Yobo 12 - Amazwi Yakwe Leza 2013

Yobo

¹ Lyene Yobo aasuka ati,

² “Ica cumi nasininkizya mwemwe antu yamano. Na lino mulafwa ale na mano inu kwene yapongelela kumwi.

³ Lelo nani kwene inkweti amano wakwe yano mukweti. Nupya natimanya mpiti vivyo vyonsi vino mwati mulanda.

⁴ Na yacuza yane kwene yakunseka. Nanti angala napapasile kuli Leza nga nawe angasuka, nene wakaele, uwaula umulandu ku muntu, lelo yakanseka.

⁵ Mwemo mweisikulu musi ni ntazi nanta imwi, nu kwikala mwikala sile ningo wa asambazi. Nupya imwansyenteka ukwaula umulandu. Uzye icumi cingaya icamano ukuma umuntu akuipempezyokela?

⁶ Alino tala mulole! Aivi na antu atamanya Leza, yene yakaikalila ukwaula nu wakuyasonsomba. Fwandi yene amaka yao ali Leza wao.

⁷ “Ale kuuzye inyama ni vyunyi, vyaya kupanda amano.

⁸ Nanti yanga uku visela ivyamu nsi nanti uku nswi zyamuli yemba, vyayakunena nu kukupanda amano.

⁹ Uzye lyene mu vintu vivyo vyonsi, icani cino nemo ntamanyile ukuti Yawe aliwe uwaciumba?

¹⁰ Ala umi wa vintu vyonsi ivikafuta waya umu minwe yakwe Leza, ndi vino nu umi wa muntu kwene waya.

¹¹ Amatwi ali yano yakakutikila ivyakuvwauvwa, na kanwa nako kakasaasula nu kuvwa ukulyompa kwa vilyo.

¹² “Akoloci alio yakwata amano, lelo ukuvula kwa manda ya muntu nako kukalenga umuntu ukwiluka.

¹³ Lelo Leza aliwe waya na maka nga na mano. Tungapandwa amano nu kusambilila umpandamano kunoli.

¹⁴ Cino wene waongolola kutange kuye uwa kucikuula, wene nga wanyepa umuntu kutange kuye angamusapula.

¹⁵ Ndi Leza walesya imvula ukutonya, ale kwaya icilala icikome sana. Nupya ndi wene wati kitonyesye, awe lyene insi ala yaundwa.

¹⁶ “Leza uwaya na maka na mano yampomvu. Aliwe akateeka umucenjezi na wino yatiyacenjezya kwene.

¹⁷ Aliwe akavulunganya na mano ya ntunguluzi zya antu nu kulenga yakapingula yao amano yayapele.

¹⁸ Aliwe akapokolola aene amaka yawene nu kuyacita antu yasilesile.

¹⁹ Aliwe akalenga nu kuti yasimapepo yaye wa viwelewele. Akafumya ivilolo apa vifulo vyao ndi vyalengela penepo.

²⁰ Aliwe akazimya amazwi ya vilolo vyakwe ivyampomvu. Aliwe akalenga nu kutailwa kwa akoloci kusile.

²¹ Aliwe akalenga ukuti yakateeka yasulwe. Nu kulenga amaka yasile kuli yano akwata amaka.

²² Aliwe akasokolola apaswe ivicitwa vyamu mfinzi, nu kuleka umufitisye fii muswepe swee.

²³ Aliwe akakuzya inko, nupya aliwe kwene akazyonona. Aliwe akalenga imitundu ukusanduluka, nu kuisalanganya.

²⁴ Aliwe akavulunganya amano ya ntunguluzi zya antu pano nsi nu kuleka ukuti yavulunganya ivintu nu kuzeuluka.

²⁵ Aleka nu kuti yalukupulupunta umu kanda umwaula uluswepo, cakuti iyalukutalawanta wa antu ati yakoleka.”