Yobo 36 - Amazwi Yakwe Leza 2013

Eliu walumbanya amaka yakwe Leza.

¹ Eliu atwalilila nu kuvwanga ati,

² “Wemo Yobo tekela sile uleke nkulondolwele vino nkuvwangila Leza. Pano nemo ncikweti ivyakuti imvyangileko Leza.

³ Amano yonsi nemo yaya avunguluke, namanya ivyakuvwangila kaumba wane pano wene akalungika.

⁴ Pasi pano nemo vino nkulanda, visi vya utumpe foo. Nemuno nkukunena, nene muntu umwi uwamano ampomvu.

⁵ “Ukuya kwene nanti Leza uwa maka, lelo kusi umuntu nanti umwi wino akasuula.

⁶ Asilonda yakaifya yatwalilile ukuya nu umi, lelo antu asulwe akayataasya.

⁷ Leza akacingilila antu akacita vyaololoke, nu kuleka kuti yateke wa ene, nu kucindikwa umuyayaya.

⁸ Lelo ndi cakuti yamwi yanyepwa umu myando, pamulandu wakuculila pali vino yolonganya,

⁹ Leza akayalanga uyi uno yacisile, ayanena ukuti yifya ku cilumba cao.

¹⁰ Akaleka kuti yuvwikisye vino wayasopesyanga apakuti yangafuntuka uku maifyo.

¹¹ Ndi cakuti yatontela Leza nu kumuombela, lyene yangaya nu longo amanda yao yonsi nu kuipakizya imyaka yao yonsi.

¹² Lelo ndi cakuti yakana ukuvwila, yalalowa uku lupanga ukwaula ukumanya nanti cimwi.

¹³ “Lelo antu asi yapefi yakaikala asoke, Nalino Leza wayanyepa umu myando, awe cumi yene yasi nu kumupapata foo.

¹⁴ Yakafwa lino yacili ance, pamulandu wakuti uzelele wao ukayapoka amaka.

¹⁵ Lelo Leza akapususya yao akucula uku ucuzi wao. Wene akalanda kunoyali umu ntazi zyao. Akaleka kuti yacule, apakuti umu kucula kwao amuno yapule amalango.

¹⁶ Fwandi nawe kwene Yobo, Leza akalonda uku kupususya ukupitila mu mulandu wako. Apa mpiti wasyukile ivyuma ivingi sana. Ni vyakulya ivyakulya mpe navyo vyatulumananga api tebulo lyako.

¹⁷ Lelo antu aipe yatulumanikanga upinguzi wao nu kukalipilwa. Nu kufyenga wafyengelekezyanga ana yacisyale.

¹⁸ Utekele utaleka amafukakanwa yakusombe, nanti ivyuma vikuponzye.

¹⁹ Akama, nayo kwene uwayalolwela icili cimwi kwene na alanda. Ni nkumenkume kwene, inkwimimbi zya antu, uwazipingwila kumwi. Utapelela sile uku kupingula utuwelewele twa antu.

²⁰ Utaluuka insita ya usiku, lilyo lino antu yonsi yakayalilwa kuncende zyao.

²¹ Uwacenjela nu kufuntuka uku viipe, pasi pano ali vino vyakulenga nu kucula kuko.”

Ululumbi lwa mano yakwe Leza

²² Tala elenganya pali vino Leza waya nu ucindami apamulandu wa maka yakwe.

²³ Aweni angamulangilila ivyakucita? Aweni angapama nu kumunena ukuti cico waluvwanya?

²⁴ Wemo ule wiusye sile ukwika amano mukulumbanya imilimo yakwe Leza ndi vino antu yakalumbanya umu nyimbo.

²⁵ Antu yonsi pyu, yakalola ivicitwa vyakwe Leza, lelo yakavitambila akatalamukila.

²⁶ Icacumi amano itu yatange yafike penepo uku kumanya ukulu wakwe Leza, nanti ukupenda imyaka ino Leza ali nayo.

²⁷ “Leza umwisikulu aliwe akatola amanzi yamuli yemba, nupya ayasangula amamata yamvula.

²⁸ Nga alino nayo imvula itandika ukuvovomoka ukufuma umu makumbi, nu kutonyela pa vyalo vya antu.

²⁹ Kutaya nanti wenga uwamanya vino Leza akasansata amakumbi, nanti vino ukupangalansya kukacitika umwiyulu muno Leza wikala.

³⁰ Usilola sile vino Leza akaivimbilikizya na kungwi, na vino akaivimbilikizya apapela ya myamba.

³¹ Vivyo vyonsi ali vino wika umwakusungilamo antu alino nu kuyavuzizya ivyakulya.

³² A Leza umwisikulu aliwe wafumbata inkuwa mu makasa yakwe nu kuzumilizya kuti iponele apali ponsi pano akasi.

³³ Icikapangalasya ali cino cikakolelela ukupona kwa nkuwa. Nu ukali wa mvula ukaponela iciipe.”