Yobo 39 - Amazwi Yakwe Leza 2013

Leza walondolola ukulu wa milimo yakwe

¹ Uzye we Yobo, wamanya lino yataala yakavyalwa? Uzye watala walola kweneko kuno inyama ya mpanga ikutuula?

² Uzye wemo ukapenda imyezi ino inyama zikakwatilapo iyele, nanti insita ino zikatuulila penepo?

³ Uzye wamanya akasita kano zikasulama nu kutuula, nanti ino zikavyalila pambiliwili?

⁴ Utwana ndi twala twakulilila sile, nu kukoma twakoma, ala twasya yanyina, kusi nu kuswilila kunoyali.

⁵ “Aweni uwalenga ukuti colwa aipitila umwisikulu? Aweni uwamusapwile nu kuleka aipitila umu mpanga?

⁶ Nene, ne Leza, anene naleka ukuti aikala umu lwanga, nu kumupeela impanga yavisyolwe kuti iye iyakwe.

⁷ Fwandi ali cino wene wasoka icongo camu misumba. Kutaya uwakuti amutonsye nu kuti amuomvya ukukusenda iviya.

⁸ Wene akapitana sile umu myamba umwaya ivyakulya, nu kulondelezya vyonsi ivilembe ivya misango yonsi.

⁹ “Uzye imbo ingakuyela ukuti iyakuombela, nu kulala umwi koola lyako?

¹⁰ Uzye ungatola umwando nu kunyepa imbo umu nsingo, apakuti ikulimile icalo ningo?

¹¹ Uzye ungasintilila umu mbo pamulandu wa maka yano yakwatisya? Uzye ungaitela incito zyako izikome kuti ikuombele?

¹² Uzye ungatala uwailolela kuti ikolonganike ingano, nga ikuletele apa lwano lwako?

¹³ “Amapa ya mbuni yakalambana sana apakuipumpunsya ni nsansa, lelo imbuni yaposiwa ukupapuka wakwe vino cipungu akapapuka.

¹⁴ Imbuni ikatela amayayi pansi, apakuti icipuki capansi icayakavya.

¹⁵ Isiiluka ukuti ingazo zya antu zingayatamola, nanti inyama zya mpanga zingayalyatola.

¹⁶ Ikaikolanya kwati asi ali yeneco ya mayayi. Yene isisakamala ukuti yaculilepo pakuta amayayi.

¹⁷ Anene ne Leza nimile imbuni amano. Anene nailenga ukukana cenjela.

¹⁸ Lelo kwene ndi yati kisimule pa, awe cumi aleka leka. Ikasya na wiyo akwezile pa mfwalasi.

¹⁹ “Ale lelo Yobo, uzye awewe walenga kuti imfwalasi iye na maka? Nanti uzye awewe wayikila umukovyo apa nsingo?

²⁰ Uzye wewe walenga kuti imfwalasi yatoloka amalimba wakwe makanta, nu kuleka ukuti yalila izwi ilya koofya antu?

²¹ Imfwalasi zikatununta umu manyika nu kuyakuulizya kuno kwaya inkondo. Zikasimula kweneko na maka yakwezyo yonsi.

²² Imfwalasi zyaposya sana nupya pataya cino zikaoopa, alino zyene zisicintukila nanti yangazisonta nu lupanga.

²³ Ivyanzo vino yayo akakwela pa mfwalasi yakasenda, vikakolokonsya lwapambali, ala vili nu kuyengesa kwa lupanga kumwi ni sumo.

²⁴ Imfwalasi yene ingamala impanga ni mpanga ukwaula ukwimilila sika. Inyenjele ndi yalila, yene isiimilila, awe.

²⁵ Lyonsi lino inyenjele yalila yene iti nu kuti, ‘Eya!’ Ala yene yanunsya uwema wa nkondo, konsi kuno iyelile, nanti pangaya apatali. Nu kuuvwa, ikauvwa vino yamusika ya vita yakupunda.

²⁶ “Uzye mweye akasambilila kuli wewe ivyakupapuka, lyonsi lino wanza amapa nu kulungama uku katutu?

²⁷ Uzye wewe ukanena cipungu ukuti apapukile umwiyulu apatali, nu kuluka icinsanzo cakwe apapela ya mwamba apatali?

²⁸ Pano cipungu akaikala apa mwamba usanzuke, wene akazina apa ntonje ya mwamba.

²⁹ Papa kwene, ali pano wene akacevezya lwapatali, icakuti angawamba nu kulya alye.

³⁰ Cipungu wene akalukizya utwana twakwe ivya wazi, na kuno walola ivyala ala akuno walungama.”