Yobo 2 - Amazwi Yakwe Leza 2013

Satana wezya Yobo iila lyakwe ciili

¹ Nu wanda uze kwene angeli yakwe Leza yiza ku kwizalolekela pa manso yakwe Yawe, nga Satana nawe kwene akuno wali.

² Alino Yawe auzya Satana ati, “Uzye aukwi kuno wafuma?” Satana nawe aasuka ati, “Naile nkutandala mu nsi, inda nkuzeuluka ku na ku.”

³ Yawe nawe auzya Satana ati, “Uzye watulola vino umuomvi wane Yobo ali? Uzye muno nsi mungaya umwi wino yangalingana nawe uku usuma nu ku ulungami? Yobo waya nu mucinzi kunondi ne Yawe. Wene akafuntuka ku kucita iviipe vyonsi nupya akasunga ukaele wakwe. Ale lyene walola vino waicuzizye sile apa kunzembeleka nu kumpatikizya kuti imuletele imikosi apaula umulandu.”

⁴ Alino Satana aasuka ati, “Umuntu ali nu kupeela vyonsi vino wakwata pakuti aikale nu umi.

⁵ Lelo ndi cakuti wemo wala wakumya ku mwili wakwe nu kumutota, cawaya, ulalola vino alakutuka nu kukutipwila ale ukulola nu kulola!”

⁶ Yawe nawe anena Satana ati, “Ale fwandi umucite icili consi cino we mweneco ukulonda. Cikulu sile utezya kumukoma.”

⁷ Satana nawe ali pakufuma asya Yawe nga aya alwalika Yobo ivilonda umwili onsi. Ukutandikila sile apa tukando mpaka nu ku mutwe.

⁸ Lyene Yobo aya aikala sile pa citumba, pano yakaita itwi ni vikona. Nga atoola icinga acino aikwangola naco sile.

⁹ Alino umuci nawe ali pakutandika kumusinkola ati, “Uzye na ndakai ucili nu utailo? Si tuka sile Yawe pakuti ufwe, cisile nu kusila.”

¹⁰ Lelo Yobo wene aasuka umuci ati, “Wemo ukulanda wa mwanaci ciwelewele. Lino Leza watutumila icisuma, tukacipokelela. Uzye lyene tungailizyanya uli lino wene watutumila ulanda?” Icaleka fwandi muli vii vyonsi vino Yobo wacululukanga, wene atatazile avwange iviipe nanti vimwi kuli Leza.

Yacuza yakwe Yobo yatatu

¹¹ Walanga yacuza yakwe yuvwa imikosi iyaponile Yobo, yaya mu kumupempula. Amazina yakwe yacuza yakwe a Elifazi umwina Temani, Bilidadi umwina Syuwa, na Zofali umwina Naamati. Fwandi ali vino yuvwanyile nga yakatuka apakuti yakamupempule nu kumutekezya.

¹² Walanga sile lino yacili patali yamulola, lelo ala yatiyamuponga. Nga walanga yapalama kunoli, yamumanya nga yalukusya na minsozi. Alino iyalepola ni nsalu zyao pakulanga ulanda. Lyene iyatola ni twi nu lukungu, iyaiswela ku mitwe yao.

¹³ Lyene yikala pansi pamwi nawe, amanda cinimbali, usiku nu musanya ukwaula ukuvwanga nanti izwi kunoli, pamulandu wakuti yaweni ukulu wa ucuzi uno wakweti.