Yobo 24 - Amazwi Yakwe Leza 2013

¹ “Uzye pacani cino Leza Wamaka yonsi wakana ukuteyanya zuwa insita yakumpingwilila penepo? Uzye pacani cino yayo akacita vyaololoke yalole wanda uwakuyacitilamo ulungi?

² Antu aipe, yene yakasimpula impopo zyamuli yanande yao kuti yavungulule yanande yao. Yakaiya maufyo ya viteekwa nu kuminkanya pa viteekwa vyao.

³ Yasenda yapunda ya ana asyale nu kutoola ing'ombe zyakwe yamukamfwilwa, kuti iye iyakwe kamukole.

⁴ Umu nzila namo yakatazyela apina, nu kupoka insambu zya alanda. Iyasuka yapatikizya natakweti nanti kamwi kuti yafisamoka.

⁵ Alino kwene yakalenga nu kuti alanda yasapika umu mapoli umukulonda ivyakulya, ungati aya punda ya mpanga, apakuti sile yalisye ana yao.

⁶ Lyene yakazombola ingano mu vyalo ivisi vyakwao nu kusotolezya amatingi mu vyalo vya matingi vya antu aipe.

⁷ Usiku onsi yakulala citutu, pano yuulilwa vyakuvimbala. Yene yatakwata ivya kuyacingilila uku mpepo.

⁸ Kungwi wensi akafuma uku myamba akasilila sile apa mili yao. Yakakumbatila sile amawe apamulandu wakuulilwa umwakuwa.

⁹ “Lyene antu kwene yayo yakasompola ana asyale ukwi yele, nga yapoka na ana ya alanda pakuti yaye wakwe kamukole. Apakuyakulula, suka alanda yayo yatala yalipila impa zyao, zino yayapingwilile.

¹⁰ Alanda yakapita sile tupu, yatakwata ivyakuzwala foo. Yakatunta imyanzi ya ngano ni nzala, ukwaula ukulya.

¹¹ Alanda alio yakaponda, iyakanda nu kufena amatingi nga yenga amafuta ukwaula ukupelwa nanti kamwi.

¹² Umu musumba, unguvwa kuno antu yakung'onta nu kupumbuka. Limwi unguvwa na kuno antu yano yatiyalasa yakuteta. Nupya kusi nanti umwi angasakamala, nu kuyuvwila uluse lino yakumupapata.

¹³ “Fwandi akuno yali antu yamwi yayo yatasakamala uluswepo, nupya nu kuutuka yakaluutuka, yasilulonda awe.

¹⁴ Ulazana ukuti icipondo cene calaya katondo tondo, kuti cikakome umupina nanti umulanda. Usiku cene ala waca, ali nsita yakuya umukwiyila auze.

¹⁵ Cizelele akalolela apa nsita yakwe namukokolo. Nu mu mano yakwe avwanga ati, ‘Kusi uwatandola.’ Nupya nu kuivulunganya apa manso apakuti yauze yatamulola.

¹⁶ Antu amusango uu yasilonda uluswepo foo. Umusanya yene yakafisama. Usiku, ala waca, iyatulula amang'anda ya antu nu kwiya mwenemo ivintu.

¹⁷ Yonsi yao, yakautuka uluswepo lwa kasanya. Alino imfizi yene yataikwatila intete foo.

¹⁸ “Fwandi nawe Zofala ali vino walanda wati, ‘Antu aipe yakasendwa na mulamba wa manzi. Ivyalo vyao, ivitiipwe! Kusi nanta yamwi akaya umu vyalo vyao ivya matingi.’

¹⁹ Vivi kwene vino amanzi yakauma, apamulandu wa cikaililwa ni cilala, ali vino antu aipe yakaongoloka ukufuma muno nsi.

²⁰ Nupya kutange kuye nanti yamwi akuti yayiusye. Na yanyina kwene yakayilila kumwi. Yakaononeka ndi vino umuti ukaponelwa ni nkuwa, ukaononeka.

²¹ Pano antu aipe yakacuzya ing'umba, zizyo izitakwata ikwata nupya kusiya ukutezela yamukamfwilwa, awe.

²² Fwandi Leza, umweneco uku maka yakwe, aliwe akaonona yao akati sweswe yamaka! Akayazungola, nu kufwa iyafwa.

²³ Limwi nalyo Leza akaleka antu kwene yayo aipe, yaikalile ku matwi cele, ala ukuya kwene amanso yakwe, asumvile sana kunoyali nu kupeketa imipitile yao yonsi.

²⁴ Antu yayo aipe yakaiza iyapulama pa kasita akanono sile. Alino lyene iiza iyongoloka sile, nu kufota wi sote. Iyatandika ukufoota wa malezi yano yatiyasinza

²⁵ Uzye umwi angakana ukuti avino cikaya? Aweni angansinila ukuti nkuvwanga ivyantumpu?”