Yobo 33 - Amazwi Yakwe Leza 2013

Eliu wasinkola Yobo

¹ “Ali cino fwandi we Yobo, uvwa kuno vino nkukunena. Utezye amazwi yane yonsi.

² Kankunene ivili umu mwenzo wane. Vino namalanda vimafuma apa lulimi lwane.

³ Umu mwenzo wane mumafuma umuvwango wa mano. Umu mulomo wane mumafuma ivyacumi vitupu tupu.

⁴ Pasi pano umupasi wakwe Leza ali uno uli muli nene. Umupasi wakwe Leza ali uno wampeela umi wane.

⁵ “Wemo ndi cakuti ungaya ni vyakwasuka, ale ukweti insambu iyakwasuka. Nu kuteyanya, iteyanye sile nu kuitasya we mwisikulu.

⁶ Alino wemo ulinzile umanye ukuti nene nawe, sweswe ali yamwi pa manso yakwe Leza. Sweili kwene twaumvilwe ukufuma uku lukungu.

⁷ Fwandi kusi nanti cimwi icingalenga kuti wemo uwaoopa nene, nanti inkufyengelekezye, pasi pano nemo ntakukupatikizya foo.

⁸ “Umu cumi nemo nalinkuyuvwila ne mwisikulu, kuno wewe kwene Yobo walukuvwanga uti,

⁹ ‘Nene wa mwenzo uswepe, ntacita icintu nanti cimwi iciipe. Nanti ukutala umulandu uli onsi, awe.

¹⁰ Leza sile ali wino akulondelezya sile umwakumpelela umulandu nu kuncita watancita wa mwanisi.

¹¹ Watanyepa amaulu yane umu minyololo, nu kusopa monsi muno nkupita.’

¹² “Ali cino fwandi nemo ne Eliu inkukwasuka nati, ‘Yobo awe kwene watuluvyanya apakuvwanga vivyo. Ala mwine Leza wene umukulu ukuluta antu.

¹³ Uzye pacani cino ukunenolela Leza, apakukana kwasuka?

¹⁴ Leza apa nsita imwi angavwangila umu musango umwi nupya lyuze nalyo umu musango uze. Lelo antu yene pali cico yasisumbako amano.

¹⁵ Leza akalandila antu umu viloto numu vilolwa vya usiku, lino yatiyalala nu kukasula utulo pa misanzi yao.

¹⁶ Akula lino yakaswile, alino nawe ayatotoza amazwi yakwe. Limwi nu kuyacilukizya apakuti ayasopesye, mu vintu vino yakuluvyanya.

¹⁷ Ali pakuti ayafuntusye uku micitile iipe, nu kucefyanya icilumba kunoyali.

¹⁸ Ali pakuti apususye ni myenzo yao itakafwililile, nu umi wao, utakasendwe ni vyamu nsi.

¹⁹ Limwi nalyo, Leza angayakalipila ukupitila umu ulwale lino ukali ukuyazozota umu mwili.

²⁰ Alwale limwi lino akasanda kakaya uku mwenzo napa lulimi, icakuti iyaposiwa ukulya nanti icilyo cingazipa uli.

²¹ Limwi umwili ungasyala sile wa kasote uku kondoloka, na mafupa yasyale sile pambiliwili.

²² Lino umi wapalamila ku cifulo ca yafwe.

²³ Limwi nalyo, pa angeli amazimbi, Leza angatolapo wenga nu kumutuma uku alwale kwene yayo, ukuti yakayacelule ku milimo ino yalinzile ukuomba.

²⁴ Umungeli angatezela alwale yayo nu kuyapapatila ati, Yapususyini kuti yatafwa. Natinzana inzila yakuyakulwilamo.’

²⁵ Mukwai, cikaya icakuti ni mili yao iyateketa sile kwati iya twance. Ikolana na ino yakweti umu wance wao.

²⁶ Awe lyene iyalumbanya Leza apa kuyakwatila uluse. Yatandika nu kupepa kuli Leza, nga nawe ayuvwa nu kuyuvwa, nga yalolekela uku cinso cakwe ni nsansa. Nu kunena, ala yakunena auze apa kupususya kuno Leza wayapuswisye.

²⁷ Cila wenga alalanda apaswe ati, ‘Nati niifya nu kucita ivitalinzile ukucita, lelo Leza wene wantekelela.

²⁸ Leza wampususya ku mfwa nu kuleka lyene inje nu umi, ukufika na pilelo kwene!’

²⁹ “Fwandi vivyo vyonsi, ali vino Leza wacitila antunze amaila avule umu wikazi wao.

³⁰ Apakuyapususya ku mfwa, nu kuleka yakwate insansa mu wikazi wao.

³¹ Ali cino wemo Yobo, sumba amano kunondi ne Eliu, unguvwe vino nkukunena.

³² Ndi cakuti watukwata ivyakuvwanga, ale vwanga tuvwe. Nemo ningatemwa ukuti nkulungamikile imilandu yako yonsi.

³³ Ndusi ni cakuvwanga, ale lyene utezye sana vino nkukunena. Ikala zii, uleke inkupanzye kweneko amano.”