Yobo 29 - Amazwi Yakwe Leza 2013

Yobo wiusya isyuko lyakwe ilyampiti

¹ Alino Yobo atwalilila ukuvwanga ati,

Yobo

² “Iye mwe, ndi cakuti nali vino umu manda yakucisila cali! Lilyo lino Leza wambakanga.

³ Leza wali nani lyonsi nu kunkozezya, ali wino wankozezyanga uluswepo lino nkupita umukanda.

⁴ Yaya yali amanda yano nali nu ukankala wa ulumendo wane. Na Leza wacingililanga ing'anda yane.

⁵ Yawe Wamaka yonsi, wikalanga nani nga na ana yane nayo ala yati yandizizya.

⁶ Iviteekwa vyane vyavovomokanga iziya lino nailyokezyanga. Mafuta yakwelekela nayo yapongolokanga ukufuma umu musili wa mawe, kwati utunguzi sile.

⁷ Lyonsi ndi kwaya ukukongana kwa nkombe zya muzi, nga nateka sile icilimba cane apa musolo ala lwanya nu kunya.

⁸ Ulola sile kuno alumendo yasempa, yafuntuka. Nga lino aikolo yonsi iyimilila, apakumpela umucinzi.

⁹ Intunguluzi zilinzile zyaya mya! Zite ukuvwanga, nu kwika iminwe apatunwa twao.

¹⁰ Nanti aya simucindikwa yonsi, ala yata ukulanda, yikala cele.

¹¹ Umuntu ali wensi uwandolanga nanti ukunguvwa, walandanga ivisuma pali nene, napali vino nacita.

¹² Umulanda ali wensi uwalonda uwazwilizyo kunondi namwazwanga. Ana yansiwa atakweti ukwakuya, nayazwilizyanga.

¹³ Wiyo wensi uwaponelwa nu uzanzo utalangane, wampelanga upolelelo. Alino nasansamusyanga yamukamfwilwa.

¹⁴ Lyonsi nemo nacitanga ivyaololoke, icakuti vyasangwike kwati ali vyakuzwala vyane.

¹⁵ Nali nene indi linso lya mpafu, ni kulu lya vilema.

¹⁶ Nali wa mukwasi wa yalanda. Umwenyi namuputwilanga umulandu usaka sana.

¹⁷ Uwaluvyanya wene namutamanga umu nzekete, mpaka aswa navino avwasile. Fwandi natulanyanga yano yafyengwa.

¹⁸ Nemo natailanga ukukota, ukukwata amanda avule wa mukoma, alino nu kufwila umu ng'anda umwane, imfwa Leza.

¹⁹ Natambilizya imisisi yane uku luzi ukuli amanzi avule, muno umuti lyonsi ukatona ulumi.

²⁰ Umuntu wensi wandumbanga, nga maka yane yali anyanya nu kutovoka foo.

²¹ Yonsi yakutikanga nu kuteya amatwi kuno ndi. Yuvwanga ningo pali vyonsi vino nayapanzyanga amano.

²² Nga namala ukulanda kutayanga nanti wenga nupya ukusumba penepo izwi. Fwandi amazwi yane yingilanga umu mano yao wa malakasi ya mvula.

²³ Umuntu wensi wayapokelelanga kwati avino alimi yakapokelela imvula ya mooko.

²⁴ Na lino nkuyanena, ala nkuyasekelako, yatatailanga zuwa ukuti icampomvu. Lelo ndi nalanga icinso cane kuti citaloleka wa cifinya mwili, awe lyene, indola yatemwa.

²⁵ Wa mwene wao, nayatungululanga inzila isuma ino nayasolwela. Nayatwalanga konsi sile kuno natemwa, wakwe vino intunguluzi ikacita uku vita vyakweyo. Nali wakwe kamyalalika wakwe yakalosya.”