Yobo 11 - Amazwi Yakwe Leza 2013

Zofali

¹ Lyene Zofali umwina Naamati aasuka ati,

² “Uzye umuntu uwavwangikisya wene yatange yamwasuke? Uzye ukuvwangikisya tungati ali kulungika?

³ We Yobo, uzye wemo ukwelenganya ukuti antu yangikala cele apa kuwowota kwako? Uzye kutangaya umuntu umwi wakukukanya lino ukusyenteka antu?

⁴ Wemo ukunena Leza uti, ‘Vino nataila ivyampomvu, nene wakaele apa manso yako.’

⁵ Iye mwe, si cizipe Leza aliwe avwange, pakuti akunenole,

⁶ lyene ungalola vino angakulongwela inkama zyakwe. Kwaya ivintu vimwi vino amano ya muntu yatange yamanye. Ali lino lyene ungasininkizya ukuti Leza akasuula sile ku vintu vimwi vimwi vino ukaifya.

⁷ “Uzye kwene we Yobo ungapikulula uwile wakwe Leza? Uzye kwene papo pano upezile wewe ungamanya ningo pano amano yakwe Leza Wamaka yonsi yapeela?

⁸ Ala amano yakwe Leza yatalimpa ukuluta na papela yi yulu, papo pano wemo utangafika penepo. Yazika ukuluta nu kumbo, uku cifulo ca afwe. Wemo ungaposiwa ukufika kweneko.

⁹ Cipimo ca maka yakwe caluta insi yonsi uku ukulu. Amano yakwe Leza yaluta kumwi na yemba kwene ukukula.

¹⁰ Leza ndi cakuti watile akwame, akolonganike na antu apakuti akupeele umulandu, uzye kungayako umwi uwakumukanya?

¹¹ Pasi pano Leza wene wamanya antu asi asomvi, nupya wene akalola iviipe vyonsi vino yakacita, nu kuviusya akaviusya.

¹² Ndi cakuti colwa angavyala umwana umufumaluke, ale lyene tungati ni ciwelewele kwene cingakwata amano yampomvu.

¹³ “Ala mwine Yobo wemo ungala uzifye sile umwenzo wako. Tumpula sile amakasa yako kuli Yawe, umupapate.

¹⁴ Ute ukucita ivyacicitecite, nupya funtusya ulufyengo munuli.

¹⁵ Vwile lyene umatumpulanga ivipa vyako, nu kulolekesya ningo ukwaula insonyi. Umaposya, nupya umaikalanga ku matwi cele ukwaula intete.

¹⁶ Ndi caya vivyo lyene ulilila uku macuzi yako, nu kuyiusya sile ndi vino yakaiusya mulamba apisile mpiti.

¹⁷ Uwikazi wako ulawala ukuluta navino ilanzi likawala lino lyafika apakasi kamutwe. Uwikazi wako ulasenula imfizi ukuya pali namukokolo, uku macaca.

¹⁸ Ulaikala ku matwi cele ukwaula ukuvwa ivyakuuvwauvwa apamulandu wakuti ulataila penepo cimwi. Leza alakusunga nu kwikala ulaikala umutende.

¹⁹ Lino ulapuza kutalaya nanti umwi uwa kukupuzola, na antu aingi yalalenga uwazwilizyo kunuli.

²⁰ Nga lelo antu akacita inkota yalati ndi yacelecensya, yatalalola ukwa kuutukila. Yalalolela sile ukupumbuka nu kufwa.”