Yobo 23 - Amazwi Yakwe Leza 2013

Yobo

¹ Lyene Yobo aasuka ati,

² “Nilelo kwene nkuilizyanya cuze kuli Leza, pamulandu wakuti nanti ncili nkuteta, wene asikumpela upemwilo awe.

³ Si cange cizipe imanye kuno Leza akuzanwa, kuti nkafike kuno akaikala!

⁴ Awe cumi ngano naya nailizyanya kunoli. Nakanwa kane ngano kaya kailondolwela vino ningaipokolola.

⁵ Ngano naya nayuvwila nenga ukwasuka kwakwe Leza, na vino angatemwa ukuvwanga kunondi.

⁶ Uzye kwene Umwene aliwe angaomvya amaka yakwe pali nene apakuti ancilime? Awe, lelo wene angasuka antezye.

⁷ Angatala andole ukuti kwene umuntu wi akuilolwela umu ufumacumi! Ali cino fwandi, kapingula wane angasuka anjele mizu.

⁸ “Akula nalulumba, nalungama ukunkolelo, ukwaula uku muzana, nanti ndi naya uku cisila awe cumi konsi kwene kusi kumuzana.

⁹ Ndi namulonda ku katutu kuno akuombela, ala nsikumuzana kweneko. Nanti lino naya uku kayeya, nako kwene intange muzane foo, nanti ukumulola.

¹⁰ Lelo kwene Leza wamanya imipitile yane yonsi. Ndi cakuti angatemwa ukumvukuta umwi lungu, awe cumi angalola sile kuno niza nafuma mpee, wakwe zaabu.

¹¹ Nemo lyonsi nkalondela umu ntampulo zyakwe, ni ngazo zyane zitatala zyapumba umwikula lyakwe.

¹² Nemo lyonsi nkawaka amasunde yakwe yano akanena. Vino akalonda ali vino nkacita. Asi vino nemweneco njitemilwe.

¹³ “Umweneco ataya na kwaaluka, ndi watemwa ukucita icili consi aweni angamulesya? Wene akacita consi cino akasi.

¹⁴ Pano umwisikulu wamanya vino alancitila, ndi muno amapange yakwe avule yayelile.

¹⁵ Fwandi cico kwene ali mulandu kwene uno nkuvwila intete zyakuyatankamala panoli. Pasi pano ndi natandika ukwelenganya, ali lino ni ntete zikucilila mwenemo ukundema.

¹⁶ A Leza kwene, uwataleka kuti umwenzo wane utovoke. Leza Wamaka yonsi watandetela ni ntete.

¹⁷ A Leza aliwe akandenga ukuvwa intete, asi mfinzi ikome ino ikandetela akanda, foo. Nanti cingaya cakuti ali kano kamvimba apa manso.”