Yobo 37 - Amazwi Yakwe Leza 2013

¹ “Ukukulukunta nu kupanta kwa nkuwa ali vino vikuleka umwenzo wane ukuzakaza nu kutunta mu cifuwa cane.

² Kutikini! Muvwe vino izwi lyakwe Leza likuuza, ni cilulumo cino cikufuma umu kanwa kakwe!

³ Wene akumyantula inkuwa apisika ya luwanzi lwi yulu, icakuti nga camyantula, icifika nakuno insi yapelela.

⁴ Nga alino ipalondelela penepo icilulumo cizwi lyakwe. Izwi lyakwe ilya mucinzi ilikuuza. Asiezya ukulesya ukumyantula apa nsita ino izwi lyakwe likuvwika.

⁵ Icumi cumi Leza akayazungusya pali vino akacita, nupya ivyakutupezya amano.

⁶ Wene akanena kungwi ukuti aponele pansi, nu kunena imvula ukuti ivovomokele pansi.

⁷ Pakuti antu yonsi yano waumba atulange vino akucita, wene akaimika imilimo itu.

⁸ Papo kwene ala ni nyama zya mpanga zyatandika nu kuweluluka ukuya uku kuuwa kuno zikalala.

⁹ Icipunga cikafuma uku katutu, na nkungulupya nawe afuma uku kayeya, aleta impepo.

¹⁰ Leza ndi waputa umupu wakwe, mpaka cuuma apangwa cakuti na papela ipatimba, icuma na mbombombo.

¹¹ Akazuuzya amanzi umu makumbi. Amakumbi nayo ali pakutandika uku ulukuta nu kumyantula.

¹² Umweneco kwene aliwe akapisyanya amakumbi, kuti yacite consi cino wapeela ilamulo kuti yacite pano nsi ponsi.

¹³ Cino Leza waletela amakumbi ni mvula pano nsi, limwi apakuti avunuke antu pano nsi, nanti limwi apakuti ayapeele ivintu ivisuma.

¹⁴ “Ali cino fwandi we Yobo ikala cele, utezye amazwi yaa! Tala elenganya sile apa vipezyamano vino Leza wacita.

¹⁵ Uzye we Yobo, wamaya vino Leza akapisya ivintu vii? Uzye wamanya vino amakumbi yakwe yakamyantukila imvula?

¹⁶ Uzye wamanya vino amakumbi yakanyinyinda umwiyulu umu lwelele? Vyonsi vivyo ivicitwa vyakwe vyakuzunguka, vyakwe Leza, wino amano yakwe yaya afumaluke.

¹⁷ Tala lola vino wemo ukatumuka iyevu, lilyo lino umuza ukaye ukafuma uku katutu.

¹⁸ Uzye kwene wewe ungatala uwazwe Leza ukukonzolola uluwanzi lwa mwiyulu apakuti lwaloleka wa cilolwa icengululwe uku cela?

¹⁹ We, ukulonda tuvwange vyani pali Leza? Swemo amano yatala yacepa, ivyakulunda penepo, pasi.

²⁰ Nemo nsyakunena Leza ukuti leka nalukuvwanga! Awe mukwai pano limwi ningazana ukuti yangonona.

²¹ “Limwi limwi uluswepo lusiloleka, apamulandu wakuti lukavimbilikiziwa uku makumbi afitisye. Ndi kwiza umuza nayo iyanduluka.

²² Ulola nu kukaeya kwaswepa. Ala Leza wikala umu ucindami wakwe, uwakutina. Tutanga tufike uku Mweneco Wamaka Yonsi.

²³ Wacila yonsi pyu uku maka nu ulungami. Ulungami wakwe wakula wakwe cimwi nu lufyengo mutaya.

²⁴ Fwandi antu yafwile ukumoopa. Na antu yamano yonsi yamucindikisye.”