Yobo 19 - Amazwi Yakwe Leza 2013

Yobo

¹ Lyene Yobo aasuka ati,

² “Uzye kwene fwandi musikuta ukuncuzya nu kunsimanga mu mvwango zinu?

³ Mwati munsalula nu kunsinkola amaila na maila, ukwaula kuti muvwe ni nsonyi foo.

⁴ Ndi cakuti naponga, nanti naluvyanya, icani fwandi icingamuwaya namwe?

⁵ Ale fwandi kacali cili usi mulandu. Limwi mwemo mwalola ukuti namucimvya nanti namusinila umulandu uno nemo inkuculila mwenemo.

⁶ Lelo kwene mwikale mucimanyile ukuti, Leza aliwe sile wanjilikizya. Ali wino wampombelekezya umwi sumbo lyakwe.

⁷ Nkati ndi nailizyanya nu kupunda inti, ‘Mayo, silolini vino nemo nacula!’ Lelo pasiya nanti aumwi uwakungasuka. Nanti limwi nga nati tukavwangilwe, pasiya nanta umwi uwakuti atuputwile umulandu.

⁸ “Leza aliwe akacinga inzila yane, icakuti naposiwa napakufyonsezya. Mu nzila yane wika mwenemo akafinzi.

⁹ Ivyuma vyane vyonsi wavipoka, nu kungononela umucinzi wane.

¹⁰ Akantimbola lyonsi lyonsi icakuti lyene nasuka nazala. Lyene wasuka watenula nacino nataile mwenemo, ungati avino umuntu angatema icipupa umwakuuwa.

¹¹ Watansokela wakwe cimwi, lyene indi wa mwanisi wakwe.

¹² Ivita vyakwe vyandungama cipipya, viza vyanzanza, nu kwiza lilizya ing'anda yane.

¹³ “Ainane nayo yangutuka yonsi. Alino anji nayo yakundola wa muntu umwenyi.

¹⁴ Antu yane na yacuza yatiyantazyela. Yano napokelelanga ukwane nayo yatiyanjilila.

¹⁵ Aomvi yane, yamama akaomba ukwane yatakuncindika, na yakapempula yane yonsi yakundola sile wa mwenyi, kwati yatamanyile.

¹⁶ Ndi cakuti naama wenga, awe cumi kusi nanti ukwasuka, nanti ningezya ukumupapata uli.

¹⁷ Uwane nawe kwene akunena ukuti inkununka mu kanwa. Na inane yakunena ukuti inkununka.

¹⁸ Nu twance nato kwene tukunsoweka. Ndi cakuti nalolekela kunotuli itutandika ukungwela.

¹⁹ Yaya kwene yano yali yacuza yane, ali yano yakumfinda. Yano natemwisizye, ali yano yatiyamfutatila.

²⁰ Natinsyala sile umupomponteke, kwempe sile ni mfwa.

²¹ Si mungala mundole luse luse, mwe yacuza yane! Ala ivizanza vyakwe Leza vyativintitila.

²² Umulandu ci uno namwe kwene mungancuzizya, wakwe vino Leza akuncuzya? Uzye mutacili mutonte muno mukunzunya?

²³ “Owe mwe! Kalanda kasi kolo! Ningatemwa sana ndi cakuti amazwi yane yangiusiwa, nu kulembwa umu lupapulo.

²⁴ Nupya ndi cali cakuti yalemvilwe uku cilembelo ca cela apa ciliwe, apakuti yace yasyalilile umuyayaya.

²⁵ Ukuya kwene namanya ukuti kavwangila wane acikweti umi. Namanya ukuti aliwe aliza amvwangile.

²⁶ Nanti ningasila insyale amafupa yatupu, namanya ukuti lino ndakatuka wene alampalamika kunoli. Alino lyene ndalola Leza nu mwili wane kwene.

²⁷ Nemwisikulu ndamulola na manso yane, asi muntu muze awe. Ndamulola na manso yane yakwene. Nu mwenzo wane onsi ukuluukisya uwanda ulya. Ukuya kwene umwenzo wane ukucula, apamulandu na mazwi yano mwe antu mukunena ukuti,

²⁸ Uzye sweswe tukumucuzya, asi mwakufisama sile, umweneco wailetelela sile!

²⁹ Mwaoopa ulupanga luno lumuteyamile pano mutenzi. Pano mucimanye namwe kwene ukuti ivicitwa viipe, ivikavulumula icipyu cakwe Leza, asuka lyene azulunzya nu lupanga lwakwe. Nga lyene mumanya ukuti umucumi akuno waya uwamaka yonsi, wiyo akaputula imilandu.”