Yobo 27 - Amazwi Yakwe Leza 2013

Yobo

¹ Yobo atwalilila nu kuvwanga ati,

² “Nemo nalapa nati, ‘Leza umwiyulu wiyo Wamaka yonsi, wene uwakana ukunjelela nu kuleka umi wane usasile.

³ Insita zyonsi lino incili nu umi, nupya lino ncikweti umupu wakwe Leza kwene umu mpuno zyane,

⁴ imilomo yane italatala ivwange ivya ufi, nanti ululimi lwane lutalatala lutumpoke foo.

⁵ Ntalatala nezye ukuzumilizya ukuti mukuvwanga vyacumi, mpaka sile ni mfwa yane, ntalatala inte ukuvwanga ukuti nene muntu umwi uwakaele.

⁶ Ntalata ukulanda ukuti nemo nkacita vyaololoke, nu kuta intalatala inte ukucita vivyo, awe. Pasi pano kampingu wane asikunenola.’

⁷ “Si lekini vintu ivikaponela antu aipe viponele anisi yane, ni vikaponela antu alufyengo navyo viponele yayo akankatukila nu kundwisya.

⁸ Uzye umuntu umwi wiyo atamanya Leza angakwata upaalilo, lino yamusukula nanti lino yamupoka umi wakwe?

⁹ Uzye kwene Leza nawe anguvwa ukupapata kwakwe, apa nsita ino intazi zyamuzana?

¹⁰ Uzye wene angazangila muli wiyo Wamaka yonsi? Uzye wene angapepa kuli Leza umu nsita zyonsi kuti amwazwe?

¹¹ “Namamusambilizya fwandi, ivyaya amaka akulu yakwe Leza. Nu kulondolola kunomuli amapange yakwe Leza Wamaka yonsi.

¹² Endi, mweisikulu mwailolela cico mpiti. Uzye lyene pacani cino mukuvwanga ivya civwangevwange?” Zofala nawe apakuvwa vivyo avwanga ati,

¹³ “Leza akatala alolela kweneko, apakuti aletele antu aipe ucuzi. Ni cakusyalikizya, cino Wamaka yonsi akacitila antu akakate, apa kufwa kwao aeci,

¹⁴ ana yao nanti yangavula uli, yonsi kwene yalakomwa ku lupanga umu nkondo, Na izikulu yao nayo yalacula uku nzala.

¹⁵ Asyala nayo yalafwa uku mpungo. Na aci yao, yamukamfwilwa asyala, yatalayalosya.

¹⁶ Antu aipe nanti yangalonka siluva, yatulike ivimitumba wa musensenga, nanti yatulike imitumba ya nsalu izyakuzwala,

¹⁷ vitakweti incito nanti imwi kunoyali. Antu asuma ali yano yalavizwala. Akayele ali yano yalankana na siluva wao.

¹⁸ Antu aipe yakaikuulila sile amang'anda kwati amasumbo yakwe tandaulwe, nanti kwati akamusakuta kakwe malonda. Akulinda nu kuzila kolwe uku vyalo.

¹⁹ Apa nsita imwi yakusyalikizya akama yayo yalalambalala pansi, lino yacili nu ukama, nga lelo lino yalazyuka, yaliukila sile pasi nanti conga apa vyuma vyao.

²⁰ Ivintu vyakoofya vilayapumikizya wakwe mulamba akapongwela, nu mu nsita zya usiku nkungulupya ayulula.

²¹ Umuza uno ukatunkila uku ufumondaka ulayakumpula, nukuyafuntusya uku wikalo wao.

²² Umuza ukuyapupanya nanti yangezya uli ukupuuka.

²³ Lilya kwene lino yakuti katuutuke, ali lino nkungulupya akayalondelela na maka apakuti ayonone.”