Yobo 28 - Amazwi Yakwe Leza 2013

Ukulumbilizya amalango yakwe Leza

¹ “Akuno yaya imikoti muno antu yakaimba siluva, kwaya kweneko na malungu muno yakaengulwila zaabu.

² Imbuulo ikaimbwa umu musili, Alino nu mukuwa nao kwene ukufuma uku mawe.

³ Apa kumala imfinzi antu yakakozya inkozyo. Alino iyimba sana iviwina ivizike, apakuti yazane amawe alala pansi apafitisye.

⁴ Akaya mwenemo umukasi yakaimba yamwimbwe wa viwina vya nengo. Yakapeluka uku myando pano yasilola pano yangimilila. Yakaombela apatali wakwe cimwi apafuntwike ku antu.

⁵ Alino umu musili kwene ali muno mukamela ivyakulya. Nupya lwa pansi kwene ali pano umusili ukaononekela uku moto.

⁶ Umu mawe amu mukoti uwo umukafuma amawe yakwe safilo, nga mukazanwa nu tuulungwa twakwe zaabu.

⁷ Lyang'anda atamanya nanti panono inzila iyakwingilila umu mukoti, ni cikozi kwene citamanya nanti uwanda uno catala icipapukila apapela.

⁸ Kutatala kwaloleka cisama nanti icilyanyi icili consi icatala icipita umu mapoli amusango ndi uo.

⁹ “Antu yene yakatukula amawe nu kuyatamola. Yakatukula imyamba nu kuitenula kumwi na masinte.

¹⁰ Yene yatulula amawe suka iyafumya mwenemo umukasi utumawe twamutengo.

¹¹ Yakanengula intulo zya nguzi suka iyasokola ni vyafisama umukasi.

¹² Amano kwene yayo, uzye tungati aukwi kuno yafuma? Aukwi kuno tungafumya amano yakwiluka?

¹³ Kutatala kwaya umuntu uwamanya inzila iyakuila ukwaya amano. Nupya umuntu atange ayafumye umu mpanga ya pano, iya antu apuma foo.

¹⁴ Itenga likuti, ‘Asi muli nene umwaya amano.’ Yemba nawe akuvwanga ati, ‘Amano ntayakwata.’

¹⁵ Amano yayo yatange yakalwe na zaabu uwamutengo nanti ukuyakauzya ni mitumba yakwe siluva.

¹⁶ Amano yatangakalwa na zaabu waku Ofili, nanti nu tumawe twamutengo cuze, twakwe onikisi nanti twakwe safilo.

¹⁷ Yene yaluta ukucindama kwi lola iliyengese, ilyakwe kilisto. Kutange kuye nanti wenga angakaula amano, ukukauzyanya icintu icili consi icapangilwa na zaabu.

¹⁸ Ukucindama kwa mano kwaluta ukucindama kwakwe kolali na yasipele, Owe mwe! Twene tusi twakupenelako.

¹⁹ Ukucindama kwa mano kwaluta ukucindama kwa tumawe twakwe topazi twaku Kusyi. Nanti a zaabu wiya kwene umwengululwe ningo, asi wakulinga kweneko ku mano.

²⁰ “Uzye amano kwene yaa yafuma kwi? Aukwi kuno tungafumya ukwiluka.

²¹ Iviumbwa vitange vitale viyalole. Nanti ivyunyi kwene ivikapapuka umulwelele.

²² Uononesi ni mfwa navyo kwene vikavwanga iviti, ‘Awe cumi naswe kukwene kuno twaya, tukauvwa sile apa lulumbi lwa mano.’

²³ “Leza wenga mpo, aliwe wamanya inzila iyalungama ukwaya amano. Aliwe wene wamanya intulo apakafuma amano.

²⁴ Pano wene wamanya na kuno impanga yonsi yapelela. Wene akapeketa vyonsi ivyaya pano nsi, apisika liyulu.

²⁵ Lino Leza wapimile amaka ya muza, nu kupima yanande yakwe yayemba muno yapelela,

²⁶ wapima ni mvula pano ingatonyela ipelele, alangilila ni nkuwa inzila umwakupita.

²⁷ Waweni ukuti vyonsi vivyo ivyamano. Leza fwandi, ali pakucindamika amano, ayapima nu kuyateyanya ali vino wayateinye.

²⁸ Fwandi lyene ali vino wanenyile nu muntunze ukuti, ukuya ni coopo kuli Leza ali kukwata amano, nu kufuntuka uku kucita iviipe, ali kwiluka.”