Yobo 20 - Amazwi Yakwe Leza 2013

Zofali

¹ Lyene Zofali umwina Naamati aasuka ati,

² “Yobo, awe nemo vino walanda vyambaya uku mwenzo. Fwandi ali cino nani kankwasukepo zuwazuwa.

³ Imivwangile yako itansansamwisye. Ali cino nani umupasi wane wanena ukuti nkwasuke penepo.

⁴ Uzye kwene we Yobo, umanyile ukuti, ukutandikila sile pano umuntu waisilwe pano nsi,

⁵ isyuko lya muntu umwipe lisitala ilitantalila, ni nsansa zyakwe cisangoka zikalengela sile akasita kanono?

⁶ Iciimo ca muntu mwipe nanti cingatalimpa ukufika nu mwiyulu, nu mutwe wakwe wakumya nu mumakumbi,

⁷ lelo wene alongoloka sile wa muyeye. Na yayo amumanyile yatandika nu kuuzya yati, Mwe, uzye umuntu wilya waya kwi?

⁸ Akauluka sile wa ciloto, icisimanyikwa na muno cali cilozile. Akaongoloka wa vilolwa vya usiku, ivisiloleka nalyuze.

⁹ Amanso amulolanga yatalatala yace yamulole nupya, ni cifulo cakwe pano watenzi icita nu kuloleka.

¹⁰ Ana yakwe ayano lyene iyaca yaculilamo, umu kuwezezya antu ivyuma vino umwipe wiyile alanda.

¹¹ Umwili wakwe uwali ni vimaka uku ulumendo, utalalengela ukuzikwa nga nu kuola umu musili.

¹² “Nanti angala uyi ukauvwika ulyompe sana umu kanwa ka muntu umwipe, nanti angala wene akaufyofyonta nu kuumong'onya, auvimbilikizya na pisika lya lulimi lwakwe,

¹³ nanti angala wene akauvwata umu kanwa kakwe, ala asikulonda nu kuuswa,

¹⁴ lelo ukaiza iuola umunda yakwe, iusanguka kwati usungu wa nzoka umu mwili wakwe.

¹⁵ Wene umucenjezi nupya akaiya ivyuma vya antu, lelo ivyuma vivyo vitanga mutumbwila nanti cimwi. Uzye lyene asi a Leza akamupokolola ivyuma vivyo?

¹⁶ Umwipe akafipilila usungu, nga alino lyene iwiza umukoma afwa, kwati walumika ni nzoka ili wa nondo.

¹⁷ Ala calala casila. Atange nupya aye na maka akulola inguzi izikapongoloka amafuta. Nanti wa tunguzi utukakonkolola iziya nu uci.

¹⁸ Lyene ala wasya vyonsi vino walonsile pano nsi. Kusi kuti nupya akalole pano angazangila pa vyuma vyakwe.

¹⁹ Pasi pano lino wali pano nsi wikalile ukucuzya alanda, nu kuyasuula. Walunzilepo nu kupoka ku lukang'ansi, amang'anda yano wene atakuuzile.

²⁰ “Ulunkumbwa lwa muntu mwipe, ala lusisila. Uli mulandu kwene uno ni vyuma vyakwe, vino walanga watulika vitange vimupususye foo.

²¹ Apa mulandu wakuti kutali nanti wenga uwapuswike uku kuitemelwa kwakwe, nu kukupunuka, ali cino fwandi, ni vilonkwa vyakwe kwene kutange kusyale nanti conga.

²² Akasanguka umupina nanti wakweti ivyuma uli uku wingi.

²³ Apa kasita kaka kwene kano wakwatisya icuma, ali lino Leza nawe akamuvungatila nu kumupamola.

²⁴ Ukusempa uku canzo cacela kusi kucenjela foo. Ala ukuicuzya sile. Pano uluceto lwa mukuwa, ali luno lukaiza ilumutulinkanya amala.

²⁵ Uluceto ulukamulasa lukaiza ilufumila na pi tundu. Alino insongo yene ikaiza itulinkanya icitunzi ni nduzya. Lyene atandika ukuizakazila uku ntete wakwe mazombwe.

²⁶ Vyonsi vino wakwata vikaononeka, ku moto uno antunze yatangazimya, ali uno ukasyala ukumalila ivyuma ivyaya umwakwe.

²⁷ Iyulu litupu nalyo likasokolola uyi wakwe. Na antu nayo yakamusinila.

²⁸ Imvula ya citalawe ikateula ing'anda yakwe nu konona vyonsi. Alino vyonsi vyasyala ivisendwa uku ukali wakwe Leza.

²⁹ Fwandi vivyo ali vino isyamo lyaya, lino Leza akaletela umuntu umwipe. Nu upinguzi uku muntu akafutatila Leza, ali vino ukaya.”