Yobo 38 - Amazwi Yakwe Leza 2013

Leza wasunda Yobo, nawe wamutontela

¹ Lyene Yawe aasuka Yobo umwi zwi ukufuma mu cipuupu.

Yawe

² “Uzye wewe weni, wemuno ukuuzikisya nu kuvulunganya vino napingula? Ala mwine Yobo, ukuzaila sile!

³ Ale ndi wewe monsi monsi, katuka zwalila, pano lyene nemo natinakuuzya, nawe uwasuke.

⁴ Uzye we, akuno wali lino naumbanga insi? Asuka tuvwe ndi cakuti wiluka ivintu.

⁵ Uzye wamumanya uwapimile ukulu wa nsi, wiyo uwanyunzulwile umwando wakupimilako nu kupimila kweneko insi?

⁶ Aepi pano incesi zya nsi zyasimpwa? Aweni uwisile iwe lyakufikilizya apa kuitungilila?

⁷ Lino intanda zyapa macaca zyumilanga utupundu capamwi, na angeli yonsi yakwe Leza yamuwanzizye capamwi ni nsansa.

⁸ Aweni uwayazile ivisasa nu kucilikila yemba, lilya lino wacisile kwati akulompoka muno wali?

⁹ Ala anene natoozile kungwi nu kumuvimbilikizya pali yemba. Alino ndeka na makumbi atifi iyaya penepo.

¹⁰ Nene napimile yemba apakupelela, inika ivisasa ni mikolongelo,

¹¹ lilyo lino namunenyile inti, ‘Papo ali pano uce uwapelela na maimbi yako yataca yaezya ukucila penepo.’

¹² “Uzye Yobo ukufuma pano wavyalilwe, watala wapima insita, apakuti ilanzi lyatunkila penepo na kuti kwaandatuke?

¹³ Uzye watala wanena akatondo ukuti kalemelele insongo zyonsi nu kukunta mwenemo antu aipe?

¹⁴ Uluswepo lwa katondo lukasenula imyamba ni mikonko apakuti vyaloleka wa nsalu ya minkwinya.

¹⁵ Uluswepo lwa katondo lukazyatika antu aipe, nu kuyalesya ukucita ivingaleta amazanzo.

¹⁶ “Uzye wemo watala wafika pansi pansi apa ntulo zyakwe yemba? Nanti uzye watala upitana pansi yakwe yemba.

¹⁷ Uzye kwatala kwaya umwi angatulanga impongolo zya mfwa? Nanti uzye watala walola yakalinda ya mpongolo itifi, kuno kwikala imfwa?

¹⁸ Uzye watala wamanya apafika ukulu wa nsi yonsi. Unene ndi cakuti wamanya vivyo vyonsi.

¹⁹ “Uzye wemo wamanya ukwikala uluswepo, nanti kuno imfinzi ikafuma?

²⁰ Uzye ungatala utungulule uluswepo ni mfinzi, nga ukavilange na pano vingapelela, nu kuviswilizya nupya kuno vikaikala?

²¹ Cumi kwene wemo wamanya vi vyonsi, pasi pano walanga wavyalwa apa nsita ilya! Wemo walanga wikala imyaka ivule cuze!

²² “Uzye wemo watala wafika kweneko kuno nakoozezyanga kungwi, nanti kuno nakoozezyanga amawe ya mvula?

²³ Ivintu vivyo ne Leza nkavisunga apakuti vyaomba pa nsita ya ucuzi, pa nsita ya vyongo na pa nsita yankondo.

²⁴ Uzye wemo wamanya kuno ilanzi likatunkila, nanti kuno umuza waku ufumondaka ukafuma, apakuti wapunga pano nsi?

²⁵ “Uzye aweni uwimvile imikolwa ya mvula umwakuti iyapongolokela? Nanti uwateinye ni nzila umwakupita ukumyansya kwa mvula, aweni?

²⁶ Uzye aweni akatonyezezya imvula umu ncende umutaya antu, nanti umu mapoli umutaya antu?

²⁷ Uzye aweni akakontelela umu mawanga, umwakuti ni sote ilifuluma?

²⁸ “Uzye imvula yakwata isi, nanti aweni akavyala ulumi?

²⁹ Uzye nyina wakwe cuma aweni? Uzye nyina wakwe suumi, wino akafuma umupela nu kukambantana ukwa mpepo aweni?

³⁰ Uzye aweni akaleka amanzi yakome ndi, wiwe, icakuti na matenga iyatimba apapela?

³¹ “Uzye we Yobo ukweti amaka akulundinkanya iminyololo, iya lundinkanya intanda izikaamwa Pileyadi, nanti amaka akutankola imyando iyalundikanya intanda izikaamwa ukuti Olioni?

³² Uzye wemo ungatala ulenge ukuti intanda zyawalila, apa nsita ino zingawalila penepo? Nanti uzye ungatungulula ulutanda ulukaamwa Bea, pali ponga nu twana twaluko?

³³ Uzye wamanya icikalenga kuti ivya mwiyulu vimwi, vyapitana? Uzye umu musango uno vikapitila mwenemo, ungatala uvipingule apakuti amuno ni mpanga iyalondela mwenemo?

³⁴ “Uzye wemo unganzinkila amakumbi, nu kuyanena ukuti yakufumfumwile imvula?

³⁵ Uzye ungatala unene imvula kuti imyantule cakuti lino yawela, ikunene iti, ‘Musambazi, uzye aapi pano namamyansyizya nupya?’

³⁶ Uzye aweni akapanda campompo amano, akuti amanyisye antu ndi vino icisiku capalama, nanti mukolwe ukulila apakunena antu ukuti kwaca?

³⁷ Uzye aweni uwakwata amano akukolonganika amakumbi, nanti ukuyasulika apakuti imvula iyafomfomoka,

³⁸ nu lukungu lwa munsi lutipe nu kukambantana, icakuti ni viunguluwe navyo visuke vimamantike?

³⁹ “Uzye wewe ukalemela yacisama inyama zyakuti yalye? Nanti uzye awewe ukapeela utwana twao ivyakulya ivyakutuuka inzala,

⁴⁰ lino tukawatalala umu macele yao, muno tukafisama umu matesi?

⁴¹ Uzye aweni akateyanyizizya mwankole icakulya, lino utwana twakwe tukulila nu kutonkomalika utusingo twatuko, pamulandu ni nzala?”