Yobo 17 - Amazwi Yakwe Leza 2013

¹ Nemo lyene inkufuteka sile, amanda yane yatiyasila. Akunjimbila imbiko yatiyakongana.

² Ica cumi apano yali yayo aku nsyenteka. Inkulola ntontonto na manso yane kuno yakunseka.

³ We Leza wane, ala vino nkuvwanga ivyacumi. Wemo ungala uzumile sile vino nkukunena. Pasi pano kusi nanti wenga angangazwa muli vino nkuilizyanya.

⁴ Pasi pano awewe kwene watuvimbilikizya imyenzo yao apakuti yatailuka. Leka fwandi yataitanka pali nene.

⁵ Cili kwati umuntu wino wataama yacuza yakwe, apakuti ayankanye ivyuma vyakwe, ala na ana yakwe yene yatenzi yakusipwilila sile, suka nu tulo twayazana yalala yatonta muno yakulolela.

⁶ Lyene nene natinsanguka ipinda umwi lelo, lino antu yakuomvya, nga akula yandola iyanswila na amati apa manso.

⁷ Amanso yane yatiyatonta umu kucululuka. Alino lyene natinonda, ninyaluluka ungati akasote sile.

⁸ Antu yampomvu yakati ndi yalola vivyo, pasi pakuzunguka. Antu akaele yakakatukila antu atamanya Leza.

⁹ Antu akailola kwati alio yakacita vyaololoke, yene caluta! Lyene yaya akailola kwati akayele, nayo kwene yatiyacila sile mwenemo.

¹⁰ Si ale fwandi, mwensi mungala muwele mwize mwansonsomba sile! Lelo kwene mwandini pali mwemwe kusi nanta umwi wino namalola kwati akweti amano.

¹¹ Amanda yane yatiyasila, nga na vyonsi vino napanganga ukucita, vyati vifilikwa vyaya na pambali.

¹² Antu yaa yakavwanga yati usiku uli musanya kwene. Umu mfinzi yakati, ‘Kwasya kwandatuke.’ Lelo nemo manyile ukuti ncili umu mfinzi.

¹³ Kwene nemo cino nkulolela sile, ukwikala uku mpanga ya afwe. Nanti ukwanzika icitala cane umu kanda.

¹⁴ Alino nu kunena imbiko inti, ‘Wewe uli tata.’ Nu kunena ingonyo inti, ‘Mwemwe muli mayo, nupya mwemwe muli yakazi kane.’

¹⁵ Uzye icani icili kweneko cino ningapaalila? Aweni akucilola?

¹⁶ Uzye cino nkupaalila cilaya nani kuzimo? Nanti uzye kuliko umwi angatemwa ukuti tuce tukazikwe nawe pamwi umu musili?”