Yobo 31 - Amazwi Yakwe Leza 2013

¹ “Nemo napangana mpiti na manso yane ukukana lolekesya pali mwali.

² Nga fwandi lyene cino Leza wa mwiyulu wampeelela icilambu cii icani? Icilambu ca untunze acino wampela?

³ Uzye fwandi uononesi wene usiponela antu aukakasi, nga nu uzanzo nao uponela yakaifya?

⁴ Uzye Leza asilola imiyele yane yonsi, nu kumanya wamanya ningo imipitile yane yonsi.

⁵ “Uzye kwene natazile intumpoka nanti ukucenjezya antu?

⁶ Ndi cakuti Leza wali nu kumpima apa cipimilo icisitumpoka, wene angazana nu kusininkizya ukayele wane.

⁷ Ingazo zyane ndi cakuti zyatazile izipumba inzila, na manso yane ndi yatazile iyatwala umwenzo wane ku kuluvyanya, nanti iminwe yane ndi cakuti yatazile ikowela ku vyakulemalema.

⁸ Lyene umwi kaize alye vino nakomiile, navino vyamela umu calo cane navyo kayaviipoole.

⁹ Ndi cakuti natala nakumbwa umuci wa muntu umwi, nanti sile ukuya umu kulyembelela apa mulyango wa mwinipamba,

¹⁰ lyene fwandi uwane kaye akelekele umonsi muze nu kulala yalale nawe.

¹¹ Pano kwene ndi cakuti nacita cimwi iciipisye, ndinzile ukupelwa umulandu.

¹² Ngano naipembela umoto nemwisikulu uwa kungoca nu kundovya, uwakuti woce ni vyakulya vyane vyonsi pyu.

¹³ “Ndi cakuti natazile imfyenga aomvi yane, aonsi nanti yamangu umu kuyapingula,

¹⁴ indacita cani lino Leza alakatuka? Indamwasuka uli lino alanguzya?

¹⁵ Pasi pano nayo kwene yapanzilwe umunda wakwe nene kwene. A Leza ali wenga kwene, uwa tuumvile umunda zya akwasi itu.

¹⁶ “Uzye kwene intasakamalanga alanda lino yalondanga uwazwilizyo? Uzye natazile indeka yamukamfwilwa iyatonta muno yakulolela?

¹⁷ Uzye natazile indya nenga ivyakulya lino yamwi yakucula ali wakwe yakasiwa?

¹⁸ Nemo Leza wandelanga wa mwana ukutandikila sile uwance wane, alino nu kuntungulula lyonsi, ukutandikila sile pano navyalilwe.

¹⁹ Ale, uzye kwene natala nalola umupina akalonda insalu, nanti umwi akalonda icakuvimbala,

²⁰ nga nani imuta apita ukwaula kuti imupele ivyakuzwala, ivyapangilwa ku mavumbu afuma ku mfwele zyane, nga nawe apita ukwaula ukuntaizya nu mwenzo wakwe onsi?

²¹ “Nemo panondi, ndi cakuti limwi natazile inkatusya ikasa lyane, nu kupingila uwakaele apamulandu wakuti namasuka imucimvye mu kulondolola kwene ukwa ucenjezi,

²² awe cumi, inkawe nalyo, iciye cane cikavunikile muli namfyumfyu. Nanti ikasa lyane, likaputukile umu nkolokoso.

²³ Ukali wakwe Leza unjizile. Alino nu kuya kwene nemo, intange intale ncicite, apamulandu wakuti Leza wacindama.

²⁴ “Nemo intatala nasumba amano ku vyuma, ivili wakwe zaabu. Ntatala nanena zaabu inti, ‘Wewe uli kaazwa wane.’

²⁵ Ntatala nakwata icilumba apamulandu nu wingi wa vyuma vyane.

²⁶ Ntatala napepa ilanzi nanti lingacindama uli. Nanti ukufukamila umwezi, nanti angala wayemba.

²⁷ Ivintu vyonsi vii vitatala ivindetela amezyo aku vipepa nanti ukuvicindika umu umfisolo.

²⁸ Vyonsi vivyo ndi cakuti navicita fwandi ale icansambu, nasya umwi sunde. Nu kulinga ale caticilinga ukuti yampezye, pano ale nakana Leza wa mwiyulu.

²⁹ “Nemo ntatala nasekela mwenemo, apakulola kuno anisi yane yasyama, nanti ukuzanga apakulola kuno anisi yane yazanzwa.

³⁰ Ntatala napeela akasita uku kuzumilizya ululimi lwame lwaifya umu vyakulandalanda. Ntatala ndeka lwatipwila antu nanti ukuyapundilila imfwa.

³¹ Antu yane yakavwanga lyonsi yati, ‘Kutaya umuntu nanti wenga wino Yobo asiimula.

³² Kutatala kwaloleka umwenyi uwiza apane, uwakuti alale apanzi. Yonsi nkayapokelela usaka utupu. Icisasa cane cayulikila calimwi.’

³³ “Nemo ntatala nafisa antu amaifyo yane. Ntatala namaninkizya imilandu yane umu mwenzo wane.

³⁴ Nsiuvwilila ivya kunzi vino antu yakulandalanda. Nanti ukulondelela amazwi ya misula ukufuma ku akazi. Nkuposiwa ukusula nu kwikala cele, icakuti inkuposiwa nu kufumila apanzi.

³⁵ “Owe mwe kalanda we! Uzye aweni angamvwangila kweneko, apakuti Leza anguvwe? Nemo nalanda vyavula. Wamaka yonsi awino casyalila ukungazwa. Umwanisi wane nga akuno ali, angatantika imilandu yane api pepala.

³⁶ Alino lyene ipepala kwene lilyo ningatemwa ukuti yalikambatike apa cifuwa cane, nanti ukulikoweka apa ciye cane, cilumba cilumba, wa cilongwe ca wene.

³⁷ Ningatemwa nu kuivwangila nenga apa mipitile yane kuli Leza. Ningaya kunoli ale nene muposye wakwe cimwi, ala nintumpula nu mutwe apapela.

³⁸ “Ivyalo vyane vitatala vyandetelela, pano intavivile, nanti ukuvipokolola umu lukang'ansi, uku eneco.

³⁹ Intatala nalya ivyakulya vya mwenemo, ukwaula ukuti ntale ndipile aomvi yane, avilimile. Nu kuinong'onya aomvi yane yatatala iyainong'onya, awe.

⁴⁰ Ndi cakuti vino nkuvwanga ivyaufi, ivilimwa vyamu calo kavilokote, nanti vipokwe, uleke insokolo na nkololwe avino vimele mwenemo. Baale kaipolwe, uleke nkololwe awino amele mwenemo.” Pakwene paa, ali pano amazwi yakwe Yobo yapelela.