Yobo 13 - Amazwi Yakwe Leza 2013

¹ Yobo atwalilila ukwasuka ati, “Vivyo vyonsi nani kwene nailolela ntontonto na manso yane, nu kuyuvwila na matwi yane. Nga nu kwiluka, niluka mpiti.

² Fwandi vivyo kwene vino mwamanya, avino nani kwene namanya. Mutalola kwati limwi mwati munduta amano.

³ Ali cino nemo inkulonda ukulanda sile nu Wamaka yonsi. A Leza mutupu, ali wino nkulonda ukuvwanga nawe.

⁴ Pano mwemo mukulonda sile mwailanga apakulanda ivyantumpu. Mwensi pyu umu mvwango zinu mukoline na yasing'anga.

⁵ Mwemo sulini sile, pasi navino mungansunda. Mwemo mulinzile ukwikala sile cele.

⁶ Tala uvwini vino nkulonda munene, muvwe amazwi yane yano namalolola.

⁷ Uzye icani icati cimukumba kuti mwatumpoka? Uzye ufi winu kwene ali nzila ino mwatimuzana ya kwazwilizya Leza?

⁸ Uzye muli uku lusansa lwakwe Leza nanti foo? Uzye muli nu kuya muvwangila umu cilye?

⁹ Ndi cakuti Leza wakasi uku muceceta, uzye ivisuma cii vino angazana muno muli? Uzye mukuti mungatumpoka nu kucenjezya Leza ndi vino mukacenjezya antu uku ufi winu?

¹⁰ Nanti mungaya na kasoozi kunoli umu umfisolo, wene alamupupanya apaswe.

¹¹ Uzye kwene mwemo mutangemuvwe ni nsonyi izyakukanaya ni coopo ca ucindami wakwe Leza? Uzye kwene cisimuletela intete icakucindama kwakwe?

¹² Amapinda inu ampiti, aciwelewele sile. Yene yakoline ni itwi. Nanta amaasuko inu kwene akuipokolwelako, nayo kwene yakoline ni ivu.

¹³ Ale cefini congo, lekini nani vwange. Nanti consi icimancitikila, kacincitikile usi mulandu.

¹⁴ Nemo usi mulandu nanti ningamwa umwavi, mungalola naluka pano insi nu mulandu uku muntu.

¹⁵ Leza andye ndakulonda. Nemo ningaya nkalolole ukwakwe, apamipitile yane iya muno nsi.

¹⁶ Ukupama nu kuposya kwane, ali kuno kungampususya. Pasi pano umuntu wa maifyo atange apame vii, ukuti aye akalolekele apa manso yakwe.

¹⁷ Ali cino fwandi mwemo kutikini sile, muvwe vino namalondolola,

¹⁸ Nene muntu umwi umuiteyanye umu kulondolola umulandu wane onsi, pano ninsininkizya ukuti nene wakaele, nupya insi nu mulandu ku muntu.

¹⁹ Uzye akunoli umwi angampeela umulandu? Ndi cakuti akunoli, lekini aize. Ninjiteyanya namazuka cele nga mfwe.

²⁰ Lyene nkulenga ivintu viili, lyene nsyakufisama kuno muli.

²¹ Funtusya ulupi lwako kunondi, nga nu kuta ukungofya cila nsita.

²² Alino lyene ungame, nga nani namaasuka. Nanti leka imvwange nga nawe ungasuke.

²³ Uzye fwandi nacita vyani? Navino naluvyanya ivyani? Nenini vino naluvyanya navino nacita.

²⁴ Uzye icani cino wafisama kunondi nu kundola wa mwanisi wako?

²⁵ Uzye wemo ungaoofya ifwa ilikuulululwa nu muza? Uzye wemo ungazinganya amapelele?

²⁶ Kwene upinguzi uno wampingwila wene ulule. Wapingwila kumwi navino nolonginye umu ulumendo wane.

²⁷ Wanyepelela amaulu yane umwi koli nu mu myando. Monsi muno nalyasile walondelezya, nu kupima apali ponsi pano ulwazo lwane lwalyata.

²⁸ Lyene nemo nasila nu kulokota wi leka lyaku muti, kwati ikoti lino yatulola uku mpenzu.”