Yobo 18 - Amazwi Yakwe Leza 2013

Bilidadi

¹ Lyene Bilidadi umwina Syuwa aasuka ati,

² “We Yobo, uzye insita ci fwandi ino umacefyanga ivyakuvwangavwanga? Sitala kutumala kweneko uleke tuvwange nawe ningo.

³ Uzye pacani watucita sile kwati tusi antu, kwati sweswe ng'ombe, nupya kwati sweswe yatumpe umukulola kwako?

⁴ Ndi cakuti watemwa, ale fwandi isankaule wemwisikulu, uifundule. Nupya umanye ukuti impanga italatala isanguke amatololo. Nanti amawe kwene yatalatala yalole nanta kumwi kuno yangakunkulukila.

⁵ “Uluswepo lwa muntu mwipe luli nu kuzima. Ni cimbilimbili ca moto wakwe cilata nu kulunkuma.

⁶ Uluswepo umwakwe lukazima. Nu lukozyo ulukamukozezya nalo kwene lukazima.

⁷ Lino apa mpiti wazunzokanga apakupita, lyene alamantawila sile apakupita. Ucenjezi wakwe uliwo ukamulenga ukupempezyooka.

⁸ Pasi pano amaulu yakwe kwene alio yamuletelela, yamutwala umwi sumbo walemya.

⁹ Umunkovyo ulio ukamupomba uku cintunta, alino lyene ulukoka lulamufwanta.

¹⁰ Ulukose lukamulema umu nzila muno akapita, nu mwikula lyakwe muno akapita yalateya mwenemo inkose.

¹¹ Fwandi ivyakumofya vyamutengamila monsi monsi, vyalimbikana nawe monsi muno angapita.

¹² Apamulandu ni nzala, amaka yakamucepela. Ni syamo nalyo likamulondela konsi kuno waya.

¹³ Umwili wakwe wingililwa ni ndwala, izikamulya inkanda zyasuka indwala zyamukolokota, zyamutonsya amaulu na makasa, watemboka.

¹⁴ Lyene icisile ukumukululwila apanzi, ukumufumya umwakwe, nu kumutakanya apa kumutwala ku mfwa, umwene wa ngofyo zyonsi.

¹⁵ Lyene umuntu ali wensi angikala mwi taalu lyakwe, pacisila cakulisansa na maluti akuliswefya.

¹⁶ Imisisi ya miti mu vyalo vyakwe nayo suka sile yuma, kumwi namafwa ukumpela ya nsala.

¹⁷ Pano nsi napo, pataya nanti wenga uwa kumwiusya. Ni zina lyakwe mpaka liponge, litakawele umu ng'anda ili yonsi muno nsi.

¹⁸ Yamufumye umuswefile, nu kumusumba umu mfinzi. Yamuzinge muno nsi.

¹⁹ Cisi cakwezya ukusya umwanakwe nanti wenga, umu mutundu wakwe nanti icizikulula. Fwandi umu nsi mutasyala uwakazi kakwe nanti wenga.

²⁰ Apa kusininkizya uyi wa mfwa yakwe, aikazi aku uwondaka yalaizakazila sile yonsi. Na ikazi aku ufumondaka nayo kwene pasi pantete nu koopa.

²¹ Fwandi lilyo ali syamo ililaponela apa ng'anda ya muntu mwipe, umuntu wiyo wino atakwatila Leza icoopo.”