukomya inteo zya maulu azakazanga.

⁵ Lelo apa kuzana ukuti intazi zyakwizila, wemo waposiwa ukuzizimizya, watovoka nu kutovoka.

⁶ Uzye fwandi wemo ukufukila Leza kutange kukukomelezye? Nanti imiyele yako isuma itange ikupeele utailo?

⁷ “Ndakai elenganya ningo: Uzye watala walola umwi uwakaele wino wononeka? Nanti aukwi kuno watala walola antu akacita vyaololoke yononeka?

⁸ Nemo vino nalola aevi: Yao akalima inkota nu kukomela imbezu ziipe, ali yano yakazombola uyi.

⁹ Uku mupu wakwe Leza yene yakalowa, alino nu ku ukali wakwe yalononekela.

¹⁰ Icilulumo ciipe, ni vilululumo vyakwe yacisama, Leza alavimyalalika nu kusokola amino yao.

¹¹ Yacisama yatakweti cakuti yaleme nu kulya, nu twana twakwe cisama uwakaci twatitusalangana.

¹² “Izwi lyasokolwike kuno ndi umu umfisolo, ngi ikutwi lyane lyuvwa ukutotoza kwaliko.

¹³ Cali kwati umu nsita ya usiku, lino iviloto vikapoka umuntu amano nu tulo itumulalikizya.

¹⁴ Intete zyandemile nga intandika nu kuzakaza, icakuti impomonteka nu mu mafupa.

¹⁵ Alino umupu wampupilizye apa usyu, nu upipi wane iusakalala.

¹⁶ Alino pizile pimilila icintu, lelo nemo naposiwe ukumanya icata cakweco. Kwene naweni cimwi ciimi uku nkolelo yane. Alino pazuka ipaya na cele. Lyene nuvwa izwi iliti,

¹⁷ Uzye umwinakufwa angacita vyaololoke apa manso yakwe Leza? Nanti uwakaele apa manso yakwe kaumba wakwe?

¹⁸ Fwandi Leza atataila umwi uwamu yaomvi yakwe kwene. Nanti umu angeli yakwe kwene, namo kwene wazanamo iciponge.

¹⁹ Uzye wene angataila uli icaumbwa kwivu, icapangilwa ku lukungu, cico icingavungolwa wa kazizi.

²⁰ Umu nsita zya katondo yazanwa apuma. Lelo apakuti kawe ala yatiyafwa mpiti, nga kusi nu wakuyiusya.

²¹ Nga vyonsi vino yene yakwata vilasendwa, ala yatiyafwa pamulandu wakuulilwa amano.”