Yobo 26 - Amazwi Yakwe Leza 2013

Yobo

¹ Lyene Yobo aasuka ati,

² “Iye mwe, we Bilidadi vino wantulanya ne mbulwa maka! Iye mwe vino wakomelezya ikasa lyane ilyatilitonta nu kutovoka!

³ Cumi kwene wamanya ukusunda imbutuma wakwe nene. Wewe mucenjele uku kupanda umuntu amano yampomvu.

⁴ Uzye aweni wino ukwelenganya ukuti kuli umwi anguvwa nu kutezya vino wavwanga? Aweni fwandi uwakupanzizye amano akulanda ivyamusango ndi uo?”

Bilidadi

⁵ “Ala mwine imiyeye ino ikazanwa uku mpanga ya afwe ikakankamala sile. Amanzi nayo kwene yakazakaza kumwi ni vya muluzi kwene.

⁶ Impanga ya afwe yaya apa swe lwakwe Leza, ni lovyo nalyo kwene lyaya pambiliwili.

⁷ Leza wanza iyulu umu lwelele, ilya kwikasa lilunji. Waning'inya impanga umu lwelele.

⁸ Wika amanzi avule umu makumbi. Wasunga amanzi yayo anyome cakuti yatange yituluke pamulandu wa kunyoma kuno yakwata.

⁹ Lino umwezi wakoma, wene akauvimbilikizya na makumbi yakwe.

¹⁰ Alino Leza azingulusya icisilwa apa manzi, papa pano wapaatukanya uluswepo ni mfinzi.

¹¹ Apikalila iyulu pene pakatelengana uku ntete, lilyo lyonsi lino Leza wapakalipila.

¹² Amaka yakwe Leza alio yamyalalike yemba, na maka yakwe kwene alio yalenzile ukuti akome icilyanyi ci Laabu icapa luzi.

¹³ Umupu wakwe uwalenzile ukuti iyulu lyaloleka iliyengese. Alino ikasa lyakwe nalyo ilyatulinkinye icizoka cino cutukanga.

¹⁴ Vyonsi vivyo, atumwi tumwi sile apa vintu nyanya vino vikalanga amaka yakwe Leza. Tukauvwa sile tunono umu kutotoza sile. Lelo ukuuza kwa kupangalansya kwakwe aweni angakwiluka?”