Yobo 15 - Amazwi Yakwe Leza 2013

Ukulanzyanya kwakwe ciili Elifazi

¹ Lyene Elifazi umwina Temani aasuka Yobo ati,

² “Uzye kwene umuntu wa mano ali wino angaasuka amazwi ya uwelewele? Nanti ukwikuta umuza ukaye uno ukafuma uku ufumondaka?

³ Uzye umuntu wa mano angavwanga amazwi yasilesile, nanti aye ni milandile itange imucitile akantu nanti kamwi?

⁴ Kwene wemo watuluvyanya! Wonona icoopo cakucindika Leza.

⁵ Uyi wako uwalenga kuti vyonsi vivyo vivwangwe, nu kusampula sile imvwango zya ucenjezi.

⁶ Umulomo wako uli uno wakusinila, asi nene foo. Imilomo yako kwene, ali ino imakupeela umulandu.

⁷ Uzye wewe uli muntu uwatandikilepo ukuvyalwa pano nsi yonsi? Uzye akuno wali lino Leza wapanganga imyamba?

⁸ Uzye uvwikisya manye amapange yakwe Leza, nanti limwi wewe uli wamano ukuluta antu yonsi?

⁹ Uzye fwandi icani cino wewe wenga wamanya, ukwaula kuti naswe tumanye? Uzye ivyani vino wemo wiluka ukutuluta?

¹⁰ Ala naswe kwene twasambilila amalango uku akoloci yamwi, yayo avilwe lino so atatala wavyalwa.

¹¹ Uzye manye tungati watusuula amazwi itu akukutekezya? Ali kuti watusuula nu luse lwakwe Leza luno wakukwatila.

¹² Nga lyene casuka icipyu cako cakulenga ukuzambokela, nu twinso twako twantunwila.

¹³ Lyene wasuka wasokela Leza, wavwanga na mazwi amuzewanya kunoli.

¹⁴ “Uzye kwene umuntu uwala wavyalwa uku mwanaci nawe waya umufumaluke? Uzye kungaya akacita vyaololoke lyonsi kuno ali?

¹⁵ Ala mwine Yobo, Leza atataila angeli yakwe, nanti akwiyulu kwene, pano nayo kwene yataya amalilike foo.

¹⁶ Ale fwandi umuntu wene cingapela kwi! Wiyo uwa miyele iipe nupya ivulungane! Nga vino wene akacita inkota kwati avino akamwa amanzi!

¹⁷ “Ale tala uvwa kuno mwine Yobo. Leka ntale nkusunde.

¹⁸ Namakunena vino namanya. Vivyo ivyansunzile antu ya malango, asunganga vino ivikolwe vyao vyayasila.

¹⁹ Impanga yao itatazile ikowele uku masunde ya inamasi. Kutatazile kuye uwakuyapumbola umu nzila ya cumi yakwe Leza wao.

²⁰ Umuntu mwipe akaikala umi wa kucululuka amanda yakwe yonsi. Imyaka ya muntu mwipe yapendwa.

²¹ Impoma zya ngofyo zitalatala zite ukuvwika umu matwi yakwe. Nanti apupu kwene yakamuzanza insita ili yonsi ino wene atenekile.

²² Wene atakupaalila ukupusuka ku kanda ka mfwa, awe. Insita ili yonsi ala kuliko umwi akulolela ukumukoma.

²³ Wene akazeuluka konsi, na makozi yakulolela ukukompola icala cakwe. Wene amanyile ukuti imfwa ingamuzana insita ili yonsi.

²⁴ Akanda kakamoofya wakwe cimwi. Ucuzi nu ulanda vyaya panoli, kwati umwene uwaya uku nkondo.

²⁵ Vii vyonsi vyamucitikile pamulandu wakuti camukumvile, akatuka aya alwisya Leza Wamaka yonsi.

²⁶ Wakamuka uku kuyamulwisya. Wasenda ni vimpompo ni visyangu.

²⁷ Nanti angavimba uku manso umu kuitimbwizya amafuta, nu kuumika intungu kuli tukapafu,

²⁸ awe nce, akaiza azana ukuti ali umu matongwa nu kwikala mu vitotela na vyonsi vino wakuuzile ivisanguka ivipompa.

²⁹ Ivyuma vyakwe vitange vitale vivule foo. Navino akweti navyo kwene kusi kulengela. Nawe kwene ili mpela yakwe.

³⁰ Atangafuma umu kanda. Icimbilimbili cilumika insaala zyakwe. Umuza ulasenda maluwa yakwe.

³¹ Ataezya ukuisomba ukuti angatalimpa. Uo ufi uwafita fititi! Ukulokota sile, kusi kupuuka nanti ukulemba nupya.

³² Lino atatala wafika pano wali nu kufika, ala watanyala nu kulokota, kusi kupuuka nanti ukulemba nupya.

³³ Wene alaya wa ciseekwa icikalukusya utumbozya, kwati avino umu Olivi ukalukusya iluwa.

³⁴ Umu cumi, uluko lwakwe yayo akasuula Leza lwaya wakwe mutuusa. Nu moto uloca umuzi wa antu atemwa amafukakanwa.

³⁵ Antu aipe yakaelenganya sile ukusangukila auze nu kucita iviipe. Imyenzo yao yazula uyi utupu, ufi nu ucenjezi.”