Yobo 21 - Amazwi Yakwe Leza 2013

Yobo

¹ Lyene Yobo aasuka ati,

² “Aleni mutezye ningo uku mazwi yane. Ndi cakuti mwayatezya, ale lyene mumantekezyanga umwenzo.

³ Muteke imyenzo lino mukuvwa vino nkulanda. Ndi cakuti namala ukuvwanga, lyene ndi mukasi mungambwela.

⁴ Uzye mwemo umukulola kwinu, ivikanza vino nkweti, ivya muntu nanti a Leza awino nkucitila vii? Uzye nkuilizyanya sile ukwaula umulandu?

⁵ Mwemo munguvwikisye vino nkulanda, mumazunguka sile icakuti muleme ni minwe inu apa milomo ya pansi.

⁶ Nemo apa lwane ndi nelenganya icintu cii, awe cumi cikungoofya. Nkuzakaza cuze nu mwili wane onsi.”

⁷ Lyene nkwelenganya nu kuuzya inti, “Uzye icani cino antu aipe yene yakalengela pano nsi, iyakota nu kukota, ni syuko ala yakweti ilivule?

⁸ Antu aipe yene yakasyukila ikwata, iyalola nakuno ana yao pamwi na izikulu yakukula.

⁹ Umu mang'anda yao mwaya umutende nu longo, nanti ukali wakwe Leza usitala iuyaletela intete foo.

¹⁰ Ing'ombe ni viteekwa vyao pasi pakuya ni kwata. Nu kupulumula visitala ivipulumula nanti ukulokosya.

¹¹ Ana yao yakaicinila apanzi, wakwe yakapwata nu kucena ala tukucena wakwe yampombo na yakalulu.

¹² Ana yao yakaimbila nu kulizya ingoma na mapango. Yene yakazanga nu kucina lino yakulizya imitolilo.

¹³ Awe cumi pasi pa usuma, yaikalila ni syuko. Nu kuya yakaya uku mpanga ya afwe nu longo, ukwaula ukucululuka.

¹⁴ “Antu aipe yene ali yano yakanena Leza yati, ‘Swemo ule utute swenga! Tutakasi kuti watupingula nanti ukutunena ivyakucita.

¹⁵ Uzye Leza Wamaka yonsi aweni uwakuti twamutumikila? Uzye tungatumbulamo cani umu kupepa kunoli?’

¹⁶ “Lelo yene yamanya ukuti ulongo lwaya mu milimo ya makasa yao aeneco. Lelo nemo nsilondela umpandamano wa antu aipe uno yatailamo.

¹⁷ “Ale lelo uzye mukalola ilingi ukuti uluswepo lwa muntu mwipe lukazima? Nanti uzye caseeka uku umuntu mwipe ukuponelwa ni syamo? Nanti uzye mukatala imulola kuno Leza, mu ukali wakwe, wonona ivyuma vya muntu mwipe?

¹⁸ Amaila yanga yano mwalola umuntu mwipe akuuluka wa cipelele umu muza, nanti kuno akuuluka wakwe cungu muli nkungulupya?

¹⁹ Mwemo mukavwanga imuti, ‘Leza alavunuka ana pa maifyo ya akwasi yao!’ Ala asi avivyo foo. Lelo Leza alavunuka umuntu mwipe, pakuti umwisikulu amanye ukuti Leza aliwe akavunuka yakaifya.

²⁰ Si lekini umuntu mwipe ailolele ukononwa kwakwe, nu kuyuvwila ukali wakwe Leza Wamaka yonsi.

²¹ Ale lelo umuntu mwipe ndi cakuti wafwa, uzye angasakamala uli ana yakwe, nu kuyazanzya lino umi wakwe watiusila?

²² Uzye kwene kwatala kwaloleka umwi angapanzya Leza amano, pano wene akapingula na akwiyulu ukupelapela?

²³ Antu yamwi yakafwa nu ucindami wao, iyafwa nu luzango ala uku matwi kuli cele.

²⁴ Yakafwa ala yali atelepe aine, ni mimfyompo ala icilimo umu mafupa yao.

²⁵ Yauze nayo yakafwa ni cikonko umu myenzo yao. Ala yatenzi umi uwakucululuka, nu kuilizyanya apamulandu wakukana kwata uluzango umu umi wao.

²⁶ Lelo nanti cingaya vivyo imfwa yene ili yonga sile, nu kuzikwa yonsi yakazikwa icili conga umu musili. Ni ngonyo iziyalya yonsi kwene.

²⁷ “Fwandi mwe yayame nemo natimanya mpiti ivili umu myenzo inu. Natimanya iviipe vino mwatimupanga ukuncitila.

²⁸ Mwemo mwatimutandika ukuuzyanya mukuti, ‘Uzye ing'anda ya mukulu wilya iyelile kwi? Mu ng'anda umwikalanga antu aipe aumwi?’

²⁹ Nanti mukuuzya vivyo, uzye kwene mutatala muzya alendo nu kuuvwa vino yakalanda pali cico?

³⁰ Pa wanda wa upinguzi, ndi muno antu yakavwangila, Leza atalavunuka aipe lelo yalikala sile ningo. Nu kupusuka alio yaliza yapusuke apa wanda uno Leza alasoka.

³¹ Kutatala kwaloleka umuntu nanti wenga uwakusopa aipe apa mpulupulu zyao, nanti ukulandula pa uyi wao uno yakacita.

³² Lino yanyemula icala ca muntu mwipe nu kucitwala uku malindi ku kuziika, nga lino yaziika iyiika na yakalinda akulinda ilindi lyakwe.

³³ Antu yonsi yakasukilila icala cakwe. Yayo akamukolelela yakaya imintapendwa, nga yasumbila nu musili ningo apa cala cakwe.

³⁴ Ata see, ala fwandi lyene musikuicuzya sile? Amazwi yano mukulonda mwantekezya umwenzo, a uwelewele sile! Fwandi na mazwi inu kwene yano mukumyalalikila umwenzo wane musi amano. Ukwasuka kwinu konsi ukwa kutumpoka sile.”