Yobo 30 - Amazwi Yakwe Leza 2013

Ukucululuka kwakwe Yobo

¹ “Lelo ndakai yakunsoweka, ance yano ndusile imyaka yakuvyalwa, yao yano nasuzile akwasi yao wakwe cimwi, icakuti intange indeke yasimbwa yao yasunge imfwele zyane.

² Nanti sile amaka yao yatakweti incito, yatange yambombele nanti cimwi.

³ Amaka yao yasila, pamulandu ni nzala nga nu upina. Yakalya sile imisisi ya mpanga iyume, ino yakaimba usiku.

⁴ Yakapulula amafwa ya mpanga umu lwanga ayano yakulya yakulilinkanya kumwi ni vimisisi ivizukelele ivili wa vintungutungu!

⁵ Ala lyene antu yonsi yakuyasowa nu kuyapundilila kwati yakupundilila aivi.

⁶ Yakwikala umu mawe, umu macele nu mu mikonko.

⁷ Yakukavya umu vipupa wa nyama zya mpanga, nu kusunsumala pamwi muli yankololwe kuti yatazakaza.

⁸ Ana yao lyene yali sile wa viwelewele, yatakweti izina, nu kuyazinga yayazinga umu mpanga yao.

⁹ Yao kwene ali yano yakanseka umu nyimbo, yandenga ukuti inje mpundililwa.

¹⁰ Yampata wakwe cimwi, nu kuntaluka yantaluka. Yataya ni coopo foo. Yene yakulukunswila namati apa manso.

¹¹ Nampo nga pamulandu wakuti yalola kuno Leza watovola ulapwa wane nu kumpezya wakwe vino cili, ali cino lyene yatiyankantukila ukali ukali.

¹² Fwandi lyene iumba lyonsi lyatilinkatukila na maka yonsi, yantamola na mawe apakuti yancise, imfwe sile.

¹³ Konsi konsi yati yancilikila kusi nanta umwi uwakuyalesya.

¹⁴ Yiza ingilila umu milompwelo yamu cimpinda. Yaciongolola, yankunkulusya nu kunzikilinkanya umu viunguluwe.

¹⁵ Ivyakungofya vyanduta amaka. Ucindami wane watiwononeka nu kusendwa kwati umu muza. Wene usipo, watiupita wi kumbi. Alino utailo wakupusuka, wene apasi watupita wi kumbi.

¹⁶ “Kwene lyene indi umupipi ni mfwa. Amanda ya ulanda yati yanzana.

¹⁷ Ndi kwala kwafita, ulwale ala watandika ukukonkonta umu mafupa. Alino ivilonda vikumonyoka sile, navyo kusi kuta ukuncuzya.

¹⁸ Leza watamfyambata pa nsingo, nu kunyonga insalu zyane.

¹⁹ Watamvumvunya umu matipa, lyene nkuloleka wa lukungu ni twi.

²⁰ “Acino fwandi, nalila kuno uli lelo kusi ukunjasuka, nimilila pa mulola wako lelo wakana ukundolesya.

²¹ Nalola kwati lyene watunsangokela uku ncuzya na maka yako yonsi.

²² Umuza ukungulula sile. Watumvwintila nu kunzukuza konsikonsi umu cipunga.

²³ Lyene natimanya ukuti watuntwala ku mfwa sile. Akuno tuce tukakomenkane na afwe.

²⁴ “Lelo kwene nanti caya vii, intatazile incuzya umulanda nanti wenga, nemo nkulenga sile inkumbu kunuli.

²⁵ Uzye kwene mwe, asi nene napapatilanga yonsi acululukanga? Uzye asi nene natezelanga alanda na apina?

²⁶ Natailanga isyuko, lelo napokelela isyamo. Nalolelanga uluswepo, lelo imfinzi aino yanjizila.

²⁷ Munda yane mukuvundoka nu kunyongotoka ukwaula ukuta, cila wanda muno wacela mukundetela intazi.

²⁸ Nkapita lyene umutondowele, kusi nu wakunkomelezya nga nimilila umwi uvi, awe cumi aminsozi iyaiponela sile.

²⁹ Ya nkusa ali yano yasanguka ivyuza vyane. Tukupita na yasinsimwe.

³⁰ Lyene umwili wane watiufita na fititi. Amafupa yane nayo yatiyakaya see uku ulwale kwene uu.

³¹ Nuvwanga inyimbo zya nsansa, awe cumi lyene nkauvwa sile impooma nukulosya.”