Yobo 22 - Amazwi Yakwe Leza 2013

Ukulanzyanya kwakwe citatu Elifazi

¹ Lyene Elifazi umwina Temani aasuka Yobo ati,

² “Uzye umuntu angaya wamuzano kuli Leza? Awe, umuntu wamano akailetela sile umuzano umwisikulu.

³ Uzye wemo ukuti Leza Wamaka yonsi akasekelamo pamulandu wakuti wewe kacita wa vyaololoke? Uzye Leza wene angazombolamo cimwi umu miyele yako iyakaele?

⁴ Limwi wemo ukwelenganya ukuti pano sile ukamoopa nu kumucindika ali cino wakucitila vivyo apakuti utaca ulolole?

⁵ Ala awe! Asi avivyo foo! Apamulandu wakuti wemo waifya apakalamba sana. Wemo amaifyo yako yacila apa cipimo.

⁶ Lino anyonko yatacili yakuwezezya impa zino yaazima kunuli, wemo watalanga uyapokolola ivyakuzwala vyao, mpaka iyasyala tupu.

⁷ Yano yuvwanga ulusala wemo wayimanga amanzi, na yano yuvwanga inzala, waimanga ivyakulya.

⁸ Waomvizye amaka yako akuzunguka, apakupoka impanga yonsi pano yapelela. Pamulandu wakuitemwa kwako acino wemo wikalilila mwenemo.

⁹ Watazyelanga yamukamfwilwa uleka yapita ukwaula utwakuyalongelezya. Alino na ana yacisyale nayo kwene wayacitanga wanyawanya.

¹⁰ Ee, lyene kucilole! Ali cino amasyamo yonsi yaa yatiyakwizila. Ali cino lyene ni ntete zyatizikulema.

¹¹ Ali cino lyene napa manso yako patipaya akanda, akati kalenga kuti utalola. Walola vino waya! Lyene cakupezya amano.

¹² “Uzye kwene ica cumi Leza wikalila apatali sana umwiyulu? Akalolekesya intanda mpaka nakuno zyayela ukutaitalimpila?

¹³ Fwandi cico kwene cino wikala apatali, acino wemo ukuvwangila uti, ‘Pasi cino Leza angamanya. Wene wafisama umu makumbi, uzye angatupingula uli?

¹⁴ Pano wene amakumbi yamuvimbilikizya, nu kutulola atange atulole ningo. Lilyo lino akutandalila sile apapela umu muputule wa mwiyulu.’

¹⁵ “Owe we Yobo, simanye ukulonda ukulondela imisango yampiti ino antu ampiti yapitanga mwenemo?

¹⁶ Ala mwine antu yaya walanga yasendwa mpiti na mulamba lino insita yao itatala yafika. Ali vino mulamba wapomwile ivifulo vyao iviundwa vyonsi pyu.

¹⁷ Antu yaya nu kwipa kwao, yanenanga Leza yakuti, ‘Senka pano!’ Nupya yavwanga yati, ‘Uzye Leza Wamaka yonsi angacita cani kunotuli?’

¹⁸ Lelo kwene nanti cali vivyo, a Leza kwene uwayasambazizye ni vintu visuma vyonsi umu mang'anda yao. Kwene nemo cingampezya amano pakuzumilizya imyelenganyizizye ya antu aipe.

¹⁹ Antu akacita vyaololoke yakazanga nga na antu akaele nayo yakaseka lino yalola kuno antu aipe yakuvunukwa.

²⁰ Yavwanga yati, ‘Cumi kwene anisi itu yavunukwa, ni vilonkwa vyao vyalowa umu moto.’

²¹ “Ali cino fwandi wemo Yobo, uwauvwana sile na Leza wako pakuti uye nu longo.

²² Wemo ule upokelele amasunde yakwe yano akakupeela, nu kuwaka amazwi yakwe amanda pe.

²³ Ndi wala waweluluka kuli Leza Wamaka yonsi, waicefya nu kuizilizya umukasi ka ng'anda yako,

²⁴ nu kusuula ndi wasuula ivyuma ivili wakwe zaabu waku Ofili, ni vyuma vyuze vyonsi uvilole wa lukungu,

²⁵ ale lyene Leza Wamaka yonsi alaya wakwe zaabu wako, uwamutengo ukulu cuze, na wakwe siluva umusuma sana.

²⁶ Ndi wacita vivyo, lyene ulazangila muli Leza Wamaka yonsi, nu kupaalila munoli umu kupama amanda pe.

²⁷ Lyene alino ulati ndi wapepa kunoli, nawe akuuvwa. Nga nawe ulafikilizya amalayo yako kunoli.

²⁸ Lyene ulaya nu longo mu mulimo onsi uno ulelengaya ukuomba, alino nu luswepo lulayengesela umu nzila yako yonsi.

²⁹ Pasi pano Leza akapulumula antu ya mataki na acilumba. Lelo yayo akaicefya, yene akayapususya nu kuyapolelela.

³⁰ Leza akatuula umuntu uwakaele, ali cino ali nu kukutuula ndi cakuti nawe kwene usi nu mulandu.”