Yobo 14 - Amazwi Yakwe Leza 2013

Amanda ya muntu wa umi apendwe

¹ “Umuntu wensi uwala wavyalwa ku mwanaci, umi wakwe pano nsi utaya utantalile. Lelo umi kwene uo, wavulisya amalanda.

² Waya wi luwa ilikasapatuka nu kuonza, nga liwela linyala nu kuuma. Waya wa cinzingwa, icisiikalila pano cili.

³ Uzye lelo we Leza, apacani cino ungamupelela amanso? Nga alino umwame nu kumuteyanyizizya insita yakwiza pingulwa?

⁴ Aweni fwandi wino ungazana umuswepe apa antu akowele? Kusi nanti wenga!

⁵ Amanda ya muntu pano nsi yapendwa mpiti. Nupya wewe umanyile impendwa ya myezi yakwe. Pano awewe kwene wamupimila insita. Uzye lyene wene angacila penepo?

⁶ Acino fwandi senka penepo nu kulolekesya kuze. Musye wenga asyale aikalile. Leka sile amalilile utumanda twakwe utusile twa kucululuka, wakwe sikancito akutumuka iyevu.

⁷ Umuti wene ukalolela nu utailo. Pano nanti yangausola, limwi yausinde wene ungalemba nupya, utwalilila nu kupanda impanda ni misambo iingi.

⁸ Imisisi nanti ingakota uli, ni cisiki citandike ukuuma umu musili,

⁹ ukaiza iupuka nga uvwa umunyezi, iulemba nu tumafwa ututekete cuze.

¹⁰ Lelo umuntu ndi cakuti wala wafwa, asiya na maka awe. Uzye umuntu lino wata ukufuuta, wene akaya kwi?

¹¹ Ndi vino inguzi zikapwa izita nu kupita, na yayemba nayo iyakama imuuma muya na solokoto.

¹² Umuntu nawe ndi wafwa asikatuka nupya, ala walalilila casila. Amayulu yalasuka yapanguluke, uwafwa wene atacili akatuke, kutanga kuloleke uwakumukatusya umu tulo twakwe.

¹³ Iye mwe! Fwandi cangecizipe umfisa kuko kwene ukwaya afwe, ukufika sile na lino ukali wako watankoka, nga alino wize uwateyanya uwanda wakunjiusya nupya.

¹⁴ Uzye umuntu ndi wafwa, angaya nu umi nupya? Ndi cakuti ali vino cingaya nemo fwandi apa manda yonsi yano ningakuombela ningalolela ukufika napa nsita ino amalanda yane yangansilila.

¹⁵ Lyene ali lino ungangama, nga nani inaasuke. Alino lyene ulandonda ne ciumbwa cako nu kundola.

¹⁶ Alino lyene ungaceceta ni mipitile yane yonsi, ukwaula lyene ukulondelezya na maifyo yane.

¹⁷ Alino lyene ulanjelela kuli vyonsi vino nakwifizye. Alino nu kuvisula ulavisula vyonsi pyu vino naluvinye.

¹⁸ Nga lelo ndi vino imyamba ikaongoloka ipona, ni vimawe vyapenukila kuze,

¹⁹ nanti ndi vino amanzi yakasuka iyakuzulula amawe, na mulamba nawe vino akasenda umusili, ali vino we Leza nawe kwene ukapelenganya vino umuntu akapaalilamo.

²⁰ Ukamala umuntu amaka mpaka asila nu kusila, pa manso ipasuluka nu kumusumba umusumba ukutali.

²¹ Ana yakwe aonsi ndi cakuti yakacindikwa, wene kusi kumanya, nanti yayazewanya, wene kusi kumanya awe.

²² Cino akauvwa sile lyonsi ukuwaya kwa mwili wakwe, nu kuilosya umwisikulu sile.”