Yobo 35 - Amazwi Yakwe Leza 2013

Leza akasakamala sana ivikacitika pano nsi

¹ Nga alino Eliu atwalila ukuvwanga ati,

² “Uzye icisuma kuti wemo uvwange ukuti wewe mulungame nu kuti wewe wakaele kuli Leza?

³ Nanti ukuuzya Leza uti, ‘Uzye icani cino nkalonkamo, umuzano cii uno nkweti apakukana ifya?’

⁴ Lyene nemo namakwasuka pali ponga na yacuza yako kwene.

⁵ “Tale sungamila umupela, umwiyulu! Lola vino amakumbi yali apatali sana ukufuma kunuli.

⁶ Ndi cakuti wamuluvyanya amaila nyanya, uzye wemo utanga umanye ukuti akucululuka? Nanti ndi cakuti wavuzyanya ukwifya, uzye ukuti Leza cikamuwaya?

⁷ Ndi cakuti ukazifya, ivyani vino ukamupeela, vino angapokelela ukufuma uku makasa yako?

⁸ Antu yauze, ali yano ukwifya kwako kukacuzya ni visuma vino ukacita, vikaazwa sile aina kufwa.

⁹ Antu yakuilizyanya pamulandu wakufyengelekeziwa. Nupya yakulila impoma pa ukakasi wakwe yayo avimaka.

¹⁰ Lelo kusi nanti wenga akavwanga ati, ‘Uzye Leza kaumba wane ali kwi, wiyo akaleka ukuti inyimbo zya luzango zyuvwike usiku.

¹¹ Aliwe kwene akatusambilizya ivintu ivivule ukuluta vino akasambilizya inyama zya mpanga, nu kutulenga ukuya na mano ukuluta ivyunyi vyamu lwelele.

¹² Ndi antu yamwi yalaizya uwazwilizyo, Leza wene asiyaasuka apamulandu sile wa cilumba ca antu aipe.

¹³ Endi, Leza asiuvwa ku kupapata kwao ukwasilesile. Uwamaka yonsi asisumbako amano awe.’

¹⁴ “We Yobo, icumi wewe ungavwanga ukuti utangalola Leza, lelo umulandu wako wene wamanyikwa mpiti kunoli, wemo ukamulolela sile.

¹⁵ Wemo walola kwati Leza atange akukalipile zuwa nu kusakamala atasakamalisya iifyo lyako.

¹⁶ Ala mwine Yobo, ukuicuzya sile ni vyakuvwangavwanga. Ee, kwene utamanyile cino ukuvwanga.”