Yobo 32 - Amazwi Yakwe Leza 2013

Amazwi yano Eliu wavwanzile

¹ Ali vino antu yaya yatatu yatile ukuvwanga na Yobo, apamulandu wakuti wene wasininkizye ukuti uwa kayele.

² Lyene ali vino umuntu wenga wene pasi pakusoka. Izina lyakwe, a Eliu umwana umonsi wakwe Balakelo umwina Buzi, uwamu luko lwakwe Lamu. Wasokile Yobo apamulandu wakuti wene waiweni ukulungika ukuluta pali Leza.

³ Wasokile kumwi na yacuza yakwe Yobo yatatu, apakulola ndi vino nayo kwene yatonta uku vwangana na Yobo. Pano lyene cakola ungati nayo kwene yazumilizya ndi vino Leza angaponga.

⁴ Lino Yobo yapazyanyanga na yacuza yakwe, Eliu watenzi sile cele ukwaula ukuvwanga. Wapile umucinzi uku ikolo, pano wene, wali ali mwance pali yonsi.

⁵ Walanga walola ukuti lyene ivyakuvwanga vyasila, alino nawe wakatwike, akalipa sana.

⁶ Alino lyene Eliu umwana umonsi wakwe Balakelo uwamu mutundu wakwe Buzi, atolelela avwanga ati, “Nali nkutumile sile ukwaula ukumunena vino nali nkwelenganya.” Apa mulandu sile uwakuti nene mwance, namwe mwemwe ikolo.

Eliu

⁷ Ali vino nalinelenganya umu mwenzo wane nati akombe kayatale yavwange. Akoloci kayatale yasambilizye ivya mano.

⁸ Lelo umupasi wakwe Leza, uli uno ukaingila mu muntu nu kumupeela ukwiluka.

⁹ Asi ukukota kutupu ukungalenga ukukwata amano, nanti uku ukupelulwila icipe ni cisuma foo.

¹⁰ Caleka namwe tezini kutikini kunondi, nani namunena vino nemo namanya.

¹¹ “Nemo nali nkulondela ilyasi linu lyonsi lino mwali mukupazyanya. Nali nkuvwikisya amazwi yano mwali mukulanda. Na vino mwali mukusolola amazwi akuvwanga.

¹² Nali nkwelenganya sana lino mwali mukuvwanga. Lelo nemo ntali mbweni nanti wenga uwakuti angasinila Yobo. Nanti ukumupazya mu muvwango wakwe.

¹³ Ali cino fwandi mutavwanga muti, ‘Swemo twatituzana amano, Leza umweneco wenga aliwe angakanya Yobo, asi mwemwe foo.

¹⁴ Nemo nsikutala mvwange wakwe vino mwali mukuvwanga. Namaasuka Yobo, umu musango sile uze uiyele.’

¹⁵ “We Yobo, we! Ala mwine antu yaa yatiyazuka cele. Kusi nanta cimwi cino yamakwasuka. Yatakweti amazwi nanta yamwi akuti yakunene.

¹⁶ Nemo nali nkulolela sile. Lyene fwandi vino yamyalala, uzye nani kwene myalale?

¹⁷ Acino lyene nani kanasuke, kankunene vino namanya.

¹⁸ Ivyakuvwanga ninkwata ivivule. Nu kupamviwa, natimpamviwa ukuti ningaviswa.

¹⁹ Munda yane mukutopota wa vipolwe vya wengwa, vivyo ivikulonda apakufotomokela. Muli wa nkolo ya wengwa ikulonda ukulepuka.

²⁰ Fwandi apakuti inde mfute, suka natala navwanga.

²¹ Umukulanda kwane kusi nanta kumwi kuno namanyomelela. Nemo namaya sile apakasi. Kusi nanta umwi wino namaemelela kweneko.

²² Nemo ntamanya ivyakulyombeleka awe. Pano limwi Kaumba wane angamvunuka zuwa ndi nacita cicyo.