Yobo 3 - Amazwi Yakwe Leza 2013

Yobo wailizyanya kuli Leza

¹ Mukusyalikizya, Yobo asuka amamula akanwa nu kutipwila uwanda uno wavilwe.

Yobo

² Avwanga ati,

³ “Uwanda uno navilwe penepo kautipwe! Nu wanda uno yavwanzile yati, ‘Samalale, kwaletwa umwana umonsi, nao kautipwe!’

⁴ Uwanda kwene ulya kausanguke akanda. Si Leza ukupela atezya awiusya, nu luswepo lutakaloleke pa wanda kwene uo.

⁵ Si mfinzi ile ipoke uwanda ulya, nupya wandatilwe ni cinzingwa, na kungwi nawe auvimbe. Si akanda kale kapoke uluswepo lwauko.

⁶ Uwanda kwene uwo ukolane wa mfinzi ikome. Su wanda kwene uwo utakolana na manda ya mwaka, nupya utapendelwa pamwi na manda ya myezi.

⁷ Su usiku ulya utaleta icintu icili consi nupya kutakuvwike akapundu mu wanda uo.

⁸ Lekini yale yautipwile kuli yakatipa ya manda, kuli kuti yao amanya ivyakusapola kuli Leviatani ciumbwa camuli yemba cica.

⁹ Si lekini intanda zyakweo zya katondo zizime. Si lekini uwanda uwo ulolele ukuca, lelo umu walanganyi. Nupya utalola ukwandatuka kwa pa macaca.

¹⁰ Uwanda uwo kautipwe pano ali lino nafumile mu ndilwa yakwe mayo, nupya ali lino wandanzile intazi.

¹¹ “Owe mwe! Uzye pacani cino ntafwilile lino nkuvyalwa, nanti pacisila cakufuma mu ndilwa inte ukufuta?

¹² Uzye pacani cino mayo wamfukatile? Uzye pacani mayo wangonsizye?

¹³ Vyonsi vivyo vikana kucitika, ngano vii nkupuza. Ngano nindala utulo ninkasula.

¹⁴ Ngano nindala wakwe yamwene na yakateeka, yano yaikuulila amasano umu matongwa.

¹⁵ Ngano nindala wakwe yamwene aizuzizya zaabu na siluva mu mang'anda yao,

¹⁶ nanti ukulala mu musili wa kapopo, nanti wa kanya akafwe akatacili kalole uluswepo.

¹⁷ Kuku ku malindi ali kuno antu aipe yakaata iviipe vyao, nupya ali kuno antu yatonte yakapuzila.

¹⁸ Ali kuno anyepwe yakaikala ku matwi cele, yasiuvwa amazwi yakwe yakalinda nanti ukupunda kwao.

¹⁹ Kuku kwene ukwalala ance na aikolo, akuno na azya yakululwa ku asambazi yao.

²⁰ “Uzye pacani uluswepo lukapeelwa ku antu ali mu ulanda, nu umi ku myenzo ikunyongotoka?

²¹ Yene yakakumbwa imfwa ino itange iyafikile, nupya yakalondesya ukufwa ukucila vino yangalonda icuma icafiswa?

²² Yene yakakungumala sile mpaka lino yafwa nu kuzikwa.

²³ Uzye pacani umi ukapeelwa ku muntu wino atangalola inzila yakwe, wino Leza wayalila konsi konsi?

²⁴ Pasi pano nemo nkulosya mucifulo ca kulya, nu kunyunguluka kwane kukapongoloka wa manzi.

²⁵ Ivintu vino noopanga mpiti vyativinjizila, ivyampile intete vyativimponela.

²⁶ Nemo lyene insi umutende nanti kwikala ku matwi cele, ntakwata upuzo, lelo amacuzi yatupu yatiyamfikila.”